O Porriño, 30 de xuño de 2025.- O Concello do Porriño informa de que, a partir de mañá, martes 1 de xullo, poñerase en marcha un novo servizo de autobús que conectará diariamente O Porriño con Praia América durante toda a tempada estival.
O servizo realizarase todos os días da semana, incluíndo domingos e festivos, ofrecendo á veciñanza unha alternativa cómoda e sostible para desprazarse ao litoral.
As saídas desde O Porriño serán ás 15:00 horas desde a parada situada na Avenida de Galicia, con chegada prevista a Praia América (Rúa Rans) ás 15:30 horas. O regreso farase ás 20:30 horas desde o areal, chegando ao Porriño ás 21:00 horas. A concesionaria responsable deste servizo será a empresa Lugove, dentro da súa operativa habitual.
Este novo servizo é froito das xestións realizadas polo Concello do Porriño ante a Consellería de Mobilidade, co obxectivo de facilitar os desprazamentos á praia e promover o uso do transporte público durante os meses de verán.
Dende o Concello animamos á veciñanza a facer uso desta nova liña, que permitirá desfrutar da praia de forma máis cómoda, económica e sen preocupacións polo transporte.
