- Os estudantes presentaron aos asistentes o seu proxecto “Greenpocket Solutions” xunto cun prototipo do produto ‘Eco Snack Bag’, amosando a súa proposta innovadora de envase biodegradable
O Salón de Plenos da Casa Consistorial acolleu hoxe un emotivo acto de honra aos alumnos e alumnas do IES Ribeira do Louro que se proclamaron gañadores do concurso internacional de emprendemento “International Dragon’s Den”, celebrado o pasado 20 de novembro en Malmö (Suecia). O equipo galego, composto por Beatriz Samunto, Nuria González, Noa Rodríguez e Sergio Lage, alzouse co primeiro premio grazas ao seu innovador proxecto “Greenpocket Solutions – Eco Snack Bag”.
O evento foi organizado polo Concello do Porriño en recoñecemento ao traballo e dedicación do alumnado e profesorado implicado neste éxito internacional. A xornada deu comezo coa benvida institucional e a intervención de diversas autoridades e representantes educativos, entre eles Carolina González Costas, Concelleira de Educación do Porriño, quen destacou a importancia deste logro para o municipio:
“É un orgullo para O Porriño contar con estudantes tan talentosos e comprometidos coa innovación e a sostibilidade. Este premio demostra que o esforzo, a creatividade e o traballo en equipo son claves para o éxito”, sinalou a concelleira.
Tamén interviñeron no acto Juana Rosa Muñoz Ibernón, Directora do IES Ribeira do Louro, Lorena Abreu López, Vicedirectora e Coordinadora de Internacionalización, e os docentes que guiaron ao alumnado na súa participación no certame, Olga González (Administración de Empresas) e Carlos Segade (Economía). Posteriormente, os estudantes realizaron unha presentación do proxecto premiado, expoñendo as características e impacto da súa proposta de negocio sostible.
A entrega de galardóns culminou coa intervención do Alcalde do Porriño, Manuel Alejandro Lorenzo Alonso, quen puxo en valor a importancia de apoiar iniciativas educativas que fomenten o emprendemento:
“Hoxe recoñecemos un éxito que transcende as aulas e pon en valor a calidade do ensino no noso municipio. Estes estudantes demostraron que, con esforzo e visión, podemos competir a nivel internacional e destacar pola nosa capacidade innovadora”, afirmou o alcalde.
No acto tamén estivo presente Román Rodríguez González, Conselleiro de Educación, encargado de pechar a xornada destacando o papel fundamental da educación no desenvolvemento da sociedade:
“En Galicia sempre temos apostado pola calidade e a equidade no ensino. O esforzo individual e o traballo en equipo acaban dando froitos, e este éxito é un reflexo do talento e da dedicación do noso alumnado. É un logro colectivo que pon de manifesto o papel vertebrador da educación na nosa sociedade, dotando aos mozos e mozas das ferramentas e habilidades necesarias para afrontar os grandes desafíos do futuro”, subliñou o conselleiro.
Sobre o premio “International Dragon’s Den”
O “International Dragon’s Den” é un prestixioso certame internacional de emprendemento organizado polo Affärsgymnasiet, unha recoñecida escola de negocios de Suecia. Nesta edición, participaron 22 equipos de 10 países distintos, defendendo proxectos innovadores ante un xurado composto por profesionais do mundo empresarial.
O equipo do IES Ribeira do Louro acadou o primeiro posto grazas á súa proposta “Eco Snack Bag”, un envase 100% biodegradable que soluciona os problemas medioambientais xerados polas cáscaras dos froitos secos cando se tiran ao chan durante o seu consumo. O xurado destacou a capacidade do alumnado galego para detectar un problema concreto e presentar unha solución sostible cun plan de negocio ben estruturado.
O éxito do IES Ribeira do Louro neste certame supón un exemplo inspirador para futuras xeracións de estudantes e reflicte o compromiso da comunidade educativa co emprendemento, a innovación e a sostibilidade.
