- O alcalde Alejandro Lorenzo e a concelleira Teresa Veloso acompañaron esta mañá ao xerente do Consorcio Galego de Igualdade e Benestar, Perfecto Rodríguez, nunha visita para comprobar o estado dos traballos destas instalacións que contan con 160 usuarios
- As actuacións, que estarán rematadas co inicio do curso escolar, inclúen substitución de cuberta, colocación de climatización, reparacións por humidades, novo peche perimetral e obras menores de mantemento das instalacións
O Porriño, 26 de agosto de 2025.- Aproveitando o peche das escolas infantís no mes de agosto, o Concello do Porriño está a acometer unha serie de obras ao igual que tamén se están a executar traballos de mellora no centro de día de Torneiros, cunha inversión total de preto de 80.000 euros. O alcalde Alejandro Lorenzo e a concelleira de Política Social Teresa Veloso recibiron esta mañá ao xerente do Consorcio Galego de Igualdade e Benestar, Perfecto Rodríguez, para acompañalo nunha visita de comprobación do estado no que se atopan as obras.
“Aproveitamos o peche estival das escolas infantís para levar a cabo estas melloras tan necesarias, que redundarán nunha maior calidade dos servizos que ofrecemos ás familias do Porriño. A nosa prioridade é garantir espazos seguros, accesibles e confortables tanto para a cativada como para os maiores. A colaboración co Consorcio Galego de Igualdade e Benestar está a ser clave para avanzar neste compromiso con toda a cidadanía”, aseguraba o alcalde.
A visita desta mañá concentrouse na parroquia de Torneiros, onde se localizan o centro de día de unha das Galiñas Azuis. Nesta última, estase a executar a maior das obras, cun orzamento de 47.790 euros, consistente na substitución da cuberta, deteriorada por un problema continuo de filtracións, e instalación dun equipo de climatizacións. Pola súa banda, no centro de día, co fin de mellorar a seguridade, accesibilidade e funcionalidade do recinto, estase a colocar un novo peche perimetral, que supón unha inversión de 26.250 euros. Ámbalas dúas obras prevense que queden rematadas a vindeira semana, coincidindo, no caso da escola infantil co inicio do curso escolar.
Na Galiña Azul de Doantes de Sangue, no casco urbano, levouse a cabo a impermeabilización das fachadas e reparación interior dos danos causados polas humidades e filtración de auga. Neste caso os traballos, valorados en preto de 5.000 euros, xa están rematados.
A maiores destas obras realizáronse outras menores de mantemento das instalacións e mobiliario, co fin de garantir o bo estado das infraestruturas e ofrecer un entorno máis adecuado e acolledor para os 160 usuarios destes tres centros. Estas actuacións inclúen reparacións eléctricas e de fontanería, revisión e axuste de peches interiores, reposición de mobiliario danado e labores de pintura en distintas estancias.
Desde o Concello do Porriño destacan que estas intervencións forman parte dun plan integral de mantemento e mellora continua das instalacións públicas, especialmente aquelas destinadas á atención á infancia e ás persoas maiores, dous colectivos prioritarios para o goberno local. “Sabemos que o benestar das familias comeza por servizos públicos de calidade. Seguiremos traballando da man doutras administracións para garantir que O Porriño conte con centros ben equipados, modernos e adaptados ás necesidades actuais”, concluíu o alcalde.
