O Concello dispón todo o necesario para que a parroquia e os veciños e visitantes de Cans gocen do festival
Tal e como adiantara a alcaldesa, Eva García de la Torre, na xuntanza que mantivo cos representantes da Asociación de Veciños, o torreiro de Cans ten un novo banco, de madeira.
O concelleiro de Seguridade, Limpeza e Parques e Xardíns, Orlando Márquez, supervisou a colocación deste banco ao que o Concello destinou un orzamento de preto duns 6.000€, e que está a dispor das persoas que asisten, dende este mércores ao Festival de Cine de Cans.
O Concello tamén dispuxo os case 400 valos na estrada que leva á parroquia dende o centro da vila, e que teñen coma obxectivo garantir a seguridade da circulación e a Concellería de Limpeza situou colectores de lixo extra na zona do torreiro, no espazo do río e na nova zona dos nenos
Hai unha semana, a Concellería de Seguridade xa retirara o enreixado que rodeaba o aparcadoiro situado preto da Rotonda do Can, quitando a malla e os postes e substituíndo os mesmos por un ‘peche’ de árbores e persoal da Concellería de Limpeza acondicionara a zona central de Cans, na entrada da Adroza e a beira do Bar Fortes; tamén rozará de silveiras e herbas os camiños por onde transitará o público, a zona da Casa da Mestra, o acceso ao ‘jalpón friki’, o Camiño do cemiterio, Camiño do cruceiro ata o Castillo e o Parque do Río e retirara o ciscallo de baixada ao río.
