Despois de que a mocidade do IES Ribeira do Louro, fixera o proxecto plástico das lonas que están expostas no Centro Cultural Municipal e no Concello, desde o 6 deste mes podemos gozar dos poemas de Xela Arias e retratos do fotógrafo Xulio Gil que forman parte da exposición ““Poesía do Retrato” no vestíbulo do Centro Cultural Municipal. Ata o 30 de maio.
A concelleira de Cultura, Cami Moreira, xa expresa no limiar do libro-catálogo da exposición, que :
“A poeta XELA ARIAS, foi unha das voces máis destacadas da poesía galega contemporánea.
A súa pegada, parte dun proxecto artístico onde encaixan harmonicamente novos espazos para a poesía, como son a fotografía, a música a pintura, verdadeiras coartadas que afondan no empoderamento do corpo feminino e na perspectiva de xénero.
A súa poesía son azoutes de vida descarnada, de palabra tensa e contida, lonxe do artificio e a retórica; puro corpo onde sentir a violencia da existencia humana na que irremediablemente nos construímos, nos destruímos e nos reconstruímos nun rodopío continuo, non exento da beleza da palabra que se fai voz, que se fai murmurio, que se fai berro, que se fai alento…”.
![](https://oporrino.org/wp-content/uploads/2021/05/Q55A8933-750x600.jpg)
Con esta homenaxe do Concello do Porriño a Xela Arias tamén se recoñece a dimensión pública e comprometida, non só como poeta, senón tamén de quen sempre estivo posicionada a favor da lingua galega, de quen prestou a súa voz en mobilizacións cívicas, como as que se produciron pola marea negra do Prestige.
Innegable é a súa contribución, case como pioneira no labor da tradución á nosa lingua dos textos fundamentais da literatura universal.