Novas

Porriño encarga aos escolares o seu cartel de entroido

 

A Concellería de Educación e Normalización Lingüística e a OMIX do Concello do Porriño convocan o III Concurso Escolar de Carteis de Entroido como xeito de promover esta festa entre a veciñanza, sobre todo entre o sector da poboación máis nova.

Poderá participar o alumnado dos centros educativos do Porriño con idades comprendidas entre os 6 e os 16 anos, así como o alumnado de Aceesca.

Establécense tres categorías de acordo coa idade, nas que haberá, para cada unha delas, 1º, 2º e 3º premio, baseados en artigos de material escolar. E escollerase un cartel gañador de entre todas as persoas participantes, que será a imaxe oficial para promover o entroido do Concello do Porriño 2024. A persoa autora deste cartel acompañará ao pregoeiro do entroido no balcón da casa consistorial.

Cada centro poderá participar con ata cinco carteis por categoría e a participación será individual. Os carteis poderanse entregar ata luns día 29 de xaneiro no Centro Cultural.

Valorarase a técnica creativa, o uso da lingua galega e a composición xeral do cartel, de acordo cos criterios apropiados a cada grupo de idade. Todas as características técnicas, contido e xeito de presentar os debuxos recóllense nas bases, expostas para a súa consulta no Taboleiro de Anuncios do Concello, na páxina web do Servizo de Normalización Lingüística e nas redes sociais desta Administración.

Tódolos carteis serán expostos ao público no vestíbulo do Centro Cultural, así coma no blog do Servizo de Normalización Lingüística do Concello do Porriño e nas súas redes sociais durante as festas do entroido.

Bases do III Concurso Escolar de Carteis de Entroido 2024

19/01/2024 in Educación e tecnoloxía

O Concello do Porriño inicia o asesoramento ás persoas interesadas nas Axudas á rehabilitación de vivendas nos polígonos residenciais Torneiros

 

O Concello de Porriño informa da publicación no Boletín Oficial da Provincia (BOP) das bases para a concesión de axudas en materia de rehabilitación e vivenda no entorno residencial de Torneiros. Ábrese agora, pois, previamente á solicitude, un período de información e asesoramento para a obtención da documentación necesaria para o cal dende o Concello poñen a disposición da veciñanza interesada un servizo de asesoramento e atención personalizada, que poderá ser de xeito presencial, con cita previa, ou por teléfono, chamando ao 986 335 000, de luns a venres, de 09.00a 14.00 horas.

Para este proxecto o Concello do Porriño recibiu un millón de euros, no marco do Programa de axudas para a rehabilitación de contornas residenciais a nivel barrio, que se distribuirán en axudas para impulsar medidas de eficiencia enerxética.

Dentro do ámbito delimitado do proxecto, que comprende 945 vivendas en 81 edificios, programouse inicialmente a rehabilitación dun número estimado de 105 vivendas que ocupan 1,38 hectáreas, repartidas en diferentes bloques. Dese millón de euros, 127.575 euros será destinado á urbanización e mellora da contorna, “que se complementa con outras actuacións que estamos levando a cabo para humanizar a zona”, puntualiza o alcalde Alejandro Lorenzo. A parte restante será para axudas a particulares e/ou comunidades de propietarios destinadas  á mellora de fachadas, mellora de cubertas, incluíndo aquí a eliminación de amianto, e a substitución de ventás e vidros exteriores, empregando carpintería de pvc e vidro eficiente termicamente, todo elo co obxectivo de conseguir un aforro enerxético.

“Deseñamos un proxecto global para a rehabilitación e posta en valor dos polígonos residenciais de Torneiros, un dos principais núcleos de poboación de Porriño”, explica o alcalde, asegurando que “esta aportación dun millón de euros é o primeiro paso que, seguindo nesta mesma liña de traballo, intentaremos se complemente cunha ampliación de fondos, para así atender ás necesidades que poidan presentar as preto de mil vivendas alí asentadas”.

O importe das subvenciones a particulares dependerá do grado de eficiencia enerxética que se alcance coas obras executadas, e pode ser do 40%, do 65% ou do 80% do orzamento, incluso do 100% cando se identifique un caso de vulnerabilidade

 

Bases Reguladoras

18/01/2024 in Urbanismo, comercio e industria

Porriño completa o proxecto que transformará o antigo Campo da Feira con dúas novas actuacións

 

A humanización do antigo campo da feira do Porriño coñecido agora como Parque Infantil será en breve unha realidade logo de dúas recentes licitacións de obras que complementan a que xa está a piques de rematar e que supoñen, todas xuntas, unha inversión que supera o millón de euros.

O obxectivo é convertela nunha gran zona verde con arboredo, un espazo a modo de escenario e gradas e unha área de xogo infantil na que se inclúan chorros de auga, os primeiros no municipio.

O alcalde, Alejandro Lorenzo, visitou esta tarde o lugar no que se están levando a cabo as obras. “Co paso dos anos este parque foi deteriorándose e perdeu o seu atractivo deixando de ser un lugar de paseo e desfrute para nenos e adultos, que é o que precisamente se persegue agora con este proxecto”, explica o alcalde, lembrando que se sitúa nunha das entradas ao casco urbano, “de aí que as obras de humanización comprendan tamén a mellora da contorna, a avenida Domingo Bueno e a rúa Parque Infantil, que o Concello acometerá co fin de unificar a zona do parque con San Sebastián e a zona peonil de San Bieito”.

Para a realización desta obra que actualmente está en execución o Concello de Porriño e a Axencia de Turismo de Galicia asinaran un convenio de colaboración cun orzamento de 498.213,12 euros. A esta cantidade hai que sumarlle agora dúas novas inversións, que supoñen unha inversión total de 1.153.056 euros.

Por unha banda, a Xunta de Galicia vén de sacar a licitación por 224.843,45 euros as obras de restauración do templete de San Luís, obra do arquitecto Antonio Palacios que foi acceso a primeira liña da rede de Metro de Madrid e que se trasladou ao Porriño no ano 1970. A Consellería de Cultura, Educación, FP e Universidades publica o inicio do proceso de contratación desta obra que contará cun prazo de execución de cinco meses para resolver as diversas patoloxías que afectan ao estado da estrutura e adecuar o contorno para mellorar a súa presenza no lugar.

E, por outra parte, o Concello do Porriño sacaba a licitación, tamén nos últimos días, por 430.000 euros a obra de humanización da rúa Parque Infantil entre rúa Salgueiro e Avenida Domingo Bueno.

 

17/01/2024 in Parques e xardíns, Vías e obras

O Concello do Porriño lanza un Servizo de Atención Cidadá pioneiro, innovador e itinerante por tódalas parroquias

 

O Concello do Porriño presentou esta mañá unha iniciativa innovadora de atención cidadá. “Trátase dun servizo pioneiro en España, co que reafirmamos o noso compromiso coa proximidade e a atención directa á nosa veciñanza”, sinala o alcalde Alejandro Lorenzo. Consiste nunha oficina itinerante que percorrerá as sete parroquias e todos os barrios do Porriño ofrecendo un servizo integral de atención cidadá.

O rexedor explicaba hoxe, durante a presentación na casa consistorial, que o  obxectivo deste servizo é “proporcionar unha cobertura completa ás diversas necesidades e demandas dos veciños e veciñas do Porriño, incluíndo temas relacionados con servizos sociais, atención ao cidadán, urbanismo, limpeza, obras públicas e saneamento”.

A unidade móbil, materializada nunha autocaravana, visitará cada parroquia unha vez ao mes, facilitando o acceso aos servizos municipais dunha maneira máis próxima e directa. Ademais, este servizo único permitirá aos cidadáns rexistrar entradas e saídas de documentos, realizar consultas e recibir asesoramento directamente nos seus barrios, sen necesidade de desprazarse á casa consistorial, no centro urbano. “Con esta iniciativa tratamos de facilitar, sobre todo ás persoas maiores, o acceso aos servicios municipais sen necesidade de desprazamentos”

Como parte deste esforzo por mellorar a comunicación e a transparencia, o propio alcalde, xunto con funcionarios habilitados, estará dispoñible para citas na autocaravana, ofrecendo un enfoque persoal e accesible á xestión municipal.

Coa posta en marcha desta iniciativa, “O Porriño establécese como un punto de encontro pioneiro na prestación de servizos municipais, demostrando un enfoque innovador e centrado no cidadán. Este proxecto non só busca mellorar a eficiencia dos servizos municipais, senón tamén fortalecer a conexión entre o Concello e a veciñanza”, conclúe Alejandro Lorenzo.

16/01/2024 in Parroquias

O Concello do Porriño adxudica por 67.000 euros o acondicionamento da Sala de exposicións Antonio Palacios

 

 

O Concello do Porriño vén de adxudicar a obra para o acondicionamento do local que albergará a Sala de Exposicións Antonio Palacios, un museo no que se mostrará, a través de diferentes materiais, a traxectoria profesional e tamén persoal do artista, algúns deles incluso inéditos e descoñecidos ata o día de hoxe.

Trátase dun baixo, cunha superficie de 107,88 metros cadrados, localizado na rúa que leva o nome do ilustre arquitecto, situado ao carón da nova aula de estudios, coa que estará unida pola parte interior e coa que compartirá servizos como os aseos.

Os traballos adxudicáronse nunha mesa de contratación celebrada esta mesma mañá por un importe de 66.988,64 euros. Os mesmos teñen un prazo de execución, segundo proxecto, de dous meses. Con todo, dende hoxe establécense 20 días para a formalización do contrato máis un mes máis de marxe para que a empresa comece coa obra. Deste xeito, prevese que para o mes de maio o Porriño inaugure esta sala museística en honra ao seu ilustre veciño Antonio Palacios, do cal este ano se conmemora o 150 aniversario do seu nacemento.

Precisamente, a apertura desta mostra permanente é unha das moitas actividades e actos que encherán a axenda cultural porriñesa neste 2024, no que tamén se cumpren 100 anos da construción da Casa Consistorial, a obra máis representativa das deseñadas por Antonio Palacios na súa vila natal. Outra das iniciativas, como reclamo turístico e cultural, será a Ruta Palacios.

“Teremos unha ampla programación ao longo de todo o ano para poñer en valor a figura de Palacios”, remarca o alcalde Alejandro Lorenzo. “Antonio Palacios é un absoluto referente na vila e queremos poñer en valor o seu legado, especialmente o que deixou no Porriño. Neste 2024, Palacios estará, se cabe, máis presente no Porriño”, subliña.

A Sala de Exposicións Antonio Palacios albergará unha mostra permanente con todos os textos, debuxos, planos, maquetas  e documentos que se gardan del. “Temos moito material orixinal de gran valor, un verdadeiro tesouro cultural que queremos dar a coñecer a toda a veciñanza e facelo público a todo o mundo”, explica o alcalde.

Honra floral e calendario

Foi un 8 de xaneiro, do ano 1874, cando naceu Antonio Palacios. Precisamente, o pasado luns, o alcalde Alejandro Lorenzo achegouse ao cemiterio para deixar na sepultura onde foi soterrado un ramo de flores en nome de toda a veciñanza do Porriño como xesto de homenaxe a un dos veciños máis ilustres.

O deseño do calendario municipal deste ano está dedicado integramente á figura deste artista, con imaxes de arquivo e actuais a través das cales se observa o transcorrer do tempo, “perdurando sempre a esencia, o patrimonio cultural e arquitectónico, ese gran legado que Palacios deixou na vila e que agora atesouramos todos”. Un almanaque pensado para repartir entre todos os porriñeses e que, así, “todos sexamos partícipes desta herdanza e reservemos un recuncho dos nosos fogares para expoñela”. Deste xeito, aquelas persoas interesadas en ter un exemplar do calendario poden recollelo no centro cultural ou no Concello.

 

11/01/2024 in Cultura e festas

Melchor, Gaspar e Baltasar chegan hoxe ao Porriño

 

As Súas Maxestades de Oriente chegan con antelación a Porriño. Así, ademais da tradicional cabalgata na véspera do día de Reis polas rúas da vila, Melchor, Gaspar e Baltasar farán esta tarde un percorrido por tódalas parroquias, iniciándose ás 16.00 horas en Budiño e rematando ás 20.00 horas en Torneiros.

A xornada máis esperada será mañá venres, 5 de xaneiro. O desfile dará comezo ás 17.30 horas dende a rúa Doantes de Sangue. A comitiva irá encabezada pola Rondalla Santa Eulalia de Atios, á que seguirán un total de seis carrozas nas que irán os Reis Magos, acompañados dun gran séquito formado polos seus paxes e personaxes de animación infantil, tamén estará o tren de Nadal e pechará a Rondalla de Pontellas. O desfile percorrerá as rúa Antonio Palacios, para continuar por Domingo Bueno ata San Sebastián, e dende alí San Bieito, Manuel Rodríguez e Ramón González (zona peonil) para rematar no Parque do Cristo.

A recepción a todos os nenos farase no interior da Casa do Concello. Melchor, Gaspar e Baltasar estarán na primeira planta, como estivera xa Papá Noel, onde recibirán á cativada para entregarlles caramelos e un pequeno detalle e escoitar os seus desexos para a noite máis máxica do ano.

04/01/2024 in Cultura e festas

O Concello do Porriño celebra unha Carrera de Reis

 

O Concello do Porriño porá o broche de ouro á programación de Nadal o vindeiro domingo, día 7 de xaneiro, con deporte e música. Pola tarde terá lugar o tradicional encontro de Rondallas, pero a actividade comezará xa de mañá coa celebración da Carreira de Reis.

Será ás 11.00 horas polas rúas da vila e con saída dende a Praza Arquitecto Antonio Palacios. Terá un percorrido moi accesible, urbano, de tan só catro quilómetros (dúas voltas a un circuíto de dous quilómetros ) e está aberta a todas as idades.

As persoas interesadas en participar aínda están a tempo de facelo inscribíndose, antes de mañá, xoves días 4, ás 23.30 horas, a través da páxina web ecultura.net. Con todo, o propio día tamén se aceptarán inscricións, de 09.00 a 10.00 horas, nas inmediacións da zona de saída, no mesmo lugar onde se deben recoller os dorsais (de 09.30 a 10.45 horas).

O alcalde do Porriño Alejandro Lorenzo anima á participación de toda a veciñanza, así como de todas aquelas persoas de fóra que o desexen. “Despois de nadal, fin de ano e reis… despois de tanto comer e cear, presentamos unha proposta deportiva para rematar estas festas, o día 7 de xaneiro. Corramos todos xuntos na Carreira de Reis do Porriño o vindeiro domingo”

O evento ten tamén carácter solidario, xa que cada corredor depositará unha unidade de produtos ou alimentos para bebés ou pasta, os cales serán distribuídos entre as familias do Concello con menos recursos.

04/01/2024 in Deportes

Mercar no Porriño ten premio de Reis

 

O Concello do Porriño comeza o ano cun sorteo entre os clientes do comercio local, da praza de bastas e da hostalería do municipio.

Ao longo destas festas, todos os establecementos están a repartir boletos cos tíckets de compra, os cales deben ser cubertos e depositados nas urnas instaladas para tal fin no Concello e na praza de abastos ou tamén se poden entregar no propio establecemento.

O sorteo celebrarase na véspera de Reis, o venres 5 de xaneiro, e del sairán os cinco boletos premiados con cadansúa cesta de produtos. O Concello repartiu máis de 6.000 boletos entre todos os establecementos para que os entregasen aos seus clientes trala compra.

“Trátase dunha nova iniciativa de impulso do comercio de proximidade e da hostalería local, a primeira doutras moitas que chegarán ao longo deste 2024 co fin de apoiar os establecementos porriñeses, incentivando entre a veciñanza o consumo e as compras na propia vila”, sinala o alcalde Alejandro Lorenzo.

04/01/2024 in Urbanismo, comercio e industria

O Concello do Porriño habilita un autobús para contemplar a iluminación de nadal

 

O Concello do Porriño pon en marcha este Nadal unha nova iniciativa pensada no sector da poboación máis maior. Trátase dun autobús que percorrerá a vila para que as persoas de 65 anos en adiante poidan contemplar a iluminación e decoración de Nadal dun xeito máis cómodo e confortable.

Será a vindeira semana, o martes, mércores e xoves, establecéndose diversas saídas dende as diferentes parroquias, ás 17.00 horas, e con regreso ás 20.00 horas. Dende Budiño e Atios será o 2 de xaneiro, dende Chenlo, Mosende e Pontellas o día 3 e dende Cans, Carracido e Torneiros o día 4.

Ademais, xusto nesas xornadas é cando estará tamén operativo o tren turístico de Nadal, outra das novidades da programación e que neste caso está destinado a todos os públicos. Tamén os maiores de 65 poderán montar nel antes e rematar a ruta cun chocolate quente.

29/12/2023 in Cultura e festas

A Policía Local informa de cortes de tráfico no centro urbano

 

A Policía Local do Porriño informa de cortes de tráfico no centro urbano. Estas terán lugar o día de hoxe desde as 15:30 h ata as 20:00 h dende o número 1 da Rúa Domingo Bueno ata a intersección coa Rúa Pío XII para a montaxe da carpa da festa de pre fin de ano. O mesmo tramo cortarase novamente ao tráfico desde as 9:00 h do Sábado 30 ata as 6:00 h do Domingo 31.

29/12/2023 in Tráfico