O Concello informa dun corte na rede de abastecemento de auga situada nas rúas Antonio Palacios, Codesal, Pinar, Cruceiro e Pérez Leirós para realizar a reparación dunha avería. O servizo verase interrompido dende as 10.00 h. ata a primeira hora da tarde.
Chegan as Festas do Cristo e con elas unha nova edición do Concurso de Novos Talentos Musicais Val da Louriña, Tes talento?.
A concellería de Cultura e Festexos fixo públicas hoxe as bases que rexen a participación deste certame dirixido a artistas afeccionados. Como cada ano a participación quedará fixada nunha preselección (pechada ao público) o día 15 de setembro (infantís e adultos/as) no auditorio do Centro Cultural Municipal .
Os adultos terán unha semifinal, celebrarase o 22 de setembro, na praza Arquitecto Antonio Palacios e a final de infantil e de adultos será o día 1 de outubro ás 17 h na praza Arquitecto Antonio Palacios.
Poderán participar neste concurso todas aquelas persoas que o desexen, con límite de idade de 15 anos na modalidade infantil e de 16 en diante na de adultos. Poderán presentarse tamén grupos ata un máximo de catro componentes nas dúas modalidades.
O prazo de inscrición abrirase mañá, mércores 6 de setembro, e rematará o 14 de setembro, en horario de luns a venres de 9 a 14 h, nas dependencias do Rexistro do Concello do Porriño.
Podedes descargar as bases e os impresos de solicitude na seguinte ligazón:
BASES DO CONCURSO NOVOS TALENTOS MUSICAIS VAL DA LOURIÑA 2023
SOLICITUDE DE INSCRICIÓN PARA O CONCURSO NOVOS TALENTOS MUSICAIS VAL DA LOURIÑA 2023 – TES TALENTO?
AUTORIZACIÓN PARA A PARTICIPACIÓN DE MENORES NO CONCURSO NOVOS TALENTOS MUSICAIS VAL DA LOURIÑA 2023
Un ano máis, e xa van dezaseis, o velódromo municipal do Porriño acollerá a Dirt Track Xacob Agra. Como cada ano, o motoclub Papaya en colaboración co Concello do Porriño, organiza esta carreira noturna que reunirá no óvalo porriñés a pilotos chegados de toda a xeografía galega e tamén do país veciño.
O alcalde, Alejandro Lorenzo, e o concelleiro de Deporte, Abel Estévez, xunto a Xoaquín Agra, presidente do motoclub Papaya, e o piloto porriñés Xacob Agra, presentaron esta mañá o evento.
“Como cada ano por estas datas poderemos disfrutar deste espectáculo deportivo, unha cita marcada na axenda de todos os amantes do motor que cada edición conta cunha enorme participación e implicación do público”, apuntou o alcalde, Alejandro Lorenzo, que quixo agradecer ao Motoclub Papaya o “gran nivel organizativo que demostran cada ano, que fixo posible consolidar este evento deportivo de referencia en toda Galicia”.
A proba desenvolverase como cada ano en eliminatorias por grupos (clasificatorias, repescas, semifinais e finais). Prevese que disputen a proba preto de 40 pilotos, 20 en adultos e outros na modalidade infantil que será exhibición, chegados de toda a xeografía galega e tamén do país veciño. Cabe destacar que nesta edición debutará nesta disciplina o piloto local Jose Calvar.
As Festas do Cristo regresan este ano ao Porriño con máis dun cento de actividades para todos os públicos e gustos. Propostas deportivas, espectáculos, animación de rúa, monólogos, verbenas, concertos e moitas sorpresas conforman a programación que xa deu comezo esta fin de semana e que se prolongará ata o domingo 1 de outubro coa tradicional cita gastronómica dos callos, que este ano chega á súa trixésimo edición.
O alcalde, Alejandro Lorenzo, e o concelleiro de Cultura e Festexos, Bienvenido Estévez, presentaron hoxe o cartel das festas acompañados por unha representación da hostalería porriñesa e polos pregoeiros deste ano: o elenco de Teatro Fontevella.
“As nosas festas son unha seña de identidade, cultura e tradición e ninguén mellor que os actores e actrices de Fontevella para representar estes valores”, apuntou o alcalde, “Para O Porriño será unha verdadeira honra velos no balcón da Concello dando o pistoletazo de saída aos nosos días grandes”.
O rexedor quixo facer unha mención especial a Amparo Tellado, que a piques de cumprir os 94 anos será a encargada de dirixir o pregón. “Amparo é a actriz galega de maior idade e ten un talento que non deixa a ninguén indiferente”, engadiu Lorenzo, “Estou seguro que co seu pregón nos cautivará a todos como o fai cada vez que se sube ao escenario”.
Xunto a Amparo, estarán os seus compañeiros e compañeiras da compañía: Adriano, Balbina, Susana, José, Enrique, Daniel, Lola, Valentina, Andrés e Chelo Pampillón, a directora do grupo.
“É para nós unha honra ser os pregoeiros das Festas do Cristo”, manifestou Pampillón, “A ver se o balcón do Concello aguanta, porque ese día ten que soster os máis de 500 anos que sumamos de recordos, historia e moitas Festas do Cristo vividas”.
Cabe destacar que o pregón, á vez que recoñece a traxectoria deste grupo, será tamén unha celebración do aniversario xa que foi nas Festas do Cristo, hai xa 28 anos, cando subiron por primeira vez a un escenario con Castelao e a obra “Os vellos non deben namorarse”.
30 días festexando O Porriño
A programación arrancou xa na Vila do Louro e estenderase durante todo o mes de setembro. Como cada ano, a música e o deporte terán un papel protagonista, ao igual que as actividades infantís.
Panorama , El Combo Dominicano, Grupo América, Girls Gang, Os CoriBantes e moitos máis poñerán a banda sonora a estas festas, sen esquecernos do Louro Valley Festival, cuxo cartel será presentado nos vindeiros días, o Negrita Music Festival, que traerá ao Porriño a Melendi, Rels B e Cali & el Dandee, entre outros, e o Montando Cristo Festival, que reunirá a Buxa, Hard Trip Castro e Los Escoltas/ The Brooke.
Regresa tamén outro dos clásicos, o certame musical Tes Talento, e tamén o fai a Batalla de Galos. O deporte, da man dos clubs deportivos do municipio, xogará de novo un papel fundamental nestas festas.
O broche final, como cada ano, o poñerá a Festa dos Callos que chega xa á súa 30 edición e o fará por todo o alto.
“Agardo que estas Festas do Cristo sexan do agrado dos vecinos e veciñas e de todas aquelas persoas que queiran visitarnos”, concluíu o rexedor que quixo trasladar o seu “agradecemento á hostalería e comercio local, asociacións e clubs deportivos do Porriño que nos axudan a dar forma a estes días para que todos podamos disfrútalos xuntos e seguir facendo do noso pobo un lugar de referencia”.
O Concello de Porriño abrirá no mes de outubro a nova aula de estudio, na rúa Antonio Palacios. Os traballos de acondicionamento deste baixo, de 207,65 metros cadrados, próximo á casa consistorial, en pleno casco urbano, deron comezo esta mesma semana e prevense que estean finalizados no prazo dun mes, así o confirmou o alcalde, Alejandro Lorenzo, nunha visita na que comprobou o estado da obra.
O orzamento destinado a esta actuación é de 139.830 euros. O local está actualmente lóbrego, polo que a empresa concesionaria ten que realizar unha serie de obras de adaptación que consistirán na formación das divisións do local interior para dispoñer dunha zona de local multiusos e dous aseos, con todo o que elo supón: pavimentos, albanelaría, carpintería, illamento, pintura…. Ademais deberán executar traballos na fachada, así como as instalacións de fontanería, saneamento, ventilación, climatización e electricidade.
O alcalde explica que “unha vez aberta a aula, instalarase un sistema de acceso libre e gratuíto, controlado mediante tarxeta con porta automatizada. Estará aberta ao público todos os días da semana, en horario de mañá e tarde, e con reforzo en época de exames”.
Recuperación das instalacións da Escola de Música
A actuación beneficiará tamén á Escola Municipal de Música, que volverá ás que foron sempre as súas instalación no centro cívico, na Avenida Domingo Bueno.
Fai tres anos que, por decisión do anterior goberno, todo o alumnado da escola reubicouse en aulas do multiusos de Torneiros, “o lugar menos apropiado para impartir ensinanzas con prácticas musicais, pois o edificio está destinado a accións formativas e de emprego, e o son dos diferentes instrumentos non é compatible coa actividade que alí se realiza, sendo unha molestia para o desenvolvemento dos cursos que se realizan”, explica Lorenzo. Ademais, “estiveron soportando humidades e filtracións de auga sen dar solución algunha ata a chegada do actual goberno, que tramitou con urxencia a súa reparación, que foi efectiva este ano 2023, ao mesmo tempo que se realizarán máis homologacións de aulas para ser destinadas a diversos cursos formativos e viveiro de empresa”.
Dada a situación, “consideramos unha prioridade sacar a Escola de Música do multiusos de Torneiros e que volvera a onde sempre estivo, no centro cívico de Porriño, sacando así o máximo partido a ambas instalacións”.
Consecuentemente, a aula de estudio localizada no centro cívico debía trasladarse a outro lugar, de aí a idea de habilitar este novo espazo. “Un servizo que mantemos e melloramos, trasladándoo agora a este novo local, con dobre acceso, un dende o número 8 da rúa Antonio Palacios e outro dende a zona axardinada traseira, que pasará a formar parte do gran parque e zona verde que unirá as rúas Pío XII e Antonio Palacios”, sinala o alcalde.
Mañá o protagonista será o ciclismo e o domingo o atletismo. E é que en Porriño non deixan de celebrarse eventos deportivos, máis aínda chegadas estas datas previas ás xornadas festivas do Cristo. “É un orgullo ser o Concello do Deporte, un distintivo conseguido grazas ao labor, traballo e esforzo continuo de todos os clubs do municipio, que se implican na promoción do deporte de base e na organización e posta en marcha de distintas competicións e probas ao longo de todo o ano como son A Nocturna, que ten lugar mañá e a Milla Porriñesa o domingo”, sinala o alcalde Alejandro Lorenzo asegurando que dende o goberno local “seguiremos apoiando o deporte, un dos alicerces da nosa vila”.
Este domingo, 3 de setembro, dende ás 10.00 horas, con saída e meta a Praza Arquitecto Antonio Palacios, terá lugar a tradicional Milla Porriñesa que chega a súa undécima edición. Organizada polo Concello en colaboración co Club Atletismo Porriño a proba ten aberta aínda ata a medianoite de mañá sábado a inscrición, de balde, a través da web www.atletismopor.com
Poderán participar atletas federados e non federados, habendo unha soa clasificación conxunta. A proba é aberta a diferentes categorías, os pequenos de 2 a 4 e de 5 a 7 anos correrán 100 metros, os de 8 a 10 anos 400 e os de 11 a 14 anos 800 metros. A carreira absoluta comezará ás 11.00 horas na que competirán, por categorías, de 15 a 35 anos, de 35 ata 50 e maiores de 50, nunha distancia de 1.609 metros, o que equivale a unha milla.
Premios e trofeos
Tódolos participantes recibirán unha medalla conmemorativa da proba ao entrar na meta. A entrega de trofeos realizarase no podio de vencedores o mesmo día na Praza Antonio Palacios, haberá trofeo para os tres primeiros de cada categoría e sexo.
Un total de 372 ciclistas tomarán mañá sábado as rúas do casco urbano de Porriño na tradicional Nocturna que se celebra cada ano no mes de setembro. O Club Máster da Louriña organiza esta proba na que teñen cabida tódalas categorías Elite Sub-23 masculino e feminino e que neste 2023 bate récord de participación.
“Celebramos un novo acontecemento deportivo na vila, un clásico que reúne a centos de persoas amantes e afeccionados do ciclismo. Dende o Concello do Porrriño, como entidade colaboradora, agradecemos o labor do Club Máster da Louriña na organización desta proba coa que se podería dicir que damos o pistoletazo de saída ao mes máis festivo do municipio”, sinala o alcalde Alejandro Lorenzo.
Restricións ao tráfico
A hora establecida para a saída dos primeiros participantes é ás 17.00 horas, prolongándose ata preto da medianoite.
Con tal motivo, dende a Policía Local informan dunha serie de restricións ao tráfico rodado. Concretamente, queda prohibido estacionar e aparcar a partir das 14.30 horas e non estará permitido o tráfico rodado dende as 16.45 ata ás 23.30 horas polas rúas Pío XII, Ramón González, Manuel Rodríguez (dende o número 1 ata rúa Xogo da Ola), Xogo da Ola, Leandro Diz (dende intersección rúa Xogo da Ola ata rúa Cando), Cando, Peña e nos estacionamentos da praza de abastos.
Comeza un novo mes e con el faino tamén o curso na piscina municipal do Porriño. As instalacións retoman hoxe a actividade no seu horario habitual. Os luns e mércores de 07.00 a 22.00 horas, os martes e xoves de 07.00 a 22.15 horas, os venres de 07.00 a 14.00 e de 17.00 a 20.30 horas e o domingo de 10.00 a 14.00 horas.
Do mesmo xeito, inícianse tamén os cursos de natación, infantís, para bebés e de adultos; ximnasia de mantemento e aquagym para as persoas que xa tiñan reservada a praza, permanecendo aínda aberto o prazo de inscrición tanto para as actividades como tamén para facerse socio.
O alcalde Alejandro Lorenzo vén de visitar precisamente esta mañá as instalacións ás que acoden diariamente, de luns a domingo, numerosas persoas. “É primordial ofertar este tipo de servicios e de cursos dirixidos por un monitor. Dende o Concello traballamos a diario en mantelos e melloralos en favor da veciñanza, promovendo a práctica deportiva entre pequenos e maiores”.
O Concello do Porriño vén de publicar as bases para a instalación de postos e atraccións nas Festas do Cristo 2023.
A solicitude de preinscripción pode descargarse na seguinte ligazón:
Tamén pode recollerse no Concello do Porriño ata o 14 de setembro, en horario de 9 a 14h. Toda a documentación requerida nas bases será entregada no Rexistro do Concello ou a través da sede electrónica ata o 14 de setembro.
BASES INSTALACIÓN POSTOS E ATRACCIÓNS FESTAS DO CRISTO 2022: