Novas

O comercio do Porriño aposta un ano máis polas ofertas e promocións para dar o pistoletazo de saída á campaña de compras de Nadal.

Co fin de dinamizar o comercio e incentivar as ventas, ACIPOR Cca Morea , en colaboración co Concello do Porriño e a Xunta de Galicia, celebran este venres o Black Friday con descontos, sorteos e comercios abertos ata as 22 h.

Haberá tamén moitas actividades para que a xornada de compras sexa máis divertida. De 17 a 18 h haberá un pintacaras para os cativos e cativas na rúa peonil e ás 18 h comezará a Búsqueda do Tesouro polos comercios. Os nenos e nenas que queiran participar terán toda a información e a primeira pista no posto do pintacaras. Ás 19:30 tamén haberá un obradoiro infantil gratuíto en Hypatia Porriño.

Pero iso non é todo, mercar no Black Friday do Porriño tamén pode ter premio: sorteareanse cinco tarxetas regalo de 100 euros E a partir das 21:30 h, música na praza Arquitecto Antonio Palacios.

Asociación Española Contra o Cancro do Porriño abriu hoxe as portas do seu tradicional mercadillo solidario de Nadal, en colaboración co Concello de Porriño, co ánimo de recadar fondos para a axudar aos enfermos de cancro e ás súas familias.

Pode visitarse no número 62 da rúa Ramón González, e estará aberto ata o 20 de decembro, de 10 a 13 h e de 17 a 20 h.

Poderedes atopar decoración de Nadal e tamén produtos doados polos comerciantes porriñeses. Anímate a visitalos e colaborar con esta nobre causa

O Grupo Godoy Maceira, con sede no Porriño e especializado en deseño, elaboración e transporte de obras en granito, será o Premio Honorífico desta edición dos premios anuais de Aje Vigo. Así llo avanzaron hoxe ao seu xerente, Fernando Godoy Maceira, o presidente da Asociación de Jóvenes Empresarios de Vigo, Iván Suárez, e o alcalde do Porriño, Alejandro Lorenzo.

O Grupo Godoy Maceira, constituído en 1979, é hoxe en día un referente nacional e internacional no seu sector. Entre os seus logros, destacan proxectos como a réplica e colocación do Templete de Antonio Palacios no metro de Madrid, reproducindo o deseño orixinal do arquitecto porriñés, a restauración da catedral de Santiago de Compostela ou a recente rehabilitación do Palacio da Oliva, en Vigo. A nivel internacional, participou na humanización de Trafalgar Square en Londres e en proxectos en Estados Unidos, entre outros.

Iván Suárez, presidente de AJE Vigo, destacou que con este recoñecemento “ponse en valor o esforzo e empeño dunha empresa familiar, pilotada xa pola súa segunda xeración, por situar a Galicia no mapa internacional co seu bo facer e profesionalidade, levando ademais a nosa cultura e tradición máis alá das nosas fronteiras”. Ademais, continúa Suárez, “no Porriño son moitas empresas as que merecen recoñecementos coma este, por iso eliximos este municipio para os nosos premios, pola súa importancia como motor económico e industrial da provincia de Pontevedra”.

Pola súa banda, o alcalde Alejandro Lorenzo apuntou que é un orgullo “que se elexira O Porriño para entregar estes premios e tamén que o premio honorífico sexa para unha das súas empresas, un merecidísimo recoñecemento á traxectoria de Godoy Maceira que leva o nome do noso pobo por todo o mundo”. Lorenzo engadiu que iniciativas como estes galardóns de AJE Vigo contribúen a “fomentar a cultura empresarial, apoiar e animar á mocidade a poñer en marcha os seus proxectos de emprendemento, algo que aplaudimos desde este Concello xa que nesa liña traballamos”.

Cumprir anos sempre é motivo de celebración, pero aínda o é máis se son máis de cen e ben cumpridos. É o caso de Bienvenida Lorenzo, a veciña máis lonxeva do Porriño, que xunto co alcalde do Porriño, Alejandro Lorenzo, e a súa familia soprou as velas do seu 101 aniversario.

Bienvenida naceu o 13 de novembro de 1922 no municipio veciño de Mos, pero aos 18 mudouse a O Porriño, onde seguiu vivindo ata hoxe xunto ao antigo campo da feira. Aquí formou a súa familia xunto ao seu marido, os seus catro fillos, catro netos e oito bisnetos.

Pese aos achaques propios da súa idade Bienvenida está perfecta de saúde e goza dunha lucidez e un sentido do humor encomiable, disfrutando das cousas cotiás con tranquilidade e a sabedoría de quen viviu máis dun século de experiencias.

“É unha honra ter a oportunidade, un ano máis, de escoitar a Bienvenida, trasmitirlle o meu cariño e empaparme tamén do seu”, apuntou Lorenzo, “Conversar con ela axúdate a crer na vida con máis forza”, As persoas maiores agradecen a vida, enténdena, cos seus momentos bos e coas súas dificultades, e sempre teñen a xenerosidade de ensinarnos para que non nos perdamos en trivialidades e vivamos. Hai que escoitalos”.

Alejandro e Bienvenida emprazáronse para o ano que vén, como non podía ser doutro xeito, para celebrar os 102, trato que asinaron cun sentido abrazo.