Novas

A Escola Municipal de Música abre o prazo de inscrición previa para

A Escola Municipal de Música do Porriño abriu o prazo de inscrición previa de novo alumnado para o curso 2023/24. Así, poderase solicitar praza ata o 19 de xullo de modo presencial, no Rexistro Xeral do Concello do Porriño, ou ben de modo telemático, a través da Sede Electrónica. A folla de solicitude, que se debe entregar cuberta, pode descargarse da web municipal ou ben recollela no Centro Cultural, de 9 a 14 h.

Cabe destacar que a orde de entrega da inscrición será determinante na orde de matrícula e que a matrícula definitiva formalizarase no mes de setembro, despois da publicación das listas das persoas admitidas.

A oferta da Escola Municipal de Música do Porriño é ampla, incluíndo música e movemento para nenas e nenos dende os 4 anos, linguaxe musical para todas as idades e as especialidades de violín, viola, violonchelo, percusión, guitarra, piano, canto, gaita, clarinete, frauta traveseira, saxofón, oboe, fagot, trompa, trompeta, bombardino, trombón, tuba e percusión tradicional.

Tamén conta con agrupacións como a coral infantil, a coral polifónica, o grupo de música tradicional, a orquestra de corda e a banda.

05/07/2023 in Alcaldía, Deportes

O Porriño propón un verán de zumba e pilates

O deporte volverá ocupar este verán a praza Arquitecto Antonio Palacios. Co fin de promover a actividade física e dar unha alternativa de ocio saudable á veciñanza, profesionais cualificados impartirán clases de Zumba e Pilates para quen queira gozar do fresquiño da última hora dos días de verán facendo deporte.

Esta actividade forma parte da oferta de ocio do Concello e desenvolverase de forma gratuíta, aberta e sen necesidade de inscrición previa.

As clases de pilates impartiranse todos os mércores de xullo e agosto, de 21h a 22h, e as de zumba os martes e xoves, tamén de 21 a 22h.

05/07/2023 in Alcaldía, Cultura e festas, Deportes

Castrexos, galos, exipcios e romanos volven tomar O Porriño

Galos, castrexos, romanos, exipcios e gregos tomarán un ano máis O Porriño para disputar os Xogos Olímpicos nos que cada verán se miden estas civilizacións.

O alcalde, Alejandro Lorenzo, acompañado polos concelleiros Bienvenio Estévez e Antía Carrera, e representantes do tecido asociativo e comercial da vila, presentou hoxe a programación desta edición de Porrigalia. Unha edición que aúna deporte, música, gastronomía, espectáculos para todos os públicos e moitas actividades infantís.

“Esta fin de semana agardámosvos a todas e todos no Porriño, aseguramos diversión e bos momentos”, apuntou o alcalde que aproveitou para agradecer a implicación “de hostaleiros, comerciantes, ANPAS… e en xeral de toda a veciñanza do Porriño sen os cales sería imposible organizar un evento desta magnitude”.

 

La Frontera, Herdeiros da Crus e Dasoul súmanse á festa

Porrigalia chega este ano cunha banda sonora de luxo, encabezada por Herdeiros da Crus, La Frontera e Dasoul.

Os concertos pecharán cada xornada, comezando pola do venres. A partir das 22:30 h na rúa Domingo Bueno actuarán os Herdeiros da Crus e a continuación DJ Traffic House e Raper Vocal Live.

O sábado os djs Pitty, Samu Pexe, Keva, Mus e Xian animarán cada recuncho e praza do Porriño a partir das 19 h e ás 19:30 h, na praza Arquitecto Antonio Palacios, actuará o grupo local Generación M, de seguido o fará Beatriz Martínez  e ás 21:30 h, os Gin Tonic´s. Xa pola noite os concertos trasládanse á rúa Domingo Bueno, comezando La Frontera, seguido de Dasoul, María Lamuela Freitas, Dj Enter e Dj Moy.

O domingo, ás 19:30 h actuarán os King Kids  na praza do Cristo e ás 21 h A Banda da Balbina na praza Arquitecto Antonio Palacios.

Ademais haberá charangas, batucadas e animación musical durante toda a fin de semana.

 

Porrigalia Kids, unha proba para auténticos gladiadores

Como non podía ser doutra forma as nenas e nenos estarán moi presentes na programación con actividades pensadas por e para que disfruten ao máximo de Porrigalia. Unha delas a Porrigalia Kids que se celebrará o sábado ás 13h na praza do Concello e no parque do Cristo. A versión olímpica da reputada Gladiator Kids chega ao Porriño para que as pequenas e pequenos demostren que poden ser auténticos gladiadores. As nenas e nenos de 3 a 10 anos disfrutarán dun percorrido de obstáculos adaptado á súa idade para que poidan pasar un rato divertido acompañados dos seus pais ou familiares. A inscrición é gratuíta e pode formalizarse  ata o día 6 se de xuño na seguinte ligazón: https://www.deporticket.com/web-evento/8491-porrigalia-kids .

Ademais, o sábado ás 11h celebrarase un showcooking e obradoiro infantil no Mercado de Abastos.

 

Xogos olímpicos

O gran desfile olímpico abrirá o venres ás 21h as olimpiadas. Unha gran comitiva levará a chama olímpica dende o templete de San Luis a ata o Concello, onde o Rei Castrexo interpretado por Pepo Suevos a recibirá e procederase ao acendido.

A comitiva, formada por ANPAS e asociacións locais, volverá desfilar o sábado ás 12 h e chegará á praza do Concello para dar paso ao pregón a cargo do Rei Castrexo. Apartir das 20 h na rúa Domingo Bueno comezarán as Olimpiadas. Os xogos continuarán o domingo pola mañá, ás 11 h.

03/07/2023 in Alcaldía, Cultura e festas

“Música, mocidade e ocio saudable”, Master Class a cargo de DJ Pitty

As concellerías de Cultura e Xuventude, que dirixen Bienvenido Estévez e Antonio Barros respectivamente, celebrarán o vindeiro 22 de xullo unha DJ master class a cargo do afamado DJ porriñés Luis Guisande, coñecido artísticamente como DJ Pitty, quen abordará a sesión baixo o lema “Música, mocidade e ocio saudable”.

O prazo de inscrición para participar nesta actividade gratuíta permanece aberto do 3 ao 14 de xullo. A folla de inscrición pódese descargar da páxina web do Concello ou recoller no Centro Cultural Municipal de luns a venres en horario de 9 a 14h.

Unha vez cuberta, poderase entregar de calquera dos seguintes xeitos:

  • De modo presencial, no Rexistro Xeral do Concello do Porriño, de luns a venres, de 9 a 14 h.
  • De modo telemático, a través da Sede Electrónica do Concello do Porriño

A orde de entrega da solicitude será determinante na orde de inscrición.

A actividade, organizada pola OMIX do Concello do Porriño, segue a estela de programas destinados á poboación nova do municipio de entre 12 e 35 anos, que se veñen desenvolvendo ao longo do ano con actividades variadas. Os responsables municipais explicaron que dende o executivo local seguirán a apostar pola xuventude, ofrecéndolle alternativas de ocio e formación acordes aos seus gustos e necesidades, adaptándose sempre ao tempo no que vivimos.

Ser hábil, ter ganas de formarse e evolucionar constantemente son premisas fundamentais para poder garantir un lugar no mundo da música, e máis aínda no mundo disc-jóckey. Son as ideas que o recoñecido DJ Pitty, trata de transmitir a todo aquel que se interese por este ámbito.

Luis Guisande ensinaralles aos mozos e mozas o oficio de DJ a través dunha master class na que amosará, entre outras cousas, como elaborar unha sesión, dende a selección de cancións ata a realización dunha mestura. Este obradoiro combinará unha presentación teórica con exercicios prácticos, xunto coa experiencia do artista, para abrir as portas a toda aquela persoa que queira iniciarse no mundo DJ ou coñecer en profundidade os segredos que agocha.

DESCARGAR FORMULARIO INSCRICIÓN: https://oporrino.org/wp-content/uploads/2023/06/FORMULARIO-INSCRICION.-MASTER-CLASS.-DJ-PITTY_SNL.pdf

30/06/2023 in Cultura e festas, Mocidade

Publicadas as bases para instalación de postos de venta, tómbolas, atraccións e casetas en Porrigalia 23

A concellería de Festexos do Concello do Porriño vén de publicar as bases que establecen os requisitos, pautas e condicionantes que se deberán cumprir para instalar postos de venda, tómbolas casetas ou atraccións nas festas de Porrigalia 2023 que se celebrarán os días 7, 8 e 9 de xullo.

Podedes descargar as bases e os formularios de solicitude na seguinte ligazón: https://oporrino.org/wp-content/uploads/2023/06/Postos-de-venda-Porrigalia.pdf

29/06/2023 in Cultura e festas

Uxía Lorenzo gaña o concurso de debuxo do Consorcio do Louro no Porriño

Uxía Lorenzo Alonso, do CPR Hermanos Quiroga resultou gañadora no Porriño do concurso de debuxo infantil convocado polo Consorcio de Augas do Louro. Ao igual os outros tres gañadores (Sofía Campos en Mos, Arantxa Díaz en Salceda de Caselas e Eduardo Ríos en Tui) recibiu como premio unha tablet, que lle foi entregada polo presidente do Consorcio e alcalde do Porriño, Alejandro Lorenzo , a alcaldesa de Salceda, Loli Castiñeira, o rexedor tudense, Enrique Cabaleiro e o tenente de alcalde de Mos, Camilo Grandal, nun acto celebrado onte nas instalacións da EDAR de Guillarei, no cal agradeceron á cativada a súa participación neste concurso e o seu compromiso coa auga, o medio ambiente e o coidado do planeta.
 
Son amigos, aman a natureza e teñen unha misión: protexer a auga e mellorar o mundo. Eles son os integrantes da Cuadrilla Sostible, os personaxes da historia na que se sustenta este certame baixo o título “QUAL e ODS6, Acuaventura coa cuadrilla sostible”. Ademais dun gañador por cada municipio, establecéronse dous finalistas cuxo premio consistiu nun reloxo dixital. As agraciadas no Porriño foron Uxía Romo Otero e Carolina Estévez Rodríguez do CPR Hermanos Quiroga.
 
Nesta sexta edición recibíronse un total de 274 debuxos, procedentes de 16 colexios dos catro concellos que integran o Consorcio, no que debía quedar reflexado o coidado da auga e do medio para acadar os Obxectivos de Desenvolvemento Sostible.
 
“Trátase dun xeito lúdico de concienciar á cativada no uso responsable da auga, dándolle a coñecer a importancia que este recurso ten nas nosas vidas e as claves para protexer a biodiversidade”, explica o presidente do Consorcio. Así, ao longo desta aventura danse exemplos de reciclar, de non malgastar a auga, de usar menos plásticos, non estragar a comida, de que cousas non se deben tirar no inodoro…todo dun xeito didáctico e divertido da man duns personaxes animados que , ao final da historia, invitan a poñer en práctica todos os bos consellos aprendidos.
 
Os debuxos gañadores e finalistas, os cales están colgados e se poden ver na páxina web do Consorcio (consorciodolouro.es), protagonizarán o calendario que a entidade edite para o 2024, ilustrando cada un dos meses do ano.
29/06/2023 in Alcaldía, Infraestruturas, Medio Ambiente

Charlot Bennet convértese na primeira “Drag Queen do Porriño Orgulloso”

 
O Porriño celebrou onte o día do Porriño Orgulloso co seu primeiro certame de Drag Queen e o espectáculo de Drag Star, “Soy lo que soy”.
 
Nunha praza ateigada a porriñesa Charlot Bennet coronouse como Drag Queen do Porriño Orgulloso 2023 coa súa fantasía “Yea queso”, cunha alegoría no seu vestiario a un traxe de boda. Detrás de Charlot está Adrián Rodríguez que se impuxo pola súa presencia sobre o escenario, a súa valentía e a forza que transmitía o seu show.
 
O segundo premio foi para Electra-Tra (Samuel Fernández) coa súa fantasía “Y punch” e o terceiro para Ketty Pinn (Aitor Martínez) con “Prepárese que llegó la reina”. Os recoñecementos están dotado cun premio económico de 500 euros para a gañadora e 300 e 200 euros para a segunda e terceira clasificada.
En total foron seis as propostas que pisaron o escenario, con Kim Miller (Santiago Fernández), Marlen (Oliver Soto) e Conchita y sus almejas (Fátima Armada) completando a lista de participantes.
 
Unha vez rematado o certame deu comezo o espectáculo de Drag Star, “Soy lo que soy”. Unha vez máis, o porriñés David Bugarín puxo en pé a praza co show.
 
O alcalde, Alejandro Lorenzo, quixo lanzar unha mensaxe de respecto e liberdade no día do Orgullo LGTBI+, “vivamos e amemos en liberdade e nunca, nunca, renunciemos a ser quen somos. Oxalá pronto non teñamos que seguir reivindicando algo tan esencial como o respecto”.
29/06/2023 in Alcaldía, Cultura e festas, Igualdade

Arranca no Porriño o verán máis divertido

O vindeiro 3 de xullo dará comezo a primeira quenda do Campamento de Verán do Porriño e como ben sendo costume desenvolverase en instalacións municipais.

O lugar de entrega e recollida dos e das participantes será na porta principal do pavillón municipal do Porriño no horario indicado nas bases, de 8:45 h a 14 h.

Os rapaces e rapazas deberán levar ropa cómoda, unha viseira, protección solar, calzado cómodo e outro de reposto para poder utilizar, no seu caso, as pistas do pavillón, unha mochila co calzado de reposto, merenda e auga.

No caso de precisar algunha vestimenta diferente, como pode ser a equipaxe propia da piscina, serán os monitores e monitoras as persoas encargadas de comunicalo.

Recordade que as únicas persoas autorizadas para entregar e recoller aos pequenos do Campamento serán as que instaron a solicitude. No caso de ser outra persoa quen se encargue, esta deberá ser maior de idade e levar xunto aos monitores e monitoras a autorización correspondente, asinada con copia dos DNI da persoa autorizante e autorizada

28/06/2023 in Alcaldía, Igualdade

O Concello do Porriño duplicará a axuda anual a ACEESCA

O Concello do Porriño duplicará no 2024 a súa axuda anual á Asociación de Apoio a Persoas con Diversidade Intelectual ACEESCA. Así o anunciou hoxe o alcalde, Alejandro Lorenzo, no acto de presentación do proxecto da Escola Profesional Aceesca que se celebrou nas súas instalacións no polígono industrial de As Gándaras.
 
Así, a achega municipal a esta entidade social pasará de 10.000 euros anuais a 20.000, para facilitar o labor social que desempeñan no Porriño e en moitos concellos da contorna dende hai xa catro décadas.
“O traballo que realizan é imprescindible e permite que as veciñas e veciños do Porriño teñan a oportunidade de avanzar cara a plena inclusión”, destacou o rexedor, “Por iso contarán sempre co respaldo do Concello no que precisen. Asegurar que se cumpran os dereitos das persoas con diversidade é tamén unha aposta de futuro, xa que todas e todos somos membros activos desta sociedade”.
 
A primeira escola profesional adaptada de Galicia está no Porriño: ESCOLA PROFESIONAL ACEESCA
 
Lorenzo puxo en valor a importancia do proxecto da Escola Profesional que hoxe se presentaba ao tecido empresarial do Porriño salientou que “permitirá romper moitas barreiras que separan ás persoas con diversidade do seu dereito a traballar”.
 
Cabe destacar neste sentido que a Formación Dual Adaptada, que se impartirá nestas instalacións, é a fórmula máis acaída para capacitar ás persoas con discapacidade para o seu acceso ao mercado e así o demostra a experiencia colleitada por Aceesca dende a posta en marcha do seu proxecto piloto en 2019.
Os alumnos/as combinan dende o primeiro día formación no posto de traballo cun contrato remunerado a media xornada, baseado na metodoloxía aprender-facendo.
 
Aceesca conta dende o ano 2006 cun centro especial de emprego, Aceesca Emprego, e agora preséntase a nova marca do mesmo, LUME, cuxas principais actividades productivas son a Xardinería e a Limpeza e que na actualidade da traballo a 60 persoas.
 
Ante a imposibilidade de espacio para levar a cabo a variedade de especialidades formativas que require o mercado laboral, o Concello do Porriño cedeu un terreo no polígono de As Gándaras de 9000 m2 para a construción da Escola Profesional Aceesca. As instalacións contan cunha superficie construída aproximada de 3.000 m2, ademais da zona destinada á agrocompostaxe.
 
A primeira fase estará finalizada a mediados de 2024, podendo trasladarse xa a actividade actual, e quedando tan só pendente a zona de Restauración para unha segunda fase. O obxectivo é que estea finalizado a principios do 2025.
28/06/2023 in Alcaldía, Benestar, Emprego e formación

Profesionais da AEMET imparten un curso sobre o cambio climático na Aula UNED do Porriño

A aula UNED do Porriño acolle este verán o curso de extensión universitaria “Efectos do cambio climático en España e a problemática da súa comunicación”, impartido por profesionais da AEMET. A formación desenvolverase do 5 ao 7 de xullo e contempla un total de 20 horas lectivas (1 crédito ECTS).

Nos últimos anos os efectos do cambio climático fixéronse cada vez máis notorios, cun incremento dos fenómenos meteorolóxicos extremos. Trátase dun cambio rápido das condicións climáticas que se deixa sentir nos ciclos biolóxicos dos seres vivos, na saúde das persoas e nos nosos mares, fonte indispensable de recursos. Por todo isto, é necesario concienciar á poboación de que supón o cambio climático para o noso país, ubicado nunha das zonas máis vulnerables aos cambios de todo o planeta, e que podemos esperar nas próximas décadas.

Neste curso analizaranse todas estas cuestións e abordarase a problemática da súa comunicación.

A actividade permite ao estudante participar con asistencia presencial o asistencia online en directo ou diferido, sen necesidade de ir ao centro. A inscrición pode formalizarse a través da web da UNED.

26/06/2023 in Educación e tecnoloxía