Novas

O paro baixou no Porriño en decembro por noveno mes no ano 2017 e a finais de ano traballaban 521 persoas máis que cando o actual Goberno local empezara a súa xestión

O paro descendeu por cuarto mes consecutivo no Porriño e a finais do pasado mes de decembro había na vila 1.618 persoas desempregadas, un dato que non se coñecía dende hai unha década.

Segundo os datos publicados este mércores polo Ministerio de Emprego e Seguridade Social e a Consellería de Economía, Emprego e Industria da Xunta de Galicia, a taxa de desemprego situouse no Porriño no 17,4%, en total 5,6 puntos menos que no inicio da xestión do actual Goberno Local cando 2.139 porriñeses estaban na procura dun posto de traballo, 521 máis que na actualidade.

En relación co mes de decembro de 2016, o número de veciñas e veciños anotadas coma demandantes na oficina do Servizo Galego de Emprego do Porriño baixou de 1.844 a 1.618, o que supón que hai 226 traballadoras e traballadores máis no concello: en so un ano o paro caeu en máis de 2,5 puntos.

A alcaldesa, Eva García de la Torre subliña a importancia das medidas que se están a tomar dende a Concellería de Emprego, que dirixe Soledad Girón,entre elas o programa ‘Porriño Accede’, baseado en convenios asinados entre o Concello e empresas da vila, grazas ao cal hai ducias de veciñas e veciños que volveron ao mercado laboral ou empezaron a traballar.

Tamén están a facilitar o descenso do paro os ‘Plans de Emprego’, posibles grazas ao investimento de máis de 600.000€ de fondos municipais, e os acordos con outras administracións, obtendo axudas e subvencións que tiveron coma destino accións que serviron para incrementar as probabilidades de empregabilidade das veciñas e veciños do Porriño, e pon coma exemplo o recen aprobado ‘Plan Integrado de Emprego para Mulleres’ (PIEM), que conta cunha importantes achega da Consellería de Economía, Emprego e Industria da Xunta de Galicia.

04/01/2018 in Alcaldía, Benestar, Emprego e formación

Volta aos anos 80 na Festa Pre-Fin de Ano coa que O Porriño despide o sábado, día 30, este 2017

Como xa é tradicional, O Porriño dille adeus ao ano cun día de antelación. Este sábado día 30, na carpa municipal a ‘Festa Pre-Fin de Ano’ levará aos asistentes á despedida de 1979 e a benvida de 1980…ano ao que vai adicada esta noite.

A festa comezará as 23:00h coa actuación de Club Naval, banda encargada de despedir  o ano na primeira parte do seu concerto. Ás 12 menos cuarto, todo o mundo irá á Praza de Antonio Palacios, diante do Concello, para tomar os ’12 lacasitos’ ao compás das badaladas, evento dirixido polo showman Carlos Veleiro.

De volta á carpa, empezará a segunda parte da actuación de Club Naval ata a 1:30 para dar paso á ‘animación dos 80’s’, con  baile, música, coreografías,  espectáculo e a participación do público.

Nesta parte da celebración o mestre de cerimonia será  Cristian de Samil.

28/12/2017 in Alcaldía, Cultura e festas

As traballadoras e traballadores de Maderas Iglesias tentan que os grupos políticos do Parlamento de Galicia eviten o despido de 140 empregados ou o peche da empresa

A primeira hora da maña representantes das traballadoras de Maderas Iglesias, que este xoves levaron as súas demandas a Compostela, mantiveron un encontro con representantes dos grupos políticos no Parlamento de Galicia e, posteriormente, tentaron reunirse con responsábeis do Instituto Galego de Promoción Económica (IGAPE), que só recibiu a 7 representantes do comité, pero non permitiu que participaran na xuntanza nin alcaldes, concelleiros, entre eles varios do Porriño, como o responsábel de Tráfico Orlando Márquez, nin asesores das organizacións sindicais.

O pasado día 12 de decembro comezaron as negociacións entre a representación dos traballadores e a dirección da empresa na que, segundo explica o presidente do comité, Vicente Morales, os xestores de Maderas Iglesias puxeron sobre a mesa a liquidación de 140 postos de traballo dos 249 cos que conta na actualidade, ou a liquidación de todos, se esta proposta non se acepta. “A empresa dá un prazo do 12 ao 30 de xaneiro para chegar a un acordo, pero non garante que vaia cumprir”.

Por iso trasladaron a súa protesta e demandas ao Parlamento de Galicia, co obxectivo de “salvar a empresa e garantir os postos de traballo”. Para elo demandan o apoio do Parlamento cun “compromiso político”

A situación para o persoal, que denuncia que vén padecendo atrasos nos cobros das súas nóminas desde hai tempo, é moi delicada. “Hai traballadoras e traballadores  ás que está axudando o propio Concello. Até o de agora cobrabas o 10, o 15 ou máis do 20. Iso para unha familia que teña unha hipoteca, repercute en todo”, lamenta o presidente do comité.

Morales lembra que Maderas Iglesias chegou a ter máis de 800 traballadores e que concellos da zona e asesores cren que é viábel. Por iso reclama que se lles aclare exactamente cal é a situación. “A información que temos é o que nos conta o empresario”, afirma, e se non se fai algo antes, ou se acepta o acordo de liquidar os 140 postos de traballo ou a empresa pecharía o día 13 de febreiro.

Hoxe mesmo, o deputado socialista por Pontevedra, Abel Losada, rexistrou no propio Parlamento varias preguntas dirixidas ao Goberno de Galicia nas que pide ao mesmo que aclare qué xestións ten feito para cumprir o mandato do Parlamento, aprobado por unanimidade, para cooperar na busca de solucións aos problemas económicos e laborais de Maderas Iglesias.

Así mesmo, Losada pide ao Goberno galego que diga si é consciente do problema social e laboral que arrastra dende hai anos a empresa Maderas Iglesias; se sabe da importancia social e económica que o emprego desta empresa, maioritariamente feminino, ten para as comarcas do sur da provincia de Pontevedra e  se a Xunta de Galicia exerceu algún tipo de control específico os recursos públicos concedidos a esta empresa, a pesar dos problemas laborais e financeiros que presenta dende hai anos.

28/12/2017 in Alcaldía, Emprego e formación

O Concello do Porriño e a Deputación asinan un convenio por un importe de 800.000€ para levar adiante a actuación no módulo de atletismo que ten un coste de 1.000.000€

Carmela Silva asinou está mañá 21 convenios cos alcaldes e alcaldesas da provincia dos 25 concellos que disporán de 15 millóns de euros para obras singulares dentro do Plan de reequilibrio territorial do ente provincial.

A presidenta da Deputación subliñou a “celeridade” da administración provincial para  poñer a disposición dos concellos estes fondos e a dos concellos en aprobar os seus proxectos que permitirán que os entes locais podan, de maneira inmediata, licitar as obras incluídas neste plan.

No caso do Porriño, a Deputación de Pontevedra achegará 800.000€, como sinala o convenio asinado pola alcaldesa, Eva García de la Torre, que estivo acompañada polo concelleiro de Deportes, Manuel Carrera, para levar a cabo a actuación no módulo de atletismo, cuxo custe total é de 1.000.000€.

28/12/2017 in Alcaldía, Deportes

@festivaldecans abre a convocatoria de obras a concurso para a súa XV edición

O Festival de Cans, que celebrará a súa XV edición  do 23 ao 26 de maio de 2018, abriu este martes, díia 26 de decembro, a súa convocatoria de obras a concurso que, sinalan dende a organización “presentará moitas novidades con respecto á edición anterior”.

Entre as pezas que se poderán presentar, que deberán de ser de produción galega e realizadas entre 2017 e 2018, atópanse as curtametraxes de ficción e de animación, así como os videoclips como ven sendo habitual, pero sumarase unha sección novidosa á competición con respecto ao ano anterior.

Será a sección “Furacáns”, centrada nas obras de non- ficción e que buscará visibilizar as curtametraxes de creadoras e creadores que asuman maiores riscos narrativos. Esta sección xa foi testada con enorme éxito de público na pasada edición, aínda que foi programada a partir de invitacións cursadas directamente polo festival a directoras e directores. Este ano, a sección será por vez primeira competitiva, e terá un premio de 1.000€ , que otorgará un xurado específico creado para avaliar estas obras.

En total serán 7.900€ os que o Festival de Cans repartirá entre as obras premiadas, buscando impulsar a creación das novas e novos creadores audiovisuais de Galicia. Ademáis da categoría “Furacáns”, o festival otorgará entre os seus premios principais 2.000€ á mellor curtametraxe de ficción, 1.500€  ó premio do público e 1.500€ á mellor curtametraxe de animación. A maiores recibirán premios económicos ata completar a cantidade final, as categorías de videoclips e as de mellor realización, mellor guión, mellor interpretación femenina e mellor interpretación masculina. As bases completas do concurso e os premios en cada categoría poden consultarse na web www.festivaldecans.gal.

Outra novidade é que por vez primeira, o Festival de Cans habilitará na súa web un apartado para poder inscribir de xeito gratuíto as obras. Tamén segue manténdose a opción da plataforma www.festhome.com, para quen desexe facelo a través desta vía, cun prezo de 2 euros por cada obra inscrita. O Festival de Cans abre a porta a que creadoras e creadores inscriban libremente obras como documentais e mesmo longametraxes, webseries ou outros formatos, dándolle preferencia na selección a aquelas obras que non fosen estreadas polo momento en Galicia. En base ao material recibido, o Festival de Cans decidirá a incorporación de novas seccións paralelas que poidan enriquecer a programación do festival.

27/12/2017 in Alcaldía, Cultura e festas

Empezaron os Campamentos de Nadal no Porriño

Preto de 40 nenas e nenos porriñeses, de entre 5 e 12 anos de idade, participan dende este venres, 22 de decembro, e ata o vindeiro 4 de xaneiro, no ‘Campamento de Nadal’, organizado polo Concello do Porriño, a través da Concellería de Igualdade que dirixe Soledad Girón, e co-financiado pola Deputación de Pontevedra.

O obxectivo do mesmo, coma lembra a concelleira, é o “facilitar a conciliación da vida laboral e familiar das veciñas e veciños”, o mesmo que os que se organizan no verán e, ao mesmo tempo, permitir o entretemento das cativas e cativos nestas datas, coa súa participación en actividades de lecer, coma xogos, a elaboración dun mural sobre o Nadal ou, coma no primeiro día, recibir a visita de Papá Noel.

25/12/2017 in Alcaldía, Benestar, Igualdade

A alcaldesa expón, polo miúdo, nunha reunión coa Xunta as medidas que tomou o Goberno local en relación coa contaminación por lindano e obtén o compromiso de que seguirán as catas e análises por parte da administración galega

Eva García de la Torre expuxo, polo miúdo, aos representantes das consellerías de Medio Ambiente e Sanidade e aos técnicos das mesmas, as medidas que adoptara o Goberno Municipal do Porriño para afrontar a contaminación por lindano no barrio do Contrasto, na parroquia de Torneiros.
A alcaldesa repasou, durante a xuntanza mantida este xoves na delegación da Xunta en Vigo, a información que o Concello remitirá á Administración autonómica, de xeito “puntual e ao pormenor”, nas pasadas semanas: a comunicación constante cos veciños, o subministro de auga dende o día 1, primeiro para poder beber e cociñar e, de contado, a colocación de depósitos e motores para levar a auga ás casas para o aseo persoal e, finalmente, o pasado mes de novembro, o proxecto, impulsado polo Concello do Porriño por medio do Consorcio de Augas do Louro, para conectar todas as casas do Contrasto coa rede Municipal de Abastecemento.
Pola súa banda, indica García de la Torre, a Xunta comprometeuse a seguir coas catas en toda a zona para delimitar a incidencia do lindano, un traballo que se realizará “en colaboración co Concello” e que permitirá ter, no mes de marzo, un ‘mapa’ do seu impacto.
Así mesmo, seguirán, de xeito regular e constante, as análises para saber, ao momento, cal é exactamente o estado do terreo, dos pozos que -como reitera a alcaldesa, o Concello non ten competencia para pechar, algo que está na man da Confederación Hidrográfica do Miño-Sil- e do aire, así coma o seu posible impacto na saúde das veciñas e veciños.
Eva García de la Torre, quen reiterou que non se debe de consumir a auga dos pozos,subliña, que “non hai xa exposición directa ao lindano”, logo de que os obras fosen tapadas e se procedese ao asfaltado e que, “non hai perigo para a saúde”.
Isto non quere dicir, “en modo algún”, subliña a alcaldesa, “que non sigamos vixiantes”, os controis, as analíticas, a toma de mostras e as catas, seguen a facerse constantemente e agarda que as obras para conectar todas as casas á traída municipal podan iniciarse o mes de xaneiro, “en superficie” para evitar todo risco.
24/12/2017 in Alcaldía

O persoal da empresa porriñesa Maderas Iglesias mobilizarase en Santiago en defensa da continuidade da empresa

O cadro de persoal da Maderas Iglesias, empresa do Porriño dedicada á fabricación de tarima flotante que se atopa en situación crítica, trasladará a Santiago as mobilizacións en defensa da continuidade da compañía.

O comité convocou unha xornada de folga o vindeiro xoves, día 28, para que todos os traballadores poidan participar nas concentracións previstas ese día diante do Parlamento de Galicia e do Instituto Galego de Promoción Económica (Igape).

Un grupo de alcaldes das comarcas da Louriña e do Condado acompañarán as empregados a Compostela para apoiar as súas reivindicacións, conscientes de que se trata dunha compañía estratéxica para a zona e da que dependen centos de familias.

Está previsto que ese día a representación do cadro de persoal manteña xuntanzas no Parlamento cos distintos grupos políticos a partir das 10 e media da mañá, mentres que os traballadores permanecerán concentrados ás portas do edificio.

Posteriormente, por volta das 12:30 horas, trasladaranse até a sede do Igape -onde tamén desenvolverán unha protesta- para manter unha reunión cos seus responsábeis co obxectivo de buscar unha solución que garanta a viabilidade da empresa.

Dende o comité anuncian que o vindeiro 12 de xaneiro foron convocados a unha xuntanza coa empresa para comunicarlles os nomes das 140 empregados ás que lles aplicarán o ERE extintivo.

“A partir de aí abrirán unha negociación até o 25 de febreiro, data na que presentarían formalmente o ERE”. Con todo, a intención do comité e paralizar esta medida e lograr a viabilidade dunha compañía que emprega na actualidade a 250 persoas, das que o 85% son mulleres.

24/12/2017 in Alcaldía, Emprego e formación

Concentración este sábado no Porriño para esixir un médico máis e a mellora urxente do Servizo de Pediatría do Centro de Saúde

Integrantes do Goberno local sumáronse este sábado, día 23, á concentración convocados por ducias de veciñas e veciños para esixir, de novo e como veñen facendo dende hai semanas, un pediatra máis e a mellora do servizo de Pediatría do Centro de Saúde do Porriño, amais da mellora dos servizos sanitarios.

A xuízo do Goberno local esta situación é a proba incontestábel de que á Consellería de Sanidade non lle interesan os porriñeses e os considera cidadáns de segunda.

A promesa, publicitada en xuño de 2015, de facer un novo centro de saúde, anunciado polo anterior alcalde, do Partido Popular e a, daquela conselleira de Sanidade, Rocío Mosquera, coa cesión dos terreos por parte do Concello para edificar neles o mesmo, quedou en nada.

Sanidade tampouco atendeu as demandas feitas, ao inicio do verán,dende o Concello e polos propios usuarios do centro de saúde, de que axeitase as súas instalación, polo cal houbo enfermos que mesmo sufrían mareos e esvaídos a causa da calor que achegábase aos 40 graos.

Así mesmo, o conselleiro de Sanidade, Jesús Vázquez Almuiña, ignorou por completo a petición, aprobada polo Pleno do Concello do Porriño en xuño deste mesmo ano, dunha entrevista coa alcaldesa e cos representantes dos grupos municipais para que expuxesen as carencias e as necesidades urxentes dun Centro de Saúde que atendeu os primeiros seis meses deste ano a máis de 100.000 doentes veciños de Mos, Salceda e O Porriño.

23/12/2017 in Alcaldía

‘Motivación’, primeiro dos cursos do ‘Plan de Inclusión Social da Poboación Xitana’ organizado no período formativo 2017-2018 pola Concellería de Benestar Social

16 persoas, integrantes do ‘Colectivo Machado’, acudiron ao curso de ‘Motivación’, impartido no Centro Multiusos Municipal de Torneiros no que é o primeiro dos cursos do período formativo 2017-2018 do ‘Plan de Inclusión Social da Poboación Xitana’.

O curso, organizado pola Concellería de Benestar Social, que dirixe Soledad Girón, e financiado con Fondos Europeos, é o primeiro dos programados nos que haberá tamén formación en Vivenda e Perruquería, ademais de clases de Apoio Escolar e Alfabetización de Adultos.

O obxectivo dos mesmos, sinala a concelleira, é a “normalización das condicións de vida das xitanas e xitanos pertencentes a este colectivo, de orixe portugués, fomentando a integración a muller xitana e a igualdade de oportunidades”.

22/12/2017 in Alcaldía, Benestar