Novas

O Concello do Porriño vén de incorporar ao seu cadro de persoal a catro novos traballadores que reforzarán as áreas de emprego e formación, atención ao cidadán e administración xeral.
Todos eles son mozos e mozas que remataron os seus estudos hai menos de tres anos e que se atopaban en situación de desemprego.

O alcalde, Alejandro Lorenzo, acompañado pola concelleira de Emprego e Formación, Rosario Costas, deulles a benvida no seu primeiro día de traballo e púxose á súa disposición.

“O voso traballo será de gran axuda para nós e tamén para vós, xa que vos permitirá adquirir competencias e experiencia nas áreas nas que desempeñaredes o voso labor, trasmitiulles o alcalde, Benvidos ao equipo do Concello do Porriño.

Trátase de dous graduados en Dereito, unha en Economía e outro en Dirección e Xestión Pública contratados ao amparo do programa da Deputación de Pontevedra Primeira Experiencia Profesional que ten por obxecto dotar ás persoas mozas desempregadas, mediante un contrato de traballo, dunha primeira experiencia para a adquisición de competencias e habilidades sociais e profesionais.

O pleno do Concello do Porriño aprobou esta mañá, co voto favorable do equipo de goberno, o Orzamento Municipal para o que resta de exercicio 2023 que ascende a 19 M de euros, o que supón un incremento do 36,23% respecto ao anterior e o posiciona como o máis ambicioso da historia do municipio.

Unhas contas pensadas para servir á veciñanza do Porriño, atender ás prioridades económicas e poder ofrecer unha xestión eficiente e ordenada no que respecta aos gastos e ingresos dentro dun marco de estabilidade orzamentaria. En definitiva, unhas contas que, tal e como explicou o alcalde, Alejandro Lorenzo, “están deseñadas para optimizar os recursos económicos dos que dispoñemos e atender ao verdadeiramente importante, as persoas e ás súas necesidades”.

Isto queda reflexado nas partidas reservadas polo executivo para atención social. Esta área é unha das máis reforzadas dotándoa de 2,2 M de euros, o que supón un incremento do 94%. Esta cantidade permitirá fortalecer os servizos sociais dotándoos de máis persoal e medios para cumprir coa axuda no coidado dos nosos maiores ou a atención e integración social das persoas menos favorecidas.

No tocante ao gasto en persoal, o orzamento recolle a dotación necesaria para facer frente ás retribucións do persoal ao servizo do Concello recollidas na Relación de Postos de Traballo que se aprobou no ano 2019 sen contar con crédito suficiente no orzamento, o que lastraba a contabilidade municipal ao ter que recurrir a modificacións de crédito para poder dar cobertura á mesma. Co fin de regularizar esta situación, a partida increméntase nun 33,95%, aumentándoa en 1,6 M de euros.

Como xa dixemos a nova folla de ruta económica pretende ofrecer seguridade e estabilidade á xestión neste exercicio, polo que se centra tamén na dotación necesaria para poder atender os compromisos adquiridos cos provedores que teñen contratos en vigor formalizados co concello, así como en permitir pechar novos contratos que permitan prestar servizos de maneira regulada e legal, logo de moitos anos cunha situación de ausencia de licitacións total e absoluta, especialmente grave nos casos dos servizos obrigatorios con maior custe económico para o Concello, como son a recollida de lixo, a limpeza viaria, o mantemento de xardíns e desbroces, a xestión da piscina municipal ou o servizo de axuda no fogar. Por iso o gasto corrente destinado a atender estes contratos representa un 57,54% do total do orzamento.

Resalta na folla de ruta económica a área de Cultura. “Trátase dun valor esencial e un recurso imprescindible do desenvolvemento intelectual”, apuntou Lorenzo, “Polo que seguiremos desenvolvendo unha programación atractiva e moi pendentes da xuventude e das súas necesidades”. A tal fin esta partida increméntase nun 18,38%. Tamén se reforza o eido da Educación cun aumento do 31,25%.

Inclúense tamén novas subvencións nominativas a asociacións do eido veciñal e social que ata o de agora non contaban con achega municipal directa, como é o caso de COGAMI, AFAGA ou OSÍLICE. Destacar neste punto que a maiores se dará cobertura a outras asociacións locais con modificacións orzamentarias que se levarán a pleno nas próximas semanas.

As comunidades de augas tamén se ven reforzadas neste orzamento, case duplican a súa dotación pasando de 95.000 euros a 175.000 euros.

En canto aos ingresos, tal e como relata o alcalde “a liña principal de traballo marcada por este Goberno á hora de elaborar este orzamento foi a de manter a carga impositiva municipal para este ano, o que supón un pequeno aforro para os petos dos porriñeses e porriñesas no momento tan convulso no que estamos a vivir. Por iso se traballa na bonificación de diferentes impostos como sa xe fixo co IBI, a pesar de contar coa porcentaxe mínima establecida, e como se está a facer co ICIO e o IAE”. Lorenzo explicou que a súa política fiscal “basearase na inspección, e sobre todo na depuración e actualización dos padróns de recadacións, xa que o bo comportamento dos ingresos é debido ao crecemento económico en relación á incorporación de máis usuarios á prestación dos servizos, así como á permanente depuración dos mesmos. En definitiva, unha boa xestión económica permitiranos non aumentar a presión fiscal sobre as familias”.

O alcalde, rematou destacando a importancia deste Orzamento de cara a poñer en marcha O Porriño e darlle a estabilidade económica que require para seguir crecendo e facendo cidade. “Este é se cabe o documento máis importante para o desenvolvemento e a prestación de servicios dun Concello e debe facerse de maneira realista e responsable. Pensando na xente e no seu futuro e deixando a un lado os intereses e a pugna política”, concluíu o rexedor, “Iso é o que pretendemos e iso é o que fixemos. Traballamos xa nas contas para o seguinte exercicio que darán continuidade ao noso proxecto e nos próximos días levaremos a pleno numerosas inversións como o pago de facturas ou proxectos de saneamento con cargo ao remanente, algo que nos permite o contar cunhas contas saneadas e estables”.

Como xa adiantamos, o documento aprobouse inicialmente co único voto a favor do goberno municipal e o voto en contra dos dous grupos da oposición. Ambos presentaron emendas ás contas, propostas que foron desestimadas polo pleno. Neste sentido o portavoz do executivo, Carlos Martínez, agradeceu a aportación de ambos grupos e explicou que o goberno desestima estas propostas por ser “algunhas delas con cargo a partidas con crédito comprometido ou executado xa polo que é imposible facer uso do mesmo e outras por ser de ámbitos que non son competencia municipal, polo que levar a cabo o trámite necesario para abordalas imposibilitaría o acometelas no exercicio que contempla este orzamento” e adiantou que algunhas delas “non caen en saco roto para o equipo de goberno” que as terá en conta na redacción do Orzamento para o 2024 na que xa se está traballando.

O Concello do Porriño súmase á celebración do aniversario da Axencia de Doazón de Órganos e Sangue.

 “ADOS cumpre 30 anos e durante este tempo a contribución dos veciños e veciñas do Porriño para salvar vidas foi destacable, a nosa veciñanza sempre está aí cando hai que axudar”, apuntou o alcalde, Alejandro Lorenzo, “Agora, máis que nunca, temos que demostrar a solidariedade da xente do Porriño”.

No mesmo sentido se manifestou a concelleira de Sanidade, Teresa Veloso, salientando que a doazón “é un acto de xenerosidade sen ningún tipo de custe e que aporta á sociedade valor e compromiso con quen o precisa. As persoas podemos priorizar a saúde dos nosos veciños sen ningún tipo de risco para a nosa”.

Para axudar, o vindeiro venres 14 de xullo (de 10h a 14:30h e de 16 a 21h, aparcará na rúa Domingo Bueno a unidade móbil de ADOS. Ao seu carón, establecerase un set de rodaxe, onde o director será cada persoa que acuda a doar, ao máis puro estilo Hollywood. Dándolle importancia a todas aquelas persoas que nestas datas, se acercan á unidade móbil nun acto altruísta e tremendamente solidario.

Lembramos que non é necesaria cita previa.

O goberno municipal do Porriño, que preside Alejandro Lorenzo, levará a pleno este venres a súa proposta de Orzamento para o que resta de exercicio. Unhas contas de transición que definen marco de estabilidade que pretende ofrecer o executivo local, cunha xestión previsible e unha planificación ordenada de gastos e ingresos.

“Actuamos con responsabilidade e fuxindo de calquera populismo económico”, apuntou o alcalde, “O Porriño necesita un orzamento que atenda ás súas necesidades actuais e permita unha xestión eficiente, algo que non cumpría o prorrogado do 2018 co que traballabamos”. Puntualiza Lorenzo que, se ben falamos unhas contas realistas, tamén son ambiciosas e de marcado carácter expansivo xa que “experimentan un crecemento do 36,23% respecto do orzamento vixente. Ascenden a 19 M o que o sitúa como o máis elevado da historia deste concello”.

Este marco de estabilidade permitirá poder facer uso o que queda de ano do remanente acumulado para inversións tan necesarias como a execución de proxectos de saneamento nas parroquias, adquisición de parcelas para a creación de parques, zonas verdes ou o auditorio municipal e tamén  bonificación de impostos para que O Porriño se consolide como Concello emprendedor.

Con todo, o rexedor insistiu en que a finais deste ano presentaranse o orzamento correspondente ao exercicio 2024, no que poder dar cabida a todas as necesidades da veciñanza do Porriño.

Estabilidade e recuperación económica

As contas públicas que presenta o executivo ofrecen seguridade e estabilidade, centrándonse en consignar a dotación necesaria para poder atender os compromisos adquiridos. Trátase como xa dixemos dun orzamento de transición que contempla un incremento substancial na prestación de servizos, de maneira regulada e legal, logo de moitos anos cunha situación de ausencia total de contratos regulados, especialmente grave no caso dos servizos obrigatorios con maior custe, como son a recollida de lixo, mantemento de xardíns e desbroces, xestión da piscina ou servizo de axuda no fogar. Neste documento contémplase  un gasto corrente para atender aos contratos de servizos formalizados que representa un 57,54% do mesmo.

En canto ao gasto en persoal, hai que ter en conta que no ano 2019 aprobouse a Relación de Postos de Traballo sen contar con crédito suficiente no orzamento inicial para dar cobertura á mesma. Este orzamento recolle por fin a dotación necesaria para atender ás retribucións do persoal ao servizo do Concello incrementando esta partida nun 33,95%.

Un Goberno que coida

Desde o Goberno local seguiranse tomando todas as medidas necesarias, dentro das súas competencias, para axudar ás persoas, familias e empresas que están a ter dificultades.  Manter e reforzar os servizos sociais dotando esta área de máis persoal e orzamento para cumprir na prevención de axuda no coidado dos nosos maiores creando unha área propia ou a atención e integración social das persoas menos favorecidas, o que supón a dotación orzamentaria na asistencia social de máis 2,2 M de euros. Isto supón un incremento do 94% nesta partida.

Coidar tamén é coidarnos, polo que a aposta polo Deporte tamén se reforza cun incremento do 42,32 %.

Concello que integra cultura, educación, xuventude e infancia

Resalta na folla de ruta económica a área de Cultura. “Trátase dun valor esencial e un recurso imprescindible do desenvolvemento intelectual”, apuntou Lorenzo, “Polo que seguiremos desenvolvendo unha programación atractiva e moi pendentes da xuventude e das súas necesidades”. A tal fin esta partida increméntase nun 18,38%. Tamén se reforza o eido da Educación cun aumento do  31,25%.

Inclúense tamén novas subvencións nominativas a asociacións do eido veciñal e social que ata o de agora non contaban con achega municipal directa, como é o caso de COGAMI, AFAGA ou OSÍLICE.  Destacar neste punto que a maiores se dará cobertura a outras asociacións locais con modificacións orzamentariasque se levarán a pleno nas próximas semanas.

Sete dedicacións e soldos conxelados toda a lexislatura

No que atinxe ás retribucións dos membros do goberno local mantéñense os soldos conxelados dende o 2021, sumándose o compromiso do rexedor de non subir as súas retribucións nin as dos seus concelleiros no que resta de lexislatura, renunciando á subida que conlevaría a subida do IPC. Así, Alejandro Lorenzo seguirá a ser o alcalde con menor retribución da área metropolitana de Vigo.

Así, establécense sete dedicacións exclusivas, cun importe anual de 34.700,54 euros, ademais da alcaldía, cun importe de 39.540,20 euros.  Estes son os En canto ao persoal eventual, o rexedor configura o seu gabinete con tres prazas eventuais: Secretaria de Alcaldía e Relacións institucionais, protocolo e prensa, cun importe cada unha de 33.217,52 euros e unha de Asesoría Xurídica, cunha dotación anual de 59.830 euros. Esta nova asesoría non incrementará o gasto pois se trata dun funcionario que continuará co seu labor na administración local tras a súa xubilación no gabinete de Alcaldía.