Novas

O Concello do Porriño apoia a campaña do “Adianta o verán” para impulsar o comercio local

O Porriño, 3 de xuño de 2025.- O Concello do Porriño, en colaboración coa Asociación de Comerciantes e Industriais do Porriño (ACIPOR), pon en marcha a campaña promocional “Adianta o verán”, que se desenvolverá do 2 ao 20 de xuño de 2025, ou ata esgotar rascas, co obxectivo de dinamizar e fomentar o comercio local no inicio da tempada estival.

Esta iniciativa ofrece aos veciños e veciñas do Porriño a oportunidade de participar de xeito gratuíto nunha promoción na que poderán gañar bolsas neveriñas e bolsas de praia, incentivando así a compra nos establecementos asociados a ACIPOR.

Durante a campaña, os comercios participantes entregarán rascas aos seus clientes por cada compra realizada, que poderán ser canxeados ata o 23 de xuño de 2025 nos establecementos colaboradores: Lola, Zafiro, Lencería Tere, MariVa, Rayuela, La Antigua Mueblería, Mapa e Congelados Frandi.

En total, a promoción conta con 42 bolsas neveriñas e 78 bolsas de praia como premios, e está aberta a todas as persoas físicas que fagan compras nos establecementos asociados durante o período da campaña.

Desde o Concello do Porriño sublíñase a importancia de apoiar ao comercio local como motor económico e social da vila, e animan a toda a cidadanía a participar nesta campaña, que reforza a vinculación entre comercio e veciñanza.

Para máis información, as persoas interesadas poden contactar coa ACIPOR a través do correo escoladetempolibre@avada.gal ou do teléfono e WhatsApp 641 10 97 16.

O Concello do Porriño continúa traballando para fomentar iniciativas que impulsen o desenvolvemento económico local e o benestar da súa cidadanía.

 

03/06/2025 in Sen categoría

O Concello do Porriño lembra que o prazo para inscribirse ao curso de Monitor de Tempo Libre está a piques de pechar

• Só quedan 5 prazas dispoñibles

O Porriño, 3 de xuño de 2025.- A Concellería de Xuventude do Concello do Porriño, a través da OMIX, organiza un novo Curso Oficial de Monitor/a de Actividades de Tempo Libre, que se desenvolverá no verán de 2025. A formación será impartida pola cooperativa Avada S. Coop. e a Escola de Tempo Libre Scolé, e conta con todas as garantías de calidade e homologación oficial.

O curso realizarase en modalidade semipresencial, cun total de 200 horas teóricas:

    • Sesións presenciais: do 16 ao 27 de xuño, no Centro Cultural Municipal do Porriño (100 horas)
    • Formación en liña: do 28 de xuño ao 11 de xullo (100 horas)

 

Unha vez rematada esta fase, o alumnado deberá completar 150 horas de prácticas obrigatorias en entidades colaboradoras. Ao finalizar, as persoas participantes obterán o O título oficial de Monitor/a de Tempo Libre, requisito imprescindible para traballar en campamentos, ludotecas, granxas escola, actividades extraescolares, establecementos turísticos, entre outros.

O prazo de inscrición está aberto ata o 9 de xuño, mediante o seguinte formulario:

https://forms.gle/xBZoCEv98WYPjRa88

Actualmente, só quedan 5 prazas dispoñibles. As inscricións tramítanse por orde de chegada, e terán prioridade as persoas empadroadas no Porriño.

Para máis información:

escoladetempolibre@avada.gal

Teléfono e WhatsApp: 641 10 97 16

O Concello do Porriño aposta pola formación xuvenil como ferramenta para o emprego, a dinamización do tempo libre e o desenvolvemento persoal.

Non perdas esta oportunidade única de formarte, divertirte e acceder a novas saídas laborais.

 

 

 

 

  •  

 

 

 

 

 

 

 

 

 

 

03/06/2025 in Sen categoría

O Concello do Porriño abre o prazo de inscrición para o Campamento de verán 2025, unha iniciativa para facilitar a conciliación da vida familiar e laboral

O Porriño, 2 de xuño de 2025. – Mañá, 3 de xuño, ás 9:00 horas, abrirase o prazo de inscrición para participar no Campamento de Verán 2025, unha actividade organizada pola Concellería de Igualdade do Concello do Porriño a través do Centro de Información á Muller (CIM). A iniciativa forma parte do programa “O Porriño en favor da conciliación da vida persoal e laboral” e ten como obxectivo facilitar ás familias porriñesas a conciliación durante o período estival.

O campamento está dirixido a nenos e nenas de entre 3 e 12 anos cumpridos e desenvolverase dende o 30 de xuño ata o 5 de setembro, en horario de 9:00 a 14:00 horas, nas instalacións municipais. Está previsto un límite de 50 prazas por semana, polo que a selección dos participantes realizarase atendendo a dous criterios:

1. Valoración previa das solicitudes, de maior a menor puntuación.

2. Orde de inscrición e prioridade. 

Durante o campamento, os rapaces e rapazas participarán en actividades variadas, diferentes das que realizan habitualmente no seu día a día. As propostas están pensadas para fomentar actitudes saudables, traballar a creatividade e a imaxinación, aprender a ser máis autónomos, manexar situacións da vida cotiá e desenvolverse como persoas, potenciando valores como a empatía, o respecto e a solidariedade.

O prazo para presentar as solicitudes rematará o 10 de xuño ás 8:59 h. As inscricións poderán formalizarse:

  • Presencialmente no Rexistro Xeral do Concello
  • Telemáticamente, a través da sede electrónica do Concello

FOLLA DE INSCRIPCIÓN CAMPAMENTO DE VERÁN 2025

A organización lembra a importancia de marcar correctamente as semanas de interese, asignando un número do 1 ao 10 segundo a orde de prioridade (1 = máxima prioridade, 10 = menor).

Terán prioridade para acceder ás prazas os nenos e nenas empadroados no Porriño.

Para resolver calquera dúbida, as persoas interesadas poden contactar co persoal do CIM:

 Teléfono: 986 335 000 (Extensión 0)

Correo electrónico: cim@oporrino.org (indicando no asunto: Campamento de Verán 2025)

Con esta iniciativa, o Concello do Porriño reafirma o seu compromiso coa conciliación familiar, o apoio á infancia e a igualdade de oportunidades, ao tempo que ofrece unha alternativa de lecer educativa e segura durante os meses de vacacións escolares.

02/06/2025 in Igualdade, Sen categoría

O Concello do Porriño reafirma o seu liderado no sector do granito durante a presentación de “A cor da pedra” na Stonegal

• Esta figura de pedra, extraída da canteira Pozo do Liño da empresa Lemmar Granite, producida por Godoy Maceira e deseñada polo estudio de arquitectura Moneo Brock, colocarase no Concello do Porriño.

O Porriño, 2 de xuño de 2025.– O Alcalde do Porriño, Alejandro Lorenzo, participou esta mañá no acto oficial de presentación da instalación “A cor da pedra”, obra da recoñecida arquitecta Belén Moneo, no marco da primeira edición de STONEGAL, o evento internacional da pedra natural que se celebra no Instituto Feiral de Vigo (IFEVI) desde mañá ata o xoves.

Durante a súa intervención, o rexedor destacou a profunda conexión do Porriño co sector do granito e subliñou o valor desta obra como símbolo da creatividade, sustentabilidade e identidade cultural vinculadas á pedra natural galega. “O Porriño é pedra e a pedra é Porriño. Esta instalación representa o que somos: tradición, industria e futuro”, afirmou Lorenzo.

O Alcalde aproveitou para poñer en valor a dimensión do sector, lembrando que “só no noso concello extráense cada ano máis de 250.000 toneladas de granito, dentro dun ecosistema industrial que xera arredor de 4.500 empregos directos e indirectos”.

A peza, comisariada por Marisa Santamaría e patrocinada pola Deputación de Pontevedra, converteuse no emblema visual de STONEGAL 2025 e foi concibida como unha homenaxe á riqueza cromática e simbólica da pedra galega, material cunha forte presenza histórica e económica no municipio porriñés. Esta figura de pedra, extraída da canteira Pozo do Liño da empresa Lemmar Granite, producida por Godoy Maceira e deseñada polo estudio de arquitectura Moneo Brock, colocarase no Concello do Porriño.

O acto contou tamén coa presenza de representantes do Clúster do Granito, empresas locais como Lemmar Granite e Godoy Maceira, e outras autoridades institucionais, entre elas o Presidente e a Vicepresidenta da Deputación de Pontevedra.

O Concello do Porriño reafirma así o seu apoio ao sector da pedra natural e salienta a importancia de promover espazos de diálogo entre a industria, a arquitectura e a arte para reforzar a proxección internacional dun material que define o territorio e o seu desenvolvemento económico.

 

 

02/06/2025 in Industria

O Concello do Porriño celebra “Quere o teu mercado” cun showcooking especial do cociñeiro Julio Mato

 

O Porriño, 31 de maio de 2025.– O Concello do Porriño celebrou esta semana unha nova edición da campaña “Quere o teu mercado” cun showcooking especial do cociñeiro Julio Mato, que tivo lugar nas instalacións da Praza de Abastos.

Trátase dunha actividade aberta ao público na que as persoas asistentes puideron gozar da elaboración en directo de tres pratos sorprendentes, feitos con ingredientes de proximidade:

● Ensalada líquida

● Bocadillo de costela a baixa temperatura, encurtido galego, pan do Porriño e “a salsa definitiva”

● Tarta de Santiago 3.0

“Quere o teu mercado” é o lema en galego da Campaña Internacional dos Mercados, unha iniciativa que a Xunta de Galicia promove en colaboración cos Concellos, as Prazas de Abastos e as Federacións e Asociacións de comerciantes. O obxectivo é poñer en valor o comercio local, os produtos de proximidade e o papel fundamental que xogan os mercados nas nosas vilas.

Todos os produtos empregados por Julio Mato na preparación das receitas puideron ser adquiridos no propio mercado municipal do Porriño, demostrando así que a nosa praza ofrece todo o necesario para elaborar pratos orixinais, saudables e cheos de sabor.

Durante o showcooking, tamén se puxo o mandil o Alcalde Alejandro Lorenzo, que se animou a preparar os diferentes pratos. Cun toque de humor e moitas ganas, demostrou que non hai mellor receita que apostar polos produtos da casa e gozar da experiencia de cociñar en boa compañía.

Desde o Concello do Porriño seguimos apostando polo pequeno comercio, apoiando á nosa praza e fomentando hábitos de consumo sostibles e de proximidade. Na nosa Praza de Abastos podes atopar, ademais de boa xente, peixarías, carnicerías, fruterías, floristerías, supermercado e outros negocios locais que traballan cada día para ofrecernos calidade, trato próximo e produto fresco.

Animámosvos a facer a vosa versión dos pratos mencionados e a subir un vídeo ou unha foto ás vosas redes sociais etiquetándonos.

31/05/2025 in Sen categoría, Urbanismo, comercio e industria

O Porriño acolle unha espectacular proba do calendario galego de carreiras de drons

  • Catro drons competirán simultáneamente nun circuíto técnico e cheo de obstáculos

O Porriño, 31 de maio de 2025.- O Porriño volverá a converterse nun referente da innovación e do deporte tecnolóxico coa celebración dunha proba puntuable do calendario oficial da Federación Aeronáutica Galega (FAG) na categoría F9U – Drones de Carreiras. O evento está organizado polo Club Furaventos, con sede no noso concello, e terá lugar nas súas instalacións, que xa son un referente no ámbito autonómico.

Durante a xornada disputaranse intensas mangas clasificatorias e eliminatorias nas que catro drons competirán simultáneamente nun circuíto técnico e cheo de obstáculos, loitando por un posto nas seguintes roldas ata chegar á gran final.

Trátase dunha disciplina espectacular: os drons, pequenos pero extremadamente potentes, poden acadar os 200 km/h en só un par de segundos. Os pilotos manexan os dispositivos por radiocontrol mediante gafas FPV (First Person View), que se conectan ás cámaras instaladas nos drons, ofrecendo unha experiencia inmersiva única, como se pilotasen a bordo.

A xornada comezará pola mañá cos adestramentos libres. Tras o xantar, celebraranse as mangas clasificatorias e posteriormente as eliminatorias que darán paso á final. Ao remate, terá lugar a entrega de medallas da Federación Aeronáutica Galega, así como agasallos por parte dos patrocinadores.

O Club Furaventos dá unha especial importancia a esta cita, xa que lles serve como proba técnica para testar novos sistemas e equipamentos que empregarán no Campionato de España, que tamén terá lugar no Porriño a finais de agosto.

Dende o Concello do Porriño animámosvos a coñecer de preto unha modalidade deportiva emerxente que combina tecnoloxía, destreza e espectáculo visual. Unha mostra máis do compromiso deste municipio coa innovación e o apoio ao deporte en todas as súas expresións.

31/05/2025 in Deportes, Sen categoría

O Porriño, sede hoxe da Final 4 Alevín e Benxamín de Balonmán Base

 

  • O Pavillón Municipal será escenario dos encontros da categoría alevín 7, que se disputarán ao longo da mañá nas dúas pistas dispoñibles

O Porriño, 31 de maio de 2025.– O Porriño acolle hoxe unha das grandes citas do balonmán base galego coa celebración da Final 4 nas categorías alevín e benxamín. O Pavillón Municipal será escenario dos encontros da categoría alevín 7, que se disputarán ao longo da mañá nas dúas pistas dispoñibles.

Esta xornada representa o peche da tempada para o balonmán base e reunirá a nenos e nenas de distintos puntos de Galicia que competirán por acadar o título de campións nas súas respectivas categorías. Máis alá da competición, será unha festa do deporte base, marcada pola ilusión, o esforzo e a convivencia entre deportistas, familias e afección.

Paralelamente, a localidade veciña de Redondela será sede dos encontros das categorías benxamín e alevín 5, completando así esta derradeira Final 4 do ano.

Durante a entrega de premios, que terá lugar ás 14:30 h, estará presente o Alcalde, Alejandro Lorenzo.

Dende o Concello do Porriño queremos convidar a toda a veciñanza a achegarse ao Pavillón Municipal e desfrutar dunha mañá única, chea de deporte e valores. O apoio da comunidade é clave para seguir impulsando o deporte base e creando espazos de encontro e formación para a nosa mocidade.

31/05/2025 in Deportes, Sen categoría

O Concello do Porriño presenta a II edición de ACIENCIACERTA, a Mostra de Ciencias na Rúa, que terá lugar do 4 ao 6 de xuño

 

Porriño, 30 de maio de 2025.– Esta tarde tivo lugar no Concello do Porriño a presentación oficial de ACiENCiACERTA 2025, a segunda edición da Mostra de Ciencias na Rúa, que este ano medra en duración e en ambición. A praza do Concello e as rúas do centro urbano converteranse durante tres días –do mércores 4 ao venres 6 de xuño– nun espazo aberto para a ciencia, a divulgación e a participación cidadá.

Durante a presentación interviron o Coordinador do evento, Juancho Castaño; a Concelleira de Educación, Carolina González; a Directora de Comunicación & Global Brand en Zendal Group, Beatriz Díaz; o Director Territorial de Educación en Pontevedra, César Pérez Ares e Alcalde do Concello do Porriño, Alejandro Lorenzo, que destacou o éxito da primeira edición e a clara aposta por consolidar este evento como unha cita anual de referencia no ámbito da divulgación científica.

ACiENCiACERTA está organizada polo Concello do Porriño co patrocinio de Zendal Group e, como novidade principal deste ano, conta coa colaboración institucional da Universidade de Vigo.

O tema protagonista desta edición será o cambio climático, que marcará tanto o contido das conferencias como a imaxe gráfica do evento. O obxectivo é achegar á cidadanía unha reflexión colectiva arredor da ciencia e os grandes retos ambientais do noso tempo.

A madriña de ACiENCiACERTA 2025 é a porriñesa Katia Guimaré González, enxeñeira industrial que desenvolve a súa carreira profesional na empresa ferroviaria alemá Deutsche Bahn AG. Un referente de talento galego no exterior, comprometida coa innovación e a excelencia técnica.

Katia Guimaré formará parte do xurado científico que o venres 6 de xuño avaliará os proxectos presentados polos dez centros educativos do Porriño, no marco do Concurso de Proxectos Científicos Escolares, con dúas categorías: menores e maiores de 12 anos, ademais dun premio do público. Completan o xurado Silvia Diz de Almeida, investigadora en medicina molecular e doutora pola USC e Ángel Pichel Loureiro, médico de Urxencias do Hospital Álvaro Cunqueiro e docente universitario. 

 

Programación completa

  • Mércores 4 de xuño

Lugar: Botica Nova de Palacios

Brinde pola Ciencia con Aguas de Mondariz

Charlas:

– “Natureza que protexe: o papel da vexetación no río”. A cargo de Sofía Villar Rúa e Elena Seoane Martínez

– “O cambio climático contado por un Hominino a un Neandertal”. A cargo de Eduardo Méndez Quintas, Hugo Bal García e Iván Rey Rodríguez

 

  • Xoves 5 de xuño

Charlas e actividades:

– “O extraordinario planeta A no que habitamos”. Con Martín Barreiro e Ana Mariño

– “A ornitoloxía e o cambio climático”. Con María Vidal Malde

– “Derivas”. Instalación artística sostible de Julia de la Cal

 

  • Venres 6 de xuño

Mostra de Proxectos Científicos Escolares nas rúas do centro

Votación do Premio do Público

Charlas:

– “O mar e o cambio climático”. Con Laura García Peteiro e Xulia Pisón

– “A natureza na obra de Miguelanxo Prado”. Conversa co recoñecido autor galego de cómic

 

ACiENCiACERTA 2025 quere achegar a ciencia á rúa, fomentar vocacións e crear espazos de encontro entre profesionais da ciencia, estudantes e veciñanza. Desde o Concello do Porriño convidamos a toda a cidadanía a participar e gozar desta festa da ciencia ao aire libre.

31/05/2025 in Educación e tecnoloxía

O Porriño dá comezo á Feira do Libro 2025 cunha firme aposta pola lectura, a cultura e o desenolvemento local

  • A feira conta con máis de corenta actividades previstas, entre as que se inclúen sinaturas de libros, contacontos, espectáculos, música e obradoiros.

O Porriño, 29 de maio de 2025.- O barrio de San Bieito volve ser nestes días o epicentro da lectura en Galicia coa celebración da Feira do Libro 2025, que se prolongará ata o domingo, 1 de xuño, baixo o lema deste ano: “Onde florecen os libros”. A feira consolídase así como un evento clave no calendario cultural da comarca, cunha programación diversa, inclusiva e pensada para todos os públicos.

A apertura deu comezo cunha actuación das Pandereteiras Pande Atios da Asociación Cultural Os Penediños de Atios que precedeu a intervención das autoridades alí presentes. O Alcalde do Porriño, Alejandro Lorenzo, destacou que “a cultura é un piar esencial da nosa identidade como vila. Sigamos fomentando a lectura, os encontros culturais e a defensa do libro como ferramenta de crecemento colectivo”.

Durante o acto inaugural, a Secretaria da Federación de Librarías de Galicia, Celia Fernández, subliñou que “o lema Onde florecen os libros non é só un lema, tamén é unha promesa” e agradeceu ao Concello do Porriño “o seu compromiso constante coa cultura e co libro, especialmente nestes tempos nos que é tan necesario crear espazos de encontro arredor da palabra escrita”.

O Deputado de Cultura, Xuventude e Reto Demográfico da Deputación de Pontevedra, Jorge Cubela, salientou que “a industria do libro é un pulo e un motor económico para toda Galicia e para toda a provincia”, defendendo o apoio instiucional como clave para fortalecer o sector editorial e libraría.

Pola súa parte, o Director Xeral de Cultura da Xunta de Galicia, Anxo Lorenzo, apuntou que “neste espazo xuntamos máis de 40 actividades ata o domingo”. “Esta é a primeira feira do libro que se fai das catro que apoiamos na provincia de Pontevedra”, engadiu.

O pregón inaugural correu a cargo do poeta Samuel Merino, quen destacou o papel do libro como ferramenta de liberdade, idenOdade e encontro social. O seu discurso, cheo de sensibilidade e reflexións sobre o valor da palabra escrita, culminou con poema. Finalizado o acto, as autoridades acompañaron o pregoeiro nun percorrido polas casetas da feira, nun xesto de apoio ao sector libreiro e de proximidade á cidadanía.

A feira conta coa participación de seis librarías galegas —Copi-Rey, Paz, Uróboros, Porto, Pedreira e Cartabón— e con máis de corenta actividades previstas, entre as que se inclúen sinaturas de libros, contacontos, espectáculos, música e obradoiros. A proposta reafirma o compromiso do Porriño coa cultura accesible e participativa.

Para máis información e para acceder a programación completa da Feira do Libro, pódese consultar a web do Concello. O Porriño reafírmase un ano máis como referente cultural, abrindo as portas da lectura a toda a cidadanía.

 

 

29/05/2025 in Cultura e festas

O Concello do Porriño promove a participación na CAE Interrunning´25, un evento que une deporte, empresas e solidariedade

  • Os fondos recadados coas inscricións destinaranse a apoiar a Aceesca, o Banco de Alimentos do Porriño e a Asociación Española Contra o Cancro.

O Porriño, 29 de maio de 2025.– O Concello do Porriño informa de que xa está aberto o prazo de inscrición para participar na CAE INTERRUNNING’25, que se celebrará o vindeiro 21 de setembro. Trátase dunha cita deportiva consolidada no calendario local, organizada en colaboración co Interrunning Club, que busca fomentar a práctica deportiva, o espírito de equipo entre empresas e veciñanza, e, ao mesmo tempo, contribuír a causas solidarias.

Este evento contará con varias modalidades adaptadas a todos os públicos e niveis: andaina de 8 km, carreiras de 5 km e 10 km, así como probas infantís, o que permite a participación tanto de persoas habituadas á práctica deportiva como de quen se inicia nela. As inscricións poden realizarse xa a través da páxina web www.emesports.es cun prezo simbólico de 6 euros.

Desde o Concello do Porriño anímase a toda a cidadanía, empresas e colectivos a sumarse a esta iniciativa, que non só promove hábitos saudables e o deporte como ferramenta de cohesión social, senón que tamén ten unha importante vertente solidaria. Os fondos recadados coas inscricións destinaranse a apoiar a Aceesca, o Banco de Alimentos do Porriño e a Asociación Española Contra o Cancro.

O alcalde do Porriño, Alejandro Lorenzo, destaca a relevancia deste evento no ámbito local:

“A CAE Interrunning é moito máis ca unha carreira. É unha oportunidade para que veciños e veciñas, empresas e entidades camiñen ou corran xuntos por un mesmo obxectivo: o benestar da nosa comunidade. Dende o Concello reiteramos o noso compromiso con este tipo de iniciativas que fortalecen o tecido social e promoven valores de solidariedade e cooperación”.

A xornada culminará cunha gran celebración aberta ao público, que incluirá música, agasallos e outras actividades lúdicas, converténdose así nun día de encontro, participación e festa para toda a vila.

29/05/2025 in Deportes, Sen categoría