David Alonso, concelleiro de Servizos Sociais chama á poboación a contribuír coa campaña “Veciño Solidario” na que participa O Porriño xunto con outros corenta concellos galegos.
A iniciativa partiu da empresa de organización de eventos deportivos “Emesports”, que colabora co Concello do Porriño. Propón que en cada concello, cada veciño que poda, colabora cunha sinxela achega dende 3 € para destinar a recadación ás axudas sociais aos colectivos desfavorecidos que neste caso o Concello de Porriño estime oportunas.
Para facer a achega hai que entrar na web de Emesports para consultar o número de conta bancaria onde hai que realizar o ingreso.
O Concello do Porriño, a través da Concellería de Xuventude, expresa o seu apoio ao concurso “Celebra con nós o Día do Libro”, promovido pola Xunta de Galicia. Desde a Consellería de Política Social, a través da Dirección Xeral de Xuventude, Participación e Voluntariado, organizouse un sorteo na canle de Instagram de Xuventude: @XuventudeGalicia (#DíaDoLibro).
O concurso consiste en dicir a quen lle regalarías un libro neste día e participando pódese conseguir un dos 10 vales de 40€ que sortea a Xunta de Galicia para gastar nas librarías asociadas ao Carné Xove, unha vez abran de novo de xeito físico
Publicamos hoxe a cuarta quenda quenda do ciclo de vídeos de #Porriñodeportenacasa. Ana Cristina Oya, segunda adestradora do Club Patín Porriño, amósanos unha sinxela clase de baile para axudarnos a facer exercicio e levar mellor a corentena.
Lembramos que o Concello, a través da Concellería de Deportes e coa inestimable colaboración dos clubs locais, iniciou o pasado venres 17, este ciclo baixo o hashtag #Porriñodeportenacasa. Coa participación dos preparadores e técnicos dos diferentes clubs porriñeses, ofrecemos diversas rutinas de exercicios de mantemento físico para diversos niveis e idades.
Nas tres entregas anteriores foron Ana Alonso, preparadora física do Balonmán Porriño , Xoel Souto, da U.D. Atios e Mary Atós do Club Patín Porriño, os encargados de darlles pautas de mantemento físico.
Hoxe dez voluntarios comezaron a envasar a seguinte remesa de máscaras de protección que o Concello do Porriño vai distribuír entre a poboación, casa por casa e tamén nos establecementos que poden estar abertos. En total é unha partida de 13.000 máscaras. O traballo realizase no salón de plenos do Concello e continuará durante os vindeiros días. O concelleiro de Servizos Sociais, David Alonso que participou nestas tarefas quixo destacar a colaboración dos alumnos do curso de “Cross-fit” do ximnasio local “Jovhe Sport”.
Esta mesma tarde reanudarase o reparto porta a porta con dous grupos. Un deles distribuirá polo centro urbano e o outro pola parroquia de Torneiros. Nos vindeiros días continuara o envasado e reparto de máscaras polo Concello.
Estas máscaras de protección son de tela, lavables a 90 graos e reutilizables. Están confeccionadas por mulleres de O Porriño grazas ás doazóns de tecido que recibiron. Antes do seu envasado, foron esterilizadas. No envase aparece unha pegatina co logo do Concello do Porriño e instrucións para o seu uso e conservación. E lembrase a importancia de seguir mantendo a distancia de seguridade entre persoas (metro e medio a dous metros) e de lavarse asiduamente as mans.
Hoxe, xoves 23 de abril, celebramos o Día Internacional do Libro. Pero temos que facerllo dende a casa. Así que o departamento de Cultura do Concello e a Biblioteca Municipal lembran a oferta de contidos, lecturas e recursos on line que están a ofrecervos para facer máis levadeira esta corentena. http://ecultura.net/suxerencias-da-biblioteca-municipal/
Eva García, alcaldesa de O Porriño poñerá en común cos voceiros dos restantes grupos políticos da corporación, a proposta de acordar unha modificación orzamentaria para destinar fondos e partidas que non van a empregarse en axuda social aos máis desfavorecidos e apoio aos sectores económicos máis sensibles do municipio.
A proposta do goberno municipal consiste en destinar achegas e partidas orzamentarias que non se empregarán, por exemplo, en eventos deportivos ou festivos, para manter axudas por emerxencia social nos colectivos máis castigados polo confinamento, e tamén, empregar eses cartos en inxectar liquidez no tecido do pequeno comercio e hostalaría para axudarlles a remontar a crise.
A alcaldesa trasladará esta proposta aos grupos políticos na vindeira reunión da Comisión Municipal Especial de Seguimento do Covid-19 que volverá a reunirse o vindeiro luns 27. Nesa reunión, o goberno municipal tamén informará aos voceiros dos restantes grupos da corporación, das medidas despregadas ata de agora polo Concello en materia de limpeza, desinfección, achegas de axudas alimentarias e económicas á poboación en risco de exclusión e outras accións en diferentes eidos. Asimesmo nesa reunión, goberno e grupos comezarán a estudar como pode ser a desescalada a nivel local segundo as pautas que marquen tanto o Goberno Central como a Xunta de Galicia.
Finalmente, na reunión de Comisión de Seguimento do Covid-19, alcaldesa e grupos acordarán a data e o xeito de celebración dun pleno da corporación municipal. Decidirase se é presencial coas medidas de hixiene e aloxamento precisas ou ben telemática. O Concello do Porriño dispón do programa “Séneca” (o mesmo que ten o Parlamento de Galicia, por exemplo) que permite a celebración de sesións telemáticas. E por outra banda, a Deputación Provincial implementou o sistema “Xestiona” para que os concellos pontevedreses poidan celebrar reunións “on line” dos seus órganos de goberno.
Esta mañá, a factoría do grupo “Coren” no Porriño fixo entrega dunha nova doazón de produtos ao Concello para o Banco de Alimentos “SOS Porriño”. Esta achega, como outras procedentes de empresas da contorna, adquiren unha importancia moi grande debido ao incremento de demandantes de axuda alimentaria na vila, a consecuencia de prolongarse o estado de alarma. David Alonso, concelleiro de Servizos Sociais, persoal de Protección Civil e voluntarios do Banco de Alimentos recolleron os lotes que un camión de “Coren” trasladou ata o almacén de “SOS Porriño”.
Publicamos hoxe a terceira quenda do ciclo de vídeos de #Porriñodeportenacasa. Mary Artos, primeira adestradora do Club Patín Porriño, amósanos exercicios para a columna e zona lumbar para o mellor coidado das nosas costas.
Lembramos que o Concello, a través da Concellería de Deportes e coa inestimable colaboración dos clubs locais, iniciou o pasado venres 17, este ciclo baixo o hashtag #Porriñodeportenacasa. Coa participación dos preparadores e técnicos dos diferentes clubs porriñeses, ofrecemos diversas rutinas de exercicios de mantemento físico para diversos niveis e idades.
Nas dúas primeiras entregas foron Ana Alonso, preparadora física do Balonmán Porriño e Xoel Souto, da U.D. Atios os encargados de darlles pautas de mantemento físico aos nosos maiores para mellor levar o confinamento. https://youtu.be/RZRrufkRNkU
O Concello do Porriño anuncia, a través de “Porremprego”, que dende esta semana abrese o proceso de preselección de aspirantes á contratación de 24 postos de traballo eventuais durante seis meses que reforzarán diferentes servizos municipais. O proceso realizase a través da oficina do Servizo Público de Emprego (SEPE).
Segundo informa “Porremprego”, as persoas que estean interesadas en participar na preselección que fará a oficina do SEPE terán que poñerse en contacto a través do correo electrónico oficina.emprego.porrino@xunta.es ou a través do teléfono 886 110 404. Deste xeito pode´ran comprobae se xa están inscritos cos códigos correspondentes nas ocupacións demandadas ou ben anotarse no caso de non estiveran inscritos.
A selección final e contratación levarase a cabo en “Porremprego”, servizo dependente do Concello do Porriño, entre as persoas preseleccionadas polo SEPE. Evidentemente ese proceso final de selección e contratación terá lugar cando demita a actual situación de estado de alarma.
Lembramos que as prazas que se convocan son: 1 traballador/a social; 1 diplomado/a en Turismo; 3 oficiais de carpintería; 2 oficiais de primeira soldador; 1 oficial de primeira electricista; 4 oficiais de primeira de albanelería; 2 peóns de obras públicas; 1 auxiliar de enfermería; 2 auxiliares de biblioteca; 1 auxiliar técnico de informática/arquivo; 2 peóns forestais; 2 peóns de limpeza e 2 conserxes. Todos eles a contratar a xornada completa durante seis meses.
O Concello disporá de 247.680 € para aboar eses 24 contratos que é o importe da achega outorgada pola Deputación Provincial a través da Liña 3 do Plan Concellos 2020.
Axentes da Policía Local e voluntarios de Protección Civil repartirán a domicilio máscaras de protección reutilizables e lavables para os veciños e veciñas de O Porriño.
O reparto realizarase tanto no casco urbano como nas parroquias, porta a porta. Tamén distribuíranse nos establecementos comerciais que permanecen abertos. Nunha primeira quenda que comezará entre esta tarde e mañá martes, repartiranse 3.000 máscaras e nos vindeiros días agardase chegar a distribuír máis de 20.000, segundo estimacións do goberno municipal.
Veciñas de O Porriño realizan, de xeito desinteresado, estas máscaras con tecido doado por firmas téxtiles da contorna. Despois da súa elaboración son esterilizadas e logo envasadas nunha bolsa na que aparece unha etiqueta que informa que son reutilizables, lavables a unha temperatura recomendada de 30 graos e que se recomenda gardar unha distancia social entre persoas e manter a hixiene nas mans.