Novas

O Porriño acolle a IV Xuntanza Literaria con máis de 400 participantes e unha clara aposta pola lingua, a inclusión e a cultura

  • A palabra, a literatura e a música convertéronse no fío condutor dunha xornada de convivencia, inclusión e orgullo pola identidade cultural galega.

O Porriño, 15 de maio de 2025.– O Porriño acolleu hoxe a IV Xuntanza Literaria no parque Alba de Torneiros, unha actividade organizada polos departamentos de Biblioteca dos centros educativos do municipio, coa colaboración da Concellería de Educación, Normalización Lingüística e da OMIX. A xornada, que contou coa participación de máis de 400 persoas, converteuse nunha verdadeira festa da lectura, da inclusión e da lingua galega.

Desde as 10:30 e ata as 13:00 horas, alumnado, docentes, usuarios do Centro de Día de Torneiros, membros de ACEESCA e da Asociación AFAGA compartiron espazos de lectura individual e colectiva, recomendacións lectoras e mesmo unha merenda, todo nun ambiente distendido e interxeracional que encheu de vida o parque.

Durante o acto, o alcalde Alejandro Lorenzo destacou a importancia de que “O Porriño siga apostando por iniciativas que reforzan a nosa identidade cultural, fomentando o uso do galego desde as primeiras etapas da vida e involucrando a toda a comunidade”. Para o rexedor, este tipo de propostas “teñen un impacto real no tecido social, porque mesturan educación, cultura e convivencia”.

Un dos aspectos máis destacados desta edición foi o enfoque inclusivo e interxeracional, co obxectivo de promover a participación activa de persoas maiores e con diversidade funcional xunto á mocidade e á infancia. Tal como indicou a concelleira de Educación, Carolina González, “A Xuntanza Literaria é moito máis ca unha actividade lectora: é un espazo onde se constrúe respecto, empatía e sentimento de pertenza a través da palabra e da música”.

Ao longo da mañá, tamén houbo lugar para a música como ferramenta de expresión e canle de aprendizaxe. A actuación de Javier Becerra e Carolina Rubirosa, co espectáculo didáctico Isto é rock!, fixo vibrar ao público cun percorrido lúdico pola historia do rock, ofrecendo un enfoque accesible para todas as idades e facendo partícipes aos asistentes dun concerto que mesturou cultura musical e diversión.

A actividade contou coa implicación dos seguintes centros: CPR Santo Tomás, IES Pino Manso, ACEESCA, CEIPP Fernández López, CPR Hermanos Quiroga, CEIPP Antonio Palacios, IES Ribeira do Louro, CEIP da Cruz-Budiño, CEIPP de Atios, Centro de Día de Torneiros, Asociación AFAGA e CEIPP da Ribeira. Unha representación ampla e diversa do Porriño que demostra o compromiso común coa educación e coa lingua.

O alcalde, Alejandro Lorenzo, quixo agradecer o traballo de todas as persoas implicadas, especialmente dos centros educativos e entidades colaboradoras: “Este é un claro exemplo de como o Concello, xunto coa comunidade educativa, pode colaborar en proxectos que sementan valores de inclusión, cultura e respecto pola nosa lingua”

Con esta IV Xuntanza Literaria, o Concello do Porriño reafirma o seu compromiso co fomento do galego e coa integración social a través da cultura, facendo da palabra e da música vehículos de convivencia, aprendizaxe e orgullo identitario.

15/05/2025 in Sen categoría

Recoñecemento merecido para Laura Carmona polo seu éxito na “Voz Kids”

  • A homenaxe recoñeceu o paso de Laura Carmona polas audicións a cegas de La Voz Kids, onde, con só 14 anos, superou con éxito a primeira fase do concurso musical televisivo.

O Porriño, 15 de maio de 2025.– O Concello do Porriño rendeu este martes unha emotiva homenaxe a Laura Carmona, unha nova porriñesa de tan só 14 anos que vén de superar con éxito as audicións a cegas do prestixioso concurso televisivo La Voz Kids.

Durante o acto, celebrado na casa consistorial, o alcalde Alejandro Lorenzo quixo poñer en valor “o talento, o esforzo e a valentía” de Laura, destacando que “representa con orgullo a nosa vila e demostra que os soños poden cumprirse cando se traballa por ele”s.

“Laura emocionounos a todos cunha interpretación marabillosa, en galego, dun tema tan noso como Lela. Non só levou o seu talento á televisión nacional, senón que fixo que o noso idioma e a nosa cultura brillaran tamén nese escenario. Para O Porriño é un orgullo contar con unha artista coma ela”, subliñou o rexedor.

A actuación de Laura, quen escollera a versión de Dulce Pontes do tema composto orixinalmente por Castelao, conquistou ao xurado do programa desde o primeiro momento. Cunha voz doce e chea de emoción, conseguiu que un dos coaches virase a súa cadeira, garantindo así o seu pase á seguinte fase do concurso.

Natural de O Porriño, Laura leva cantando desde os cinco anos no coro dirixido polo seu pai. Ademais de cantar, tamén toca a pandeireta, algo de piano e órgano, e ten formación en baile. A música corre polas súas veas, pois tanto o seu pai como o seu irmán son guitarristas. Porén, o logro acadado no plató de La Voz Kids foi froito do seu talento e dedicación persoal.

Con esta homenaxe, O Porriño quixo recoñecer publicamente a traxectoria e o futuro prometedor dunha artista que, sen dúbida, dará moito que falar nos escenarios.

15/05/2025 in Cultura e festas

A nova unidade móbil da Policía Nacional permite renovar o DNI e Pasaporte no Porriño ao instante

 

Ademais do DNI, a VIDOC permitirá a veciñanza expedir ou renovar o pasaporte sen necesidade de desprazarse a outros municipios.

As persoas interesadas en renovar ou expedir os seus documentos a través desta unidade deben solicitar cita previa nas dependencias da Policía Local do Porriño.

 

O Porriño, 14 de maio de 2025.- O novo Vehículo Integral de Documentación (VIDOC) da Policía Nacional estivo hoxe no Porriño, facendo parada na Praza do Concello, onde os veciños e veciñas tiveron a oportunidade de expedir ou renovar ao momento o seu Documento Nacional de Identidade (DNI) e por primeira vez tamén o pasaporte sen ter que desprazarse a outra localidade.

Este novo servizo, dependente da Comisaría de Vigo-Redondela, supón un importante avance na prestación deste tipo de trámites, especialmente para os municipios que, como O Porriño, non contan con unidades fixas da Policía Nacional.

O alcalde do Porriño, Alejandro Lorenzo, foi un dos primeiros en renovar o seu DNI na unidade móbil, e destacou a importancia da iniciativa: “Este tipo de servizos melloran a calidade de vida da veciñanza e afondan na igualdade de acceso aos recursos públicos, especialmente para as persoas maiores ou con dificultades de mobilidade. Agradecemos á Policía Nacional esta aposta pola proximidade.”

O VIDOC permite realizar toda a tramitación no momento e nun único desprazamento, grazas á súa capacidade tecnolóxica para a emisión instantánea dos documentos. Ata agora, a expedición do pasaporte só se realizaba en dependencias policiais, e para o DNI era necesario acudir en dúas fases a unidades móbiles que logo se desprazaban novamente para a entrega dos documentos xa emitidos.

O vehículo regresará ao Porriño de forma regular. As persoas interesadas en renovar ou expedir os seus documentos a través desta unidade deben solicitar cita previa nas dependencias da Policía Local do Porriño.

 

 

14/05/2025 in Seguridade, Sen categoría

A partir do mércores, 14 de maio, o aparcadoiro da rúa Pontevedra estará pechado por obras na zona

O Porriño, 13 de maio de 2025

O Concello informa á veciñanza que a partir das 9.00h do mércores 14 de maio non se poderá aparcar no aparcadoiro da Rúa Pontevedra debido ao inicio de obras na zona. 

A área afectada está sinalada en vermello no mapa adxunto. 

Agradecemos a vosa colaboración e comprensión durante o tempo que duren os traballos. 

Desculpade as molestias. 

13/05/2025 in Sen categoría

O Concello do Porriño e a protectora INMA reúnense para combater o maltrato animal

  • Esta colaboración incluirá campañas de sensibilización, formación e apoio nas denuncias ante as autoridades competentes, así como coa participación activa da Concellería de Medio Ambiente e da Policía Local.
  • O vindeiro 17 de maio, a asociación INMA instalará un punto informativo na praza Arquitecto Antonio Palacios, en horario de 17:00 a 21:30 horas, onde se dará a coñecer o seu labor

 

O Porriño, 13 de mayo de 2025.– Tras a aparición de varios casos de violencia exercida sobre gatos comunitarios, o Concello do Porriño e a asociación protectora de animais INMA mantiveron unha reunión de coordinación para reforzar a súa implicación na loita contra o maltrato animal. Esta colaboración incluirá campañas de sensibilización, formación e apoio nas denuncias ante as autoridades competentes, así como coa participación activa da Concellería de Medio Ambiente e da Policía Local.

A finais de decembro de 2024, o Concello do Porriño adxudicou á asociación INMA o contrato para a xestión das colonias felinas, un servizo que ten como obxectivo garantir o benestar destes animais e o control da súa poboación, aliñándose coa lexislación vixente e promovendo unha xestión ética e responsable.

A pasada semana, INMA puxo en coñecemento do Concello un grave suceso: a morte dun gato pertencente a unha colonia controlada, tras recibir dous disparos. O animal foi atopado pola súa alimentadora habitual agochado na súa caseta, con dificultade para moverse e un comportamento máis dócil do habitual. Foi trasladado con vida á clínica veterinaria, onde faleceu poucas horas despois. A necropsia revelou dous proxectís, un aloxado no fémur e outro na cavidade abdominal.

Unha vez coñecido o suceso, os feitos foron comunicados a Garda Civil, solicitando unha investigación para esclarecer os feitos e localizar ao autor ou autores. A Policía Local está colaborando activamente na investigación e reforzará a vixilancia nas zonas onde existen colonias felinas.

Desde o Concello quérese seguir traballando por unha mellora real na vida dos animais e fomentar unha convivencia pacífica entre estes e a veciñanza. Neste sentido, o Concello e a asociación INMA porán en marcha unhas xornadas informativas de concienciación contra o abandono e o maltrato animal, abertas a toda a cidadanía.

Así mesmo, o vindeiro 17 de maio, a asociación INMA instalará un punto informativo na praza Arquitecto Antonio Palacios, en horario de 17:00 a 21:30 horas, onde se dará a coñecer o seu labor, promoverase a concienciación sobre o benestar animal e ofreceranse vías para que a cidadanía poida colaborar como voluntaria.

O alcalde, Alejandro Lorenzo, declarou que “esta colaboración é un paso máis na nosa loita pola protección animal. Queremos que Porriño sexa un lugar onde os animais sexan tratados con respecto e cariño”.

Pola súa banda, a presidenta da asociación INMA, Ana Dios, afirmou que “a colaboración entre Concello, asociación, persoas alimentadoras e cidadáns é fundamental para lograr o noso obxectivo: axudar ao maior número de animais posible e garantir o seu benestar”.

Lémbrase que todas aquelas persoas que alimenten colonias felinas deben rexistralas no Concello, presentando o Anexo I do protocolo de control de colonias felinas, aprobado definitivamente o pasado 21 de marzo de 2025.

Por último, desde o Concello faise un chamamento á veciñanza para colaborar activamente coa protección dos animais. As persoas interesadas en ser voluntarias poden contactar coa asociación INMA no teléfono 623 59 39 53, por correo electrónico a inmaasociacion@gmail.com ou a través das redes sociais (Facebook e Instagram). Precísanse voluntarios para alimentación de colonias, recollidas solidarias de alimentos, casas de acollida para nais e crías, traslados a clínicas veterinarias e labores de coidado no refuxio.

13/05/2025 in Sen categoría

O Concello do Porriño destina preto de 94.000 euros á renovación e mantemento dos parques infantís e áreas biosaudables

  • Os traballos abranguen espazos localizados nas parroquias de Cans, Torneiros, Mosende e Budiño así como a adquisición de nova maquinaria co obxectivo de reforzar o mantemento regular destas áreas.

O Porriño, 12 de maio de 2025.– O Concello do Porriño vén de poñer en marcha un ambicioso plan de renovación e mellora que afecta a cinco parques infantís e unha área biosaudable repartidos por distintas parroquias do municipio. Estes traballos, que teñen un prazo estimado de execución de seis meses, contan cun orzamento total de 74.300 euros, dos cales 10.900 euros proceden de fondos propios do Concello, e o resto está financiado a través do Plan + Provincia 2024 da Deputación de Pontevedra.

“Estas actuacións responden a un compromiso firme do goberno municipal coa seguridade e benestar das nosas familias, especialmente dos máis pequenos”, subliñou o alcalde, Alejandro Lorenzo, quen destacou que os parques infantís son espazos clave para o desenvolvemento físico, emocional e social da infancia.

As actuacións incluirán a instalación de novos pavimentos amortecedores de impacto, a restauración de xogos danados, a renovación de valados perimetrais e a incorporación de novo equipamento biosaudable. Ademais, todos os espazos contarán con carteis informativos que recollerán datos como as idades recomendadas, teléfonos de contacto para mantemento e emerxencias, e normas de uso que garantan un lecer seguro e responsable.

Os traballos abranguen espazos localizados nas parroquias de Cans, Torneiros, Mosende e Budiño. No caso de Cans, realizaranse melloras tanto no parque da Graña como no do Río  Couso, con especial atención á renovación do pavimento e á reubicación dos elementos biosaludables. En Torneiros actuarase tanto no parque infantil da Fase I, onde se renovará o valado perimetral e a cancela de acceso, restauraranse os elementos de multixogo e instalaranse porterías antivandálicas, como tamén no parque do Alba, onde se substituirán os actuais elementos da área biosaudable por outros novos. No parque da Costeira, en Mosende, acometerase unha mellora integral que inclúe a substitución da valla, o acondicionamento do terreo e a instalación de céspede artificial. Finalmente, en Budiño, no parque da Forna, renovarase completamente a área infantil cun novo deseño de espazo e equipamento, ademais da mellora da superficie e dos bordos.

En paralelo ás obras de mellora, o Concello do Porriño tamén vén de investir na adquisición de nova maquinaria co obxectivo de reforzar o mantemento regular destas áreas. Neste sentido, realizouse unha compra por un importe total de arredor de 19.700 euros, que inclúe un cortacéspede profesional con tracción total e un remolque de grandes dimensións equipado con freos, ramplas e estrutura reforzada. Esta nova dotación permitirá ao servizo municipal de mantemento actuar con maior eficacia e garantir o bo estado das áreas de xogo durante todo o ano.

O concelleiro responsable da área, Marcos Martínez, explicou que este proxecto permite dar resposta a numerosas demandas veciñais acumuladas nos últimos anos e que supón un salto cualitativo tanto en seguridade como en accesibilidade. “Estamos a traballar para que todas as crianzas do Porriño poidan desfrutar de espazos renovados, seguros e atractivos. Pero tamén estamos pensando no día despois: por iso investimos tamén en nova maquinaria para o mantemento, para garantir que estes espazos se manteñan en bo estado durante todo o ano”, afirmou.

O equipo de goberno salienta que esta intervención é unha mostra máis da súa aposta polo equilibrio territorial e polo benestar das familias, e que continuará na mesma liña con novos proxectos nas distintas parroquias. “Queremos que todos os nenos e nenas do Porriño, vivan onde vivan, conten con áreas de xogo seguras, modernas e accesibles. Esta é unha aposta decidida pola igualdade de servizos e pola mellora do espazo público en todo o termo municipal”, concluíu o alcalde.

12/05/2025 in Parques e xardíns, Sen categoría

A Xunta de Galicia centra no Porriño as celebracións do Día de Europa

  • Unha exposición itinerante sobre fondos europeos permanecerá dúas semanas no Porriño antes de continuar o seu percorrido por outras localidades galegas.
  • Durante a tarde, as actividades continuarán con xogos infantís, un espectáculo de maxia e un concerto da cantante Helena Egea, que porá o broche festivo á celebración.

O Porriño, 9 de maio de 2025.– O Concello do Porriño acolleu este venres os actos oficiais do Día de Europa en Galicia, nunha xornada que reuniu a representantes da Xunta, da corporación municipal e da comunidade educativa. A celebración incluíu actividades para a rapazada, o izado da bandeira europea, discursos institucionais e a inauguración dunha exposición itinerante sobre os fondos europeos.

No acto participaron o alcalde do Porriño, Alejandro Lorenzo, xunto co conselleiro de Facenda, Miguel Corgos, o director xeral de Relacións Exteriores e coa Unión Europea, Jesús Gamallo, o director xeral de Fondos Europeos, Ángel Tarrío, o delegado territorial de Educación, César Pérez, así como membros da corporación municipal e representantes do CEIP Xosé Fernández López.

Durante a súa intervención, o alcalde Alejandro Lorenzo subliñou o compromiso do municipio co proxecto europeo e o impacto positivo dos fondos comunitarios no desenvolvemento local: “Europa constrúese aquí, nas nosas vilas, nos centros educativos, nas asociacións e nas administracións locais. Porriño é unha vila chea de pasado, presente e futuro, e é hoxe un exemplo vivo de como os fondos europeos contribúen a mellorar a calidade de vida da cidadanía”, asegurou.

Pola súa parte, o conselleiro Miguel Corgos destacou o papel fundamental destes fondos na modernización de Galicia, tanto no medio urbano como no rural: “Os fondos europeos son unha ferramenta esencial para avanzar nunha Galicia máis cohesionada e con máis oportunidades. Desde a Xunta facemos unha xestión rigorosa e eficaz destes recursos, que se traducen en investimentos reais en ámbitos como a educación, a sanidade, a innovación, o medio ambiente ou a mellora das infraestruturas”, sinalou. Tamén puxo en valor a colaboración entre administracións para asegurar que os fondos cheguen ao territorio e dean resposta ás necesidades reais da poboación.

A mañá comezou coa participación do alumnado do CEIP Xosé Fernández López, que se implicou activamente en xogos e actividades lúdicas relacionadas coa Unión Europea. Posteriormente tivo lugar o izado da bandeira da UE desde o balcón do Concello e a lectura das declaracións institucionais na praza.

A xornada serviu tamén para inaugurar unha exposición itinerante sobre fondos europeos, composta por 16 paneis informativos que explican a historia e o funcionamento de programas como o FEDER, o Fondo Social Europeo, o Fondo de Transición Xusta ou os Plans Estratéxicos da PAC. A mostra permanecerá dúas semanas no Porriño antes de continuar o seu percorrido por outras localidades galegas.

Durante a tarde, as actividades continuarán con xogos infantís, un espectáculo de maxia e un concerto da cantante Helena Egea, que porá o broche festivo á celebración.

Desde o Concello, convidouse á veciñanza a visitar a exposición e a aproveitar esta oportunidade para coñecer máis de preto como Europa forma parte da vida cotiá do Porriño.

09/05/2025 in Sen categoría

Un soño feito realidade: o BM Porriño xoga a final europea na casa

  • O encontro disputarase este sábado 10 de maio ás 17:00 horas no Pavillón Municipal dos Deportes do Porriño.
  • Mañá sábado a partir das 14:00 horas, poderase desfrutar de ambiente festivo nunha carpa xigante instalada nas inmediacións do pavillón, con degustación de callos e música ambiente, para que a veciñanza poida reunirse antes do encontro. Habilitarase un servizo especial de tren para facilitar os desprazamentos ata o Pavillón así como a realización de visitas turísticas pola vila.

O Porriño, 9 de maio de 2025.– Esta mañá celebrouse no Templete de San Luis o acto de presentación oficial do partido de ida da FINAL DA EUROPEAN CUP FEMININA 2025, que enfrontará ao Conservas Orbe ZENDAL BM Porriño contra o club islandés Valur. Un evento que marca un antes e un despois no deporte galego e, especialmente, no balonmán feminino.

O alcalde do Porriño, Alejandro Lorenzo, puxo en valor o significado desta cita para a vila. Destacou que “esta final é moito máis que un partido: é o reflexo do traballo, da constancia e do talento das nosas xogadoras, e un orgullo para toda a vila. O Porriño converterase este sábado nun referente do deporte feminino europeo”. Lorenzo animou tamén á cidadanía a participar deste momento histórico: “Agardamos ver o pavillón cheo, con todas e todos arroupando ao equipo e gozando deste momento único. Sentir ese alento desde as bancadas será fundamental para as xogadoras”.

O alcalde tamén quixo compartir a súa implicación persoal co club ao longo dos anos: “Como alcalde, nada me enche máis de orgullo que ver a un club da nosa vila chegar tan alto. Este soño empezou a facerse realidade hai pouco máis dun mes e hoxe está ás portas de culminar. Deséxolles o mellor, e sobre todo, que gocen cada segundo como o estamos facendo toda a vila”. Así mesmo manifestou o agradecemento ao equipo e todas as administracións e empresas implicadas que fan posible que este soño se faga realidade.

O encontro disputarase este sábado 10 de maio ás 17:00 horas no Pavillón Municipal dos Deportes do Porriño, e a vila xa respira a emoción desta cita continental. A final europea supón un fito sen precedentes tanto para o club como para toda a comunidade local.

Abel Estévez, presidente do Club Balonmán Porriño e concelleiro de Deportes, afirmou que “non só estamos facendo historia deportiva, senón tamén social: poñemos en valor o balonmán feminino e demostramos que desde un concello como O Porriño podemos chegar á elite europea”.

A capitá do Conservas Orbe ZENDAL BM Porriño, Sarai Samartín, tamén tomou a palabra no acto para expresar o sentir do vestiario: “Imos deixar todo na pista. Xogar esta final diante da nosa xente é un soño feito realidade e queremos que sexa unha festa do balonmán”.

O evento contou coa participación do adestrador do primeiro equipo, Ismael Martínez, e outras autoridades locais e deportivas. Ao remate da presentación, celebrouse un Media Day oficial, no que xogadoras e corpo técnico estiveron á disposición dos medios de comunicación para entrevistas, fotografías e declaracións.

Como parte da celebración desta xornada histórica, mañá sábado a partir das 14:00 horas, poderase desfrutar de ambiente festivo nas inmediacións do pavillón, con degustación de callos e música ambiente, para que a veciñanza poida reunirse antes do encontro. Ademais, habilitarase un servizo especial de tren para facilitar os desprazamentos ata o Pavillón así como a realización de visitas turísticas pola vila.

Dende o Concello, animase a toda á cidadanía a formar parte deste día inesquecible para o deporte feminino galego.

09/05/2025 in Deportes, Sen categoría

O Porriño acolle o Encontro coas Empresas e presenta o Foro Empresarial como ferramenta clave para defender o seu liderado industrial

 

O Concello do Porriño celebrou hoxe o “Encontro coas Empresas do Porriño”, un acto institucional que serviu para afianzar o diálogo público-privado co tecido empresarial local e presentar oficialmente o Foro Empresarial do Porriño, unha entidade que nace para canalizar de forma unitaria as necesidades do sector ante as administracións.

O evento contou coa presenza do presidente da Xunta de Galicia, Alfonso Rueda Valenzuela, recibido polo alcalde do Porriño, Alejandro Lorenzo, a conselleira de Economía e Industria, María Jesús Lorenzana, a delegada territorial da Xunta en Vigo, Ana Ortiz Álvarez, o presidente da Entidade Urbanística do Polígono da Granxa, Indalecio Cuevas, así como por representantes de diferentes entidades empresariais da provincia de Pontevedra.

Durante a súa intervención, Cuevas destacou que “xuntos camiñaremos mellor cara a ese compromiso de investimento, crecemento e valores que a industria necesita”, e agradeceu ao Concello “a súa colaboración na creación deste foro imprescindible para unirnos ante as institucións”. Entre as demandas expostas, subliñou a necesidade da gratuidade do servizo de transporte Puxeiros–Tui para os traballadores, así como a necesidade de desconxestionar as comunicacións con Vigo e de facer realidade a cidade do transporte, pendente dende hai máis de doce anos.

Tras a proxección dunha reportaxe cos datos socioeconómicos do municipio, o alcalde Alejandro Lorenzo puxo en valor o peso industrial do Porriño, “é o pulmón industrial de Galicia; do que temos que presumir”, e explicou que o seu compromiso coa industria foi claro dende o primeiro día: “Cando cheguei á alcaldía comprometinme cos empresarios a que O Porriño debía ser un Concello Emprendedor. Hoxe xa o é”. Isto tradúcese en prioridade para subvencións, melloras nos polígonos e beneficios directos para as empresas. “Mentres outros concellos soben impostos, O Porriño os bonifica”, subliñou.

Sobre o Foro Empresarial, Lorenzo indicou que se trata dunha iniciativa fundamental que terá todo o apoio e colaboración institucional do goberno local: “O Foro permitirá unha interlocución directa e eficaz coas administracións para mellorar a competitividade da nosa industria, do comercio e dos demais sectores produtivos. Dende o Concello estaremos sempre ao lado de todo o que contribúa a que O Porriño siga medrando con forza”, afirmou o rexedor.

Pechando o acto, o presidente da Xunta, Alfonso Rueda, reafirmou o compromiso do Goberno galego coa industria e co tecido empresarial: “As empresas necesitan das administracións, pero as administracións tamén necesitan das empresas. O Porriño é un núcleo estratéxico que non pode perder oportunidades, e desde a Xunta seguiremos apoiando o seu desenvolvemento porque aquí hai talento, esforzo e futuro”, declarou.

O evento concluíu cun espazo de networking distendido na arboreda, no que os asistentes puideron intercambiar ideas mentres degustaban viño galego e os tradicionais callos do Porriño, símbolo gastronómico da identidade local. Ao redor de 250 empresarios e empresarias participaron nesta xornada que consolidou ao Porriño como un referente no desenvolvemento económico de Galicia.

07/05/2025 in Industria

O Consorcio de Augas do Louro alerta de chamadas e visitas dunha empresa allea ao servizo que cuestiona a calidade da auga co obxectivo de vender aparatos para o tratamento da auga da billa

 

O Consorcio de Augas do Louro e Aqualia informan que tiveron coñecemento, nos últimos días, de chamadas telefónicas e visitas a domicilios por parte de persoas alleas ao servizo de abastecemento, durante as cales, alegando presuntos problemas de calidade da auga da billa, instan os veciños a mercar e instalar nas súas casas uns mecanismos para o tratamento da auga.

Estas persoas están a xerar unha alarma inxustificada sobre a calidade da auga subministrada, chegando a realizar nas casas unha proba química enganosa durante a cal a auga da billa vólvese escura, mentres a que eles amosan como tratada polo mecanismo que comercializan non sofre ese cambio de cor.

O Consorcio de Augas do Louro quere deixar claro que a calidade da auga subministrada polas redes municipais está garantida por un exhaustivo sistema de control sanitario que a certifica como TOTALMENTE APTA PARA O CONSUMO HUMANO. Ademais, informa que o Consorcio e Aqualia, como proba do seu compromiso coa calidade do servizo prestado, analizan a auga da rede de distribución en puntos especialmente habilitados para iso, sen necesidade de acceder ao interior das vivendas.

O Consorcio de Augas do Louro quere transmitir a súa plena confianza no exhaustivo control que realiza sobre a auga distribuída nos concellos que xestiona, realizando máis de 23.000 determinacións analíticas ao ano en laboratorios acreditados baixo a norma ISO-17025, cumprindo estritamente co establecido no RD 3/2023, do 10 de xaneiro, polo que se establecen os criterios técnico-sanitarios da calidade da auga de consumo, o seu control e subministración.

Ademais, e como reforzo adicional á calidade da auga que distribúe, quere informar os veciños de que as Autoridades Sanitarias da Xunta de Galicia realizan os seus propios controis de vixilancia nas instalacións municipais, levando a cabo as correspondentes análises de contraste. Deste xeito, a suma dos dous tipos de control garante a calidade da auga subministrada.

Todos os datos relativos á calidade da auga distribuída e os resultados das mostras analíticas efectuadas poden ser consultados a través do Sistema de Información Nacional de Consumo –SINAC– do Ministerio de Sanidade.

O Consorcio de Augas do Louro e Aqualia reiteran o seu compromiso cos veciños e traballan día a día para ofrecer auga de gran calidade, poñendo ao dispor do servizo os medios humanos e técnicos máis avanzados que garantan un exhaustivo control da auga subministrada.

Para máis información:

900 810 103

contacto@consorcio.es

www.aqualia.com

https://www.aqualia.com/es/area-de-cliente/prevencion-fraudes

07/05/2025 in Sen categoría