Novas

• Convoca aos comerciantes da vila a unha xuntanza o vindeiro martes 26 para avaliar a súa reposta a esta iniciativa e escoitar posibles propostas co fin de dar visibilidade e incrementar a competitividade do comercio de proximidade, converténdoo nun motor de atracción para toda a veciñanza e visitantes

O Porriño, 23 de agosto de 2025.- En resposta ao éxito acadado na última edición e á demanda dos propios comerciantes de continuar coa iniciativa noutra época do ano, o Concello do Porriño ten programada unha nova shopping night. “A alta participación na última edición fíxonos pensar en que volver a repetila agora, coincidindo co mes festivo por excelencia da nosa vila, sería unha boa oportunidade, como un novo impulso ao noso comercio, á vez que funciona tamén como atractivo de visitantes”, explica o alcalde Alejandro Lorenzo.

É por este motivo, polo cal dende o Concello do Porriño convidan a todo o comercio do municipio a unha xuntanza o vindeiro martes, 26 de agosto, ás 21.00 horas, na casa consistorial. “Querémoslle trasladar a nosa proposta para avaliar as súas reaccións, á vez que escoitaremos as súas propostas, ben sexa respecto deste evento ou doutros posibles que poidan xurdir, todo elo en beneficio da nosa vila e de empuxe do comercio como motor económico”, subliña o rexedor. Será un encontro coa intención de establecer un feedback entre o Concello e o colectivo de comerciantes, escoitando as súas demandas de cara a poder seguir traballando nesta liña de avance e de colaboración.

“O obxectivo é continuar fortalecendo o vínculo entre o Concello e o tecido comercial, afondando nun traballo conxunto que permita desenvolver novas iniciativas que poñan en valor o noso comercio de proximidade”, sinala a concelleira de Comercio, Rosa Isabel Alonso. A edil explica que a shopping night naceu dentro da Fashion Weekend, que se leva celebrando os últimos tres anos no mes de abril. “A resposta sempre foi moi boa e de aí que consideremos un momento idóneo volver celebrala agora en setembro, coincidindo coas Festas do Cristo, como un atractivo máis tanto para veciños como para visitantes”.

Será unha noite na que os establecementos comerciais da vila abrirán as súas portas en horario especial, dende as 21.00 horas ata a medianoite, ofrecendo propostas dinamizadoras, descontos, sorteos, agasallos e moitas sorpresas, e onde tampouco faltará a música para amenizar as compras.

“Dende o Concello somos conscientes da importancia que ten o comercio local na dinamización económica e social do Porriño, por iso apostamos decididamente por seguir promovendo accións que lle dean visibilidade, que aumenten a súa competitividade e que o convertan nun motor de atracción de persoas á nosa vila”, incide o alcalde.

A través desta e doutras propostas, o Concello do Porriño reafirma o seu compromiso de apoio continuo ao sector, escoitando as súas necesidades e propoñendo solucións reais que contribúan ao seu crecemento. “Queremos que O Porriño sexa un referente, non só polas súas festas e eventos, senón tamén pola vitalidade e calidade do seu comercio local”, conclúe Alejandro Lorenzo.

• A Praza Arquitecto Antonio Palacios acolle mañá a proxección do filme “Gru 4 Mi villano favorito” e o domingo tobogán xigante, inchables de auga e festa da espuma
• O barrio de San Sebastián celebra as súas festas patronais e Chenlo o Neno Xesús

O Porriño, 22 de agosto de 2025.- Continúa o cinema na rúa no Porriño. Este sábado, unha nova sesión na Praza Arquitecto Antonio Palacios, a partir das 20.30 horas, coa proxección da película de animación “Gru 4 Mi villano favorito”. E no mesmo lugar, o domingo, de 17.30 a 20.00 horas, como todos os dos meses de xullo e agosto, instalaranse un tobogán xigante e inchables de auga para refrescar a tarde aos máis pequenos da casa rematando con festa da espuma.

De xeito paralelo, no barrio de San Sebastián celébranse as festas que honran ao seu patrón. Mañá sábado, ás 17.30 horas, inchables para a cativada e festa da espuma. A partir das 19.00 horas animación e ás 20.00 horas a tradicional Gran Sardiñada. Pola noite, ás 22.00 horas, actuación de Emilio Rúa, que ofrecerá un concerto en lingua galega facendo un repaso polos seus 25 anos de carreira, nos que editou 160 cancións e publicou unha ducia de discos. Xa o domingo, ás 12.00 horas oficiarase a misa na Igrexa Parroquial de Santa María, seguida da procesión ata a Capela de San Sebastián acompañada polos gaiteiros da Asociación Cultural A Forna. Ao rematar, levarase a cabo a tradicional poxa e deseguido degustación de rosca e bebida. A queima da fachada prevista como broche final das festas queda suspendida ao estar decretado o índice de risco de incendio alto.

Festas do Neno Xesús en Chenlo

A parroquia de Chenlo celebra os días 24 e 25 de agosto as súas festas na honra ao Neno Xesús. O domingo ás 12.00 horas oficiarase a misa cantada polo Coro Voces de Chenlo, seguida de procesión acompañada pola Banda de Música de Porriño. A continuación terán lugar as tradicionais poxas.
Pola noite, actuación da orquestra Galaxia e o trío Luces de Bohemia. Xa o luns, volverá haber misa ás 12.00 horas, acompañada do Coro Voces de Chenlo e a procesión co Grupo de Gaitas Asubío; deseguido, as poxas. A partir das 17.00 horas celebraranse as tradicionais cucañas e ás 22.00 horas verbena amenizada pola orquestra Capitol e o trío La Noche del Grove.

O alcalde Alejandro Lorenzo sinala que “O Porriño continúa a ser un referente en dinamización cultural e festiva durante o verán, tanto no centro urbano como nas parroquias. Esta fin de semana teremos unha ampla oferta para todas as idades, desde cinema ao aire libre ata actividades acuáticas e festas tradicionais onde non faltará a música en directo. Convidamos a toda a veciñanza e a quen nos visita a desfrutar destas propostas pensadas para compartir, divertirnos e seguir poñendo en valor a nosa cultura e tradicións. Grazas ás comisións de festas, ás asociacións e ao persoal municipal polo seu traballo e compromiso”.

• O barrio celebra, dende mañá, tres xornadas cunha exposición de fotos, actividades para a cativada, concerto de Emilio Rúa, unha gran sardiñada e a queima da fachada

O Porriño, 21 de agosto de 2025.- O Porriño celebra dende mañá venres e ata o domingo as festas de San Sebastián. O alcalde, Alejandro Lorenzo, e o concelleiro de Cultura e Festexos, Bienvenido Estévez, presentaron a programación acompañados por representantes da Comisión de festas de San Sebastián convidando a toda a veciñanza a desfrutar destas auténticas festas de barrio. O rexedor destacou que “as festas de San Sebastián son unha mostra da nosa identidade como pobo e do orgullo que sentimos polo noso patrimonio e tradicións. É unha honra para o Concello colaborar coa comisión de festas para manter viva esta celebración que une á veciñanza nun ambiente de alegría e convivencia”. Pola súa banda, o concelleiro de Cultura e Festexos puxo en valor o traballo da comisión organizadora e sinalou que “este tipo de festas non serían posibles sen o esforzo desinteresado de moitas persoas que traballan para que o barrio poida celebrar con orgullo ao seu patrón”.

Este céntrico barrio porriñés honra ao seu patrón con tres xornadas de actividades organizadas pola Comisión de Festas de San Sebastián, en colaboración co Concello do Porriño. A programación arranca mañá venres cunha nova edición da Exposición Fotográfica do Porriño Antigo, que xa está aberta ao público, dende a pasada semana, na Capela de San Sebastián e pode visitarse ata o día 31 deste mes.

O sábado, ás 17.30 horas, inchables para a cativada e festa da espuma. A partir das 19.00 horas animación e ás 20.00 horas a tradicional Gran Sardiñada que este ano chega xa á súa décimo oitava edición. Pola noite, ás 22.00 horas, música en directo da man de Emilio Rúa, que ofrecerá un concerto en lingua galega facendo un repaso polos seus 25 anos de carreira, nos que editou 160 cancións e publicou unha ducia de discos.

O domingo será o día grande. Ás 12.00 horas oficiarase a misa na Igrexa Parroquial de Santa María, seguida da procesión ata a Capela de San Sebastián acompañada polos gaiteiros da Asociación Cultural A Forna. Ao rematar, levarase a cabo a tradicional poxa e a continuación degustación de rosca e bebida.