Deportes

A alcaldesa, que dende hai menos dunha semana é tamén a máxima responsable da área de Deportes do Concello- visitou este mércores as obras da novas instalacións de atletismo da Granxa.

As mesmas, que contarán cun orzamento de 1 millóns de euros, serán unha realidade grazas a unha achega de 800.000€ por parte da Deputación de Pontevedra que, coma todas as inversións do organismo provincial no Porriño, foron asinadas pola propia alcaldesa.

A nova instalación deportiva de A Granxa, que segundo o proxecto estará rematada o vindeiro mes de maio, é “unha aposta de futuro”, sinalou García de la Torre, quen asegurou que porá a dispor dos máis de 650 integrantes do Club Atletismo do Porriño  dunhas “dotacións óptimas e punteiras”.

As mesmas contarán  cun módulo cuberto cunha recta de 6 rúas de 60 metros de lonxitude;  disporá dun teito dotado de lucernarios que permitan o paso da luz natural. A maiores, contará co alumeado axeitado para o desenrolo de competicións e adestramentos e prevese a instalación dun sistema de ‘fotofinish’.

Na parte central da pista executarase un módulo de lanzamento de peso cun aro de formigón provisto dun anel de seguridade. O entorno terá un espazo verde de céspede que integra a instalación coa súa contorna.

As instalacións estarán preparadas para a práctica de distintas modalidades e disciplinas de atletismo, ademais de salto de altura, de lonxitude, triplo salto ou salto con pértega.

A alcaldesa engadiu que á par que se leva adiante a construción deste novo emprazamento deportivo, vaise avanzar no proxecto que permita que as instalacións que están preto do mesmo  dispoñan doutros servizos coma oficinas e vestiarios.

A alcaldesa, Eva García de la Torre, e Manuel Carrera, tenente de alcalde e concelleiro de Deportes do Concello do Porriño, veñen de amosar a súa estupefacción logo de coñecer a decisión, unilateral, dos responsábeis da Interrunning de non seguir  organizando esta proba no Porriño, logo de 12 anos.

García de la Torre e Carrera lamentan esta decisión e rexeitan as formas nas que vén de anunciarse a mesma por parte dos ata hoxe organizadores: nas redes sociais e sen contactar en momento algún, dende a finalización das carreiras deste ano, nin co concelleiro de Deportes nin coa alcaldesa para exponer as posibles diferencias ou discrepancias que puidesen ter co Concello do Porriño.

A alcaldesa e o concelleiro de Deportes subliñan que nunca, en ningún momento nin de xeito algún, os organizadores da Interrunning trasladaron queixa, desencanto ou problema pola actuación do Concello: ao contrario, especialmente este 2018 amosáronse moi satisfeitos porque foi a edición na que máis atletas participaron.

Eva García de la Torre e Manuel Carrera lembran que a colaboración do Goberno local e do Concello do Porriño foi total coa Interrunning, tanto no que se refire nas achegas para esta proba, que na última edición subiron ata os 15.000€, coma en medios materiais e humanos- para facer posible que a proba puidese disputarse, coma a actuación de voluntarios, membros de Protección Civil do Porriño e axentes da Policía Local-.

En calquera caso, o Goberno local, que deplora a deslealdade co Concello do Porriño e cos porriñeses por parte dos responsábeis desta cita, non consentirá que os milleiros de deportistas que participan cada ano se vexan defraudados e, por tanto, na vindeira edición o Concello asumirá directamente a organización da Interrunning o Porriño.

“Non imos a tolerar que mediadores, intermediarios ou xestores externos nos poñan na picota por temas externos, completamente, á Alcaldía e ao Goberno local”. 

O tenente de alcalde e concelleiro de Deportes, Manuel Carrera, a concelleira de Educación, Lourdes Moure, e os responsábeis do Atletismo Porriño, Club Porriño de Baloncesto, Balonmano Porriño, Porriño Industrial, los clubs de fútbol de Mosende, Atios y Pontellas, o Club Ciclista avanza, Patín Porriño, Ximnasia Rítmica Porriño, o Club Baloncesto en Cadeira de Rodas do Porriño e Club Furaventos, veñen de asinar un convenio polo cal os mesmos comprométense a facilitar o acceso de balde a todas as actividades deportivas que estes clubs realicen nas instalacións municipais, a persoas con diversidade funcional.

Manuel Carrera salientou  o “xa coñecido interese e traballo que dende o Concello para impulsar a integración na actividade deportiva das persoas con capacidades diversas, como amosamos en cada unha das iniciativas postas en marcha dende o Goberno local”.

Dacordo con este convenio a Concellería de Deportes creará o  ‘Carné Municipal de Deporte Especial’, que dará dereito ás persoas con diversidade funcional, nun grao recoñecido igual ou superior ao 33%, titulares do mesmo, a entrar a todos os eventos  deportivos organizados polo Concello ou polos clubs que forman parte do Programa Municipal de Axuda Deportiva.

As persoas con diversidade funcional que queiran solicitar este carné- que abrangue, tamén a modalidade de persoas con acompañante- deben de presentar un formulario, acreditar  un grao de diversidade física, mental, intelectual ou sensorial igual ou superior ao 33%,  ter recoñecida unha pensión de incapacidade permanente no grao de total, absoluta ou grande invalidez, e aos pensionistas que teñan unha pensión de xubilación ou de retiro por incapacidade permanente para o servizo ou inutilidade, e estar empadroado no Concello do Porriño.

Estes trámites poden facerse no Centro Deportivo Municipal o nas Oficinas do Rexistro do Concello, ou doutros xeitos establecidos pola lei. Non haberá un prazo determinado, polo cal o carné pode solicitarse en calquera momento e o mesmo pode recollerse, logo do seu trámite, no centro Polideportivo Municipal.

O concelleiro de Deportes do Porriño, Manuel Carrera, e o presidente do Club Furaventos, Gerardo Martínez, presentaron este martes o ‘Campionato de España F3U’ e o ‘Campionato da Liga Galega de Drones’ que organiza o club porriñés por delegación de Real Federación Aeronáutica Española e a Federación Aeronáutica Galega.

A proba, á que acoden 56 pilotos, dende nun circuíto especificamente creado para esta proba, no ‘campo de voo’ de  Furaventos na  parroquia de Pontellas, que o presidente do club cualifica de “moi vertical”, con obstáculos artificiais, e mixto, xa que conta cunha parte de pista e outra de monte, algo anovador nesta competición e que é especialmente atractivo para os participantes que consideran o circuíto porriñés como “un dos mellores de España”.

Manuel Carrera salientou o “excelente labor que con moi poucos recursos e moitos azos” está a levar adiante o Club Furaventos que, lembrou, “dende este ano conta cunha achega da Concellería de Deportes do Porriño”.

Carrera subliñou a “espectacularidade” desta modalidade deportiva e, especialmente, deste campionato onde, sinalou, tomarán a saída drons que “poden pasar de 0 a 100 quilómetros por hora en menos de 2 segundos e chegan a velocidades de ata 140 quilómetros por hora”.

Programa

O programa da proba empezará o venres, día 29, cos adestramentos libres; o sábado, día 29, será o intre das probas clasificatorias e o domingo, pola mañá, chegará a hora das finais das que sairán os campións de cada unha das categorías.

O ‘neno prodixio’ Alex Zamora entre os participantes

Por si o voo destas máquinas non fose incriblemente espectacular, cos pilotos guiando as mesmas utilizando unhas gafas pantalla dende as que poden seguir o trazado (grazas á cámara de a bordo que manda as imaxes en tempo real), outra das grandes ‘atraccións’ desta cita é a participación do cuarto mellor piloto do mundo, o novísimo Álex Zamora, de so 10 anos de idade, e do Erick Carratala, actual campión de España.

Os dous tentarán facer un bo papel nunha proba que é “crucial” dado que os primeiros do campionato chegan moi axustados na clasificación e, ademais, xóganse puntos decisivos para poder facerse cun dos 5 postos na Selección española que disputará o vindeiro mes de outubro, en China, o Campionato do Mundo.

O porriñés Ricardo Baz segue a darnos satisfacción despois de facerse co Campionato de España de Jiu Jitsu, acadando o ouro do seu peso (Nogui) e pendurándose o bronce en ‘kimono’.

Baz, veciño de Atios, xa se fixera con dúas medallas no Campionato de Europa de Jiu Jitsu disputado o 23 de marzo en Roma: unha de bronce na categoría absoluta e a de prata en Peso Medio, levando o nome do Porriño e do seu deporte ao máis alto en Europa.

O CD Choco e C.F. Agrupación Estudiantil disputan este sábado, día 9 de xuño, ás 5 da tarde, no Lourambal, a Final Masculina da XI Copa Deputación de Fútbol. Á final está prevista a asistencia da presidenta da Deputación de Pontevedra, Carmela Silva.

A décima edición Torneo IV Nacións feminino celebrarase a vindeira fin de semana, días 9 e 10 de xuño, no Pavillón Municipal de Deportes do Porriño coa participación de Cataluña, Euskadi, Galicia e Guinea. Ademais, o venres, día 8, ás 8 da tarde, celebrarase un partido amigable, tamén no Porriño, contra a selección de Guinea.

Este torneo se celebra dende hai dez anos, con sedes alternas en Galicia, Euskadi e Cataluña. Á última edición celebrouse en Granollers a finais de 2016 e Galicia proclamouse vencedora, tras gañar na final a Euskadi.

O seleccionador Abel Estévez deu a coñecer a convocatoria para este torneo e o BM Porriño é o club que maior número de xogadoras aporta para a selección galega (seis) e xunto a elas estarán deportistas do Guardés, Carballal, BM Castellón, Logroño Sporting la Rioja e SAR Rodavigo.

Galicia xogará a semifinal o sábado, día 9 ás 6 da tarde contra Guinea, mentres que Cataluña e Euskadi xogarán o primeiro partido (16:15 horas). A final está prevista para o domingo, día 10 ao mediodía.

O Campo do Porriño Industrial, Lourambal, será o lugar elixido pola Federación Galega de Fútbol para o desenrolo do 3ºCurso de Monitor de Fútbol Base, que empezará o vindeiro día 18 de xuño, e que cunha duración de 65 horas habilitará aos asistentes para adestrar nas categorías inferiores.

A presentación deste curso tivo lugar no Concello do Porriño coa presencia da alcaldesa, Eva García de la Torre, o concelleiro de Deportes, Manuel Carrera, o vicepresidente da Federación Galega de Fútbol, Gustavo Falqué, o coordinador do Porriño Industrial C.F., Claudio Giráldez, o Director da Escola de Adestradores da Federación Galega de Fútbol, Manuel Mosquera, e o coordinador dos cursos do Baixo Miño, José Manuel Mosquera.

As persoas interesadas en participar neste curso, que ten un custo de 150€, deben ter,cando menos, 16 anos de idade e poden inscribirse  entrando na páxina web da Federación Galega,  www.futgal.es.

O vicepresidente da Federación Galega de Fútbol salientou a aposta decidida pola preparación dos adestradores para que “as nenas e nenos que practican este deporte estean nas mellores mans e inicien a súa formación neste primeiro ciclo que pode seguir ata a titulación UEFA”.

Os responsábeis da Escola de Adestradores coincidiron na importancia que ten o feito de que os novos técnicos transmitan aos seus xogadores e xogadores, amaís de coñecementos para que sexan mellores deportistas, e valores para que, ademais, mellores persoas.

Pola súa banda, Manuel Carrera, que foi deportista profesional, logo de felicitar ao Porriño Industrial polo seu ascenso, subliñou que no Porriño, na actualidade, hai máis de 1.000 licencias de futbolistas, “un número moi importante…non sei de concellos de 20.000 habitantes, coma o noso que teñan un número tan alto de fichas, ás que hai que engadir as dos resto das modalidades que se practican na nosa vila”.

Por último a alcaldesa, quen amosouse segura de que ao éxito do Porriño Industrial se sumará o do Atios, lembrou a constante colaboración do Concello do Porriño e a Federación Galega de Fútbol, e transmitiu a súa felicitación porque ademais de en aspectos deportivos, este curso “contribúa á formación de persoas, en valores coma a solidariedade, o esforzo, a amizade, a entrega ou o compañeirismo”.

Eva García de la Torre reiterou que O Porriño é o ‘Concello do Deporte’ e, logo de facer un repaso aos éxitos dos equipos e dos deportistas porriñeses este ano, indicou que o Goberno local adica 1 millón de euros anuais, “sobre un total dos 17 millóns que temos nos orzamentos” a subvencionar aos clubs e as prácticas deportivas no noso concello.

O Goberno local do Porriño, dacordo cos organizadores da VI edición do ‘Triatlón Concello do Porriño”, logo da explosión ocorrida no barrio de Paramos, en Tui, veñen de decidir a suspensión da proba que ía disputarse o vindeiro sábado día 26 de maio. Hai que lembrar que parte do percorrido do triatlón  estaba previsto que transcorrise polo concello de Tui.

O Goberno local do Porriño e a organización da proba, estudan posibles datas para a súa celebración.