Cultura e festas

• O Porriño pecha con éxito a novena edición da festa dos seus Xogos Olímpicos

O Porriño, 14 de xullo de 2025.- A novena edición de Porrigalia clausurouse onte cun gran éxito de participación. O Concello do Porriño estima que preto de 9.000 persoas asistiron durante o sábado 12 e domingo 13 de xullo a esta festa única, que combina humor, historia e deporte nun ambiente festivo e familiar.

Durante a fin de semana, maiores e pequenos participaron nas probas olímpicas ao estilo clásico, entre as que destacaron: xogo da soga, salto de lonxitude, salto de altura, carreira de 50 metros, lanzamento de peso, loita antiga, carreira de sacos e as carreiras de carretillas.

As civilizacións participantes competiron entre si nun ambiente de diversión. O gran desfile olímpico de 9 comparsas — con máis de 150 romanos, castrexos, exipcios, gregos e galos — percorreu as rúas do Porriño, encabezado pola Garda Romana (Legio X Gemina do Club Falcata). Figuras destacadas como Tonhito de Poi e o Rei Castrexo Pepo Suevos, quen destronou ao alcalde durante os días de festa, tamén participaron no desfile. No acto do acendido da chama olímpica, o influencer Miguel Mandayo pronunciou o pregón oficial e competiu nas probas deportivas fronte ao propio alcalde, Alejandro Lorenzo.

Preto de 1.100 persoas participaron en total nas diferentes probas olímpicas e na competición infantil Gladiator Kids, consolidando o evento como unha das citas deportivas e festivas máis importantes da comarca.

O alcalde do Porriño, Alejandro Lorenzo, destaca a importancia desta celebración que vai cumprir dez anos: “Para o ano que vén, 2026, Porrigalia cumpre 10 anos de historia. Non son 10 anos celebrados de maneira continua, senón que é unha festa que comezou no ano 2014, paralizouse en varias ocasións e agora foi recuperada para quedarse definitivamente”. O rexedor engade: “Para o vindeiro ano imos facer historia da de verdade”.

Entre os momentos máis destacados estiveron a proba infantil Gladiator Kids, na que participaron máis de 300 nenos e nenas de 3 a 10 anos, demostrando habilidades nos circuítos de 500 e 800 metros instalados na praza 8 de Marzo; así como a exhibición deportiva CrossGalia, unha sesión espectacular de Crossfit celebrada na praza do Concello. O mimo Karcocha, o arlequín contemporáneo que percorre o mundo enteiro, reuniu a milleiros de persoas durante o seu espectáculo. Non faltou a gran queimada, que correu a cargo do Rei Panoramix, e tampouco a entrega do bastón de mando que se realizou da man de Troula Animación co espectáculo Errantes.

Ademais, foron moi populares as actividades complementarias, como as exhibicións de voos de cetraría; o showcooking en directo, a cargo do cociñeiro Xulio Mato; e a constante animación na rúa con charangas e batucadas como Anchoa, Lenha Verde, Miúdos, Fanfarria Furruxa, Os Caliqueños, Turres Band, Sacacorchos e Os Vikingos. A música foi un dos piares do evento, cunha programación que incluíu concertos de bandas como Pink Porris, Kabrönes, Os Mendigos, Louband, Hijos del Tercer Acorde e Ortiga, ademais de sesións de DJ para pechar cada xornada. A programación musical incluíu tamén concertos pensados para o público infantil, con actuacións de Brais das Hortas, a Orquestra de Camarote e o Grupo Oviravai.

Desde o Concello do Porriño, faise unha valoración moi positiva deste evento que xa forma parte da identidade cultural e deportiva da vila, agradecendo a participación da cidadanía e o traballo de todas as asociacións, ANPAS, clubes deportivos, agrupacións culturais, comerciantes, hostaleiros, persoal municipal e voluntariado que fan posible que Porrigalia siga a medrar e consolidarse como unha festa para todas as idades e gustos.

O Porriño, 12 de xullo de 2025. – Esta mañá, O Porriño encheuse de vida coa inauguración oficial da IX edición de Porrigalia, os Xogos Olímpicos do Porriño, que durante todo este fin de semana van converter a vila nun escenario único de historia, festa e cultura.

O inicio foi espectacular, cun desfile con máis de 150 persoas divididas en nove comparsas que representan galos, castrexos, romanos, exipcios e gregos. Cleopatra, Astérix, Obélix, Panorámix e todos e todas os participantes dos Xogos Olímpicos, acompañaron aos portadores da chama olímpica, o Rei Castrexo Pepo Suevos, o polifacético artista, Tonhito de Poi, e o influencer, Miguel Mandayo. Dende o templete da rede de San Luis, o desfile chegou ata a Praza Arquitecto Antonio Palacios, coa participación da Garda Romana (Legio X Gemina do Club Falcata), onde tivo lugar o acendido da chama olímpica e o destronamento simbólico do alcalde, Alejandro Lorenzo, por parte do rei castrexo. 

O influencer, Miguel Mandayo, que participa por primeira vez en Porrigalia, foi o encargado de ler o pregón e compartiu a súa ilusión: “É a miña primeira vez en Porrigalia e teño que dicir que isto é unha pasada. É unha festa con moita enerxía, moi auténtica, e estou moi contento de poder estar aquí con toda a xente do Porriño. Para min é un pracer ser o pregoeiro. Viva Porrigalia”. Ademais, o coñecido influencer, convidou a todos as persoas presentes a participar nas probas olímpicas nas que el tamén competirá. 

Pola súa banda, o alcalde, Alejandro Lorenzo, salientou a forza da participación veciñal e fixo un agradecemento especial: “Porrigalia é unha festa da xente para a xente, un exemplo claro de traballo en equipo. Quero agradecer de corazón a todas as asociacións, ANPAS, clubes deportivos, agrupacións culturais, comerciantes, hostaleiros, persoal municipal e voluntariado que fan posible que Porrigalia siga medrando e que poidamos vivir esta festa tan especial. As nove comparsas e máis de 150 participantes fan desta festa un evento único, e agardamos milleiros de visitantes estes dous días para gozar desta experiencia cultural e festiva que tanto nos enche de orgullo.”

A xornada deste sábado continúa ás 14:00 h, abrirán as tabernas da vila para o xantar popular e, ao mesmo tempo, desenvolverase un showcooking en directo, na Praza Arquitecto Antonio Palacios, a cargo do cociñeiro Xulio Mato.

Pola tarde, desde as 18:00 h, haberá obradoiros infantís polas rúas e dúas sesións de exhibicións de voos de cetraría no Parque Infantil (ás 18:00 h e 19:00 h). Tamén ás 18:00h será o concerto de Pink Porris, na Praza do Concello. Trátase dunha banda de punk rock local de Atios, O Porriño. Son coñecidos pola súa enerxía, a súa música parte o granito. Entre as 19:00 h e as 22:00 h, diferentes DJs amenizarán varias prazas da vila, ao tempo que continúa a animación de rúa coa Charanga Fanfarria Furruxa, Charanga Os Caliqueños, Batucada Lenha Verde e Batucada Miúdos (de 19:00 a 23:00 h). Ás 19:30 h, celebrarase na Praza do Cristo a tradicional competición das Olimpíadas Técnicas. A esta mesma hora, 19:30h, desenvolverase na Praza do Concello a actividade deportiva CrossGalia. Máis tarde, ás 21:00 h o Mimo Karcocha levará o seu espectáculo itinerante polas rúas. Ás 22:00 h, o grupo Os Mendigos ofrecerá un concerto de música medieval na Praza Arquitecto Antonio Palacios. Ás 23:30 h, terá lugar a gran queimada popular, a cargo do mítico Rei Panoramix, e ás 23:45 h pechará a noite o concerto de Los Kabrönes!!! + sesión DJ na rúa Domingo Bueno.

O domingo 13 de xullo, o día arrincará ás 10:30 h co Gran Desfile Olímpico, desde o templete da rede de San Luis ata a Praza Arquitecto Antonio Palacios, coa participación das cinco civilizacións. Ás 11:00 h, celebraranse na Praza do Cristo as probas olímpicas protagonizadas polas comparsas de galos, castrexos, romanos, exipcios e gregos, e ao mesmo tempo continuará a animación de rúa coa Charanga Turres Band, Charanga Sacacorchos e Batucada Os Vikingos. Ás 12:30 h, o grupo Louband actuará en concerto na Praza Arquitecto Antonio Palacios, seguido dunha nova exhibición de voos de cetraría no Parque Infantil ás 13:00 h.

Pola tarde, ás 18:00 h, repetirán os obradoiros infantís polas rúas e celebrarase un concerto infantil dobre, coa actuación da Orquestra de Camarote e do grupo Oviravai, tamén na Praza Arquitecto Antonio Palacios. Ás 18:30 haberá unha nova sesión de voos de cetraría e ás 19:00 h, os máis pequenos poderán participar na actividade “Gladiator Kids”, na Praza 8 de Marzo. A animación de rúa continuará ás 19:30 h cos mesmos grupos da mañá, e ás 21:00 h celebrarase o concerto de Los Hijos del Acorde, de novo na praza principal. A noite pecharase co espectáculo final “Errantes” da compañía Troula Animación, ás 22:30 h, coa entrega simbólica do bastón de mando, e ás 23:00 h, o concerto de Ortiga e a sesión DJ, tamén na Praza Arquitecto Antonio Palacios, porán o broche de ouro a esta novena edición de Porrigalia.

Durante as dúas xornadas, as rúas do Porriño estarán cheas de postos artesáns e de gastronomía, abertos todo o día, para que desfrutes de produtos únicos que fan de Porrigalia unha experiencia completa. Anímate a vir, colle a túa túnica, a coroa ou o casco e prepárate para unha fin de semana inesquecible no Porriño!

• A recadación total de 650 euros destinarase íntegramente á AECC do Porriño

O Porriño, 11 de xullo de 2025.– O día grande das Festas de San Bieito viviu esta mañá un dos momentos máis emocionantes e agardados pola veciñanza: a tradicional subasta benéfica, que este ano recadou un total de 635 euros, unha cantidade que será doada integramente á AECC do Porriño (Asociación Española Contra o Cancro).

Tras a misa solemne na Igrexa de Santa María, coa participación da Coral da Escola Municipal de Música, e a posterior procesión polos barrios de San Bieito e San Sebastián, chegou o momento da puxa, que reuniu a numeroso público e contou cun ambiente cheo de risos, emocións e tamén moito pique entre os participantes. A subasta do racimo de uvas, como é tradición, foi o prato forte, pero tamén se poxaron plantas, ovos e aceite. O racimo de uvas foi adxudicado por 250 euros, mentres que o resto da recadación, 385 euros, correspondeu á poxa dos demais produtos.

O acto tivo lugar ás 13:30 h e demostrou unha vez máis a implicación solidaria do Porriño nestas festas que mesturan devoción, cultura e compromiso social. Ao ramatar, comezou o concerto da Banda de Música da Escola Municipal.

O alcalde, Alejandro Lorenzo, puxo en valor esta tradición tan singular destacando que “a puxa do racimo de San Bieito é un símbolo da nosa identidade como pobo. É un momento de festa, si, pero tamén de solidariedade. Este ano, o feito de que o recadado vaia destinado á AECC do Porriño converte esta tradición tamén nunha ferramenta de apoio real para quen máis o necesita”.

Pola tarde a celebración continúa coa actuación dos Zoqueiros ás 19:30 h, seguida da misa vespertina na Igrexa de Santa María ás 20:00 h. Xa pola noite, a partir das 21:30 h, chegará o gran peche das festas coa Orquestra Los Player’s e o concerto de Roi Casal, que ofrecerá un espectáculo para todos os públicos e porá o broche de ouro a esta edición das festas de San Bieito.

O alcalde tamén quixo destacar o ambiente nas rúas, “colmadas de xente, tanto do Porriño como doutros concellos da contorna”, e lembrou que “mañá comeza a Porrigalia, así que isto non remata aquí”.

Desde o Concello do Porriño celebramos que un ano máis esta puxa tan nosa siga viva, sexa solidaria, e que a festa de San Bieito continúe facendo historia grazas ao pulo da xente que a mantén con orgullo.

O Porriño, 9 de xullo de 2025.- O Concello do Porriño recibiu esta mañá, nun emotivo acto institucional, á cantante Lucía Samoelle, veciña da parroquia de Chenlo, como mostra de recoñecemento polo seu brillante percorrido artístico e a súa participación actual no programa da TVG A Liga dos Cantantes Extraordinarios.

O acto, que contou coa presenza do alcalde, Alejandro Lorenzo, foi unha homenaxe ao talento local, ao esforzo e ao compromiso da artista. O rexedor destacou “o orgullo que supón para todo o municipio ver a unha porriñesa triunfar e emocionar a Galicia enteira coa súa voz”. Subliñou tamén o compromiso do Concello en apoiar o talento local, especialmente o xuvenil, e animou a Lucía a seguir representando a Porriño con paixón e humildade.

Con tan só 25 anos, Lucía Samoelle acumula unha traxectoria prometedora. Leva cantando dende os 12 anos, cando participou no certame local “Tes Talento”, onde acadou o terceiro posto na edición de 2022. No ano 2024 foi gañadora da terceira edición do concurso “Xuntos quero ser artista”, emitido pola TVG dentro do programa Xuntos, consolidando así a súa presenza no panorama musical galego.

Recentemente tamén quedou segunda no certame vigués “Megaestrelas”, o que lle permitiu obter unha beca dun ano de formación en canto no Conservatorio das Artes Mayeusis, reforzando así a súa formación artística.

Ademais da súa faceta musical, Lucía é educadora social, profesión que compaxina coa súa paixón pola música, á que define como “unha vía de escape e unha forma de expresión persoal e emocional”.

O Concello do Porriño quixo poñer en valor non só o talento artístico de Lucía, senón tamén o seu compromiso coa cultura e coa sociedade, e desexoulle moitos éxitos nesta nova etapa televisiva e profesional.

O Porriño, 5 de xullo de 2025.- O Concello de O Porriño presenta, a partir de mañá, unha proposta de lecer estival que converterá o centro da vila nun auténtico mini parque acuático para a cativada. Durante os meses de xullo e agosto de 2025, todos os domingos pola tarde —agás o domingo 13 de xullo no que se celebra Porrigalia—, a Praza Arquitecto Antonio Palacios acollerá un espazo de diversión acuática pensado para os máis pequenos e as súas familias.

Entre as 17:30 e as 20:00 horas, a praza transformarase nun parque infantil con múltiples atraccións: un tobogán xigante de 15 metros de lonxitude, inchables de auga, atraccións deslizantes e unha animada festa da escuma que, sen dúbida, divertirá á cativada. A combinación destes elementos garante unha tarde refrescante, segura e divertida para todas as idades.

Trátase dunha iniciativa gratuíta promovida polo Concello co obxectivo de ofrecer unha alternativa de ocio familiar durante os meses máis calorosos do ano. A actividade está aberta tanto a veciños e veciñas de O Porriño como a persoas doutras localidades que queiran achegarse a desfrutar dunha tarde diferente.

O Alcalde, Alejandro Lorenzo, salienta que “esta proposta non só contribúe a dinamizar o centro da vila e a poñer o foco na infancia, senón que tamén permite recuperar a Praza do Concello como un espazo fresco, aberto e accesible para todos, especialmente pensado para que os nenos e nenas poidan refrescarse durante os meses máis calorosos do ano. É unha actividade sinxela, divertida e ao alcance de todas as familias. Esa é a nosa idea: facer do Porriño un lugar vivo, acolledor e pensado para o benestar da xente.”

Con esta programación, o Concello de O Porriño reafirma o seu compromiso cun modelo de vila viva, inclusiva e pensada para o benestar da infancia e das familias. A Praza Arquitecto Antonio Palacios converterase cada domingo nun espazo de encontro, lecer e alegría, promovendo o uso do espazo público como punto de convivencia veciñal. Este verán no Porriño, os domingos son da cativada.

O Porriño, 4 de xullo de 2025.- O Concello do Porriño presentou esta mañá, ao carón da Capela de San Bieito, a programación das Festas de San Bieito 2025, que se celebrarán os días 10 e 11 de xullo, cun cartel que combina novidades, tradición, música e actividades para todas as idades.

O acto contou coa presenza do alcalde, Alejandro Lorenzo; o concelleiro de Cultura, Festas e Novas Tecnoloxías, Bienvenido Estévez; a Asociación de Veciños de San Benito e San Sebastián e representantes do Mano de Santo DJ Festival, que se consolidan nestas festas.

Durante a presentación, resaltouse o espírito participativo das festas, que volven ser un punto de encontro da veciñanza porriñesa e unha cita obrigatoria do verán. Alejandro Lorenzo animou a todos os asistentes “a desfrutar dunhas festas no barrio de San Bieito que combinan o mellor da nosa tradición co espírito alegre e familiar que caracteriza ao Porriño”.

Programación:

Xoves, 10 de xullo:

• A partir das 21:30 h:
  • Orquestra Gran Parada
  • Mano de Santo DJ Festival

Venres, 11 de xullo:

• Ás 9:00 h: Misa na Capela de San Bieito
• A partir das 12:00 h:
  • Misa solemne na Igrexa de Santa María, coa Coral de Música da E.M.M
  • Procesión, acompañada pola Banda de Música da E.M.M 
  • Ao rematar a procesión, terá lugar a tradicional puxa benéfica do racimo de uvas do Santo, que este ano destinará o recaudado a AECC do Porriño. O Concello renderalle unha homenaxe a veciños de San Benito e San Sebastián.
• A partir das 12:00 h: Concerto da Banda de Música da Escola Municipal de Música 
• Ás 19:30 h: Actuación de Os Zoqueiros 
• Ás 20:00 h: Misa vespertina na Igrexa de Santa María
• A partir das 21:30 h:
  • Orquestra Los Player’s
  • Concerto de Roi Casal

Ademais, dende o día 2 de xullo hai novenas ás 9:00 h na Capela de San Bieito e ás 20:00 h na Igrexa de Santa María.

O Concello do Porriño convida a toda a cidadanía a participar activamente nestas festas, agradecendo a colaboración da Asociación de Veciños de San Benito e San Sebastián e de todas as entidades que fan posible esta celebración ano tras ano.

• Gala Drag Queen ás 20:00 horas e concerto de Baiuca ás 23:00, grandes momentos da festa

O Porriño, 29 de xuño de 2025. – Hoxe o Concello do Porriño converteuse nun espazo de celebración, diversidade e inclusión coa celebración do Día do Porriño Orgulloso 2025, que se desenvolveu no Paseo do Louro coincidindo co Día Internacional do Orgullo LGTBI+.

A xornada comezou ás 16:00 horas e prolongouse ata as 2:00 da madrugada, cun programa pensado para todos os públicos. De 16:30 a 19:30, as nenas e nenos desfrutaron de inchables de auga e de salto para pasalo en grande. Ademais, o Mago Marco ofreceu espectáculos e maxia a partir das 18:00 horas, sorprendendo aos máis pequenos e a toda a familia ao longo do día. Entre as 18:00 e as 20:00 horas, houbo obradoiros de tatuaxes temporais e pintacaras para todas as idades, unha proposta creativa para animar a tarde.

A música en directo protagonizou o escenario principal, onde actuaron Acoustic Mode (17:00), Iker Faure’s Band (19:00) e Orballo Cultural (21:00). Ás 23:00 horas tivo lugar o gran concerto de Baiuca, unha das estrelas galegas con maior proxección internacional, que ofreceu un espectáculo audiovisual único e impactante.

Un dos momentos máis agardados foi a Gala Drag Queen do Porriño Orgulloso, que comezou ás 20:00 horas, conducida por Marlen Soto e Khrystal De Luxe, coa actuación estelar de Marisa Prisa, unha das figuras máis recoñecidas do panorama drag estatal.

A celebración estivo acompañada de foodtrucks, postos de segunda man, a presenza de protectoras de animais e actividades familiares, facendo do evento un espazo de encontro e visibilidade para toda a veciñanza e visitantes.

“O Porriño é un concello que se caracteriza pola súa apertura e diversidade, comprometido firmemente coa igualdade real e efectiva. Facemos un chamamento a toda a veciñanza para que se una e participe activamente nesta celebración tan significativa”, declarou o alcalde, Alejandro Lorenzo.