Cultura e festas

57 peregrinos aloxáronse no Albergue do Porriño na primeira quincena deste mes

Un total de 57 peregrinos aloxáronse no Albergue do Porriño desde que o pasado día 1 reabriu as súas instalacións, segundo informou a Concellería de Turismo con datos da primeira quincena deste mes. A súa orixe maioritaria é nacional e procedían primeiramente de Madrid, Valencia e Murcia. Tamén rexistrouse afluencia de peregrinos estranxeiros con predominio de portugueses, británicos e de diversos países asiáticos.

A pesares de que o Albergue do Porriño ten un total de 40 prazas tan só poden ocuparse diariamente 9, a causa das restricións decididas pola Xunta de Galicia.

David Alonso, concelleiro responsable de Turismo manifestou a súa satisfacción polos resultados que están a acadarse co punto de información turística que o Concello instalou no Albergue e que atende a técnica Belén Freire que se encarga de informar aos peregrinos e visitantes sobre monumentos, paisaxes, oferta gastronómica e de tempo libre no Porriño.

Esta axente turística atende a diario, de luns a venres, en horario de 9 da mañá a 3 da tarde.  

CONCELLEIROS DO GOBERNO MUNICIPAL RECIBIRÁN MAÑÁ VENRES AOS `PEREGRINOS QUE PORTAN A “MOCHILA DA LUZ”

Os concelleiros do goberno municipal Sergio Casal, David Alonso e Cami Moreira recibirán mañá venres, ao redor das 13 horas, no salón de plenos do Concello aos peregrinos que portan a “Mochila da Luz” en homenaxe ás vítimas da Covid.

Peregrinos que están a realizar o Camiño Portugués portan por relevos a “Mochila da Luz” desde que partiu de Oporto o pasado luns 12. Precisamente mañá venres completarán a etapa Tui-Porriño. A coordinadora da iniciativa, Susi Soto e un grupo de peregrinos de varias nacionalidades serán os encargados de transportar a Mochila da Luz ata Porriño.

Este ano 2021 a mensaxe a transmitir “e de esperanza, da luz da esperanza dos nosos maiores por ser o primeiro grupo de poboación en ter recibida a vacina”, segundo manifestan os promotores da “Mochila da Luz” nas súas redes sociais. 

 

15/07/2021 in Alcaldía, Cultura e festas, Turismo

Preto de 40 inscritos para participar na “Breaking Battle Porriño” que se celebrará este sábado coa ocasión das Festas de San Bieito

A competición-espectáculo “Breaking Battle Porriño” que constitúe a principal novidade da programación das Festas de San Bieito, celebrarase este sábado coa participación de preto de 40 mozos e mozas de toda Galicia que practican esta modalidade deportiva que será olímpica nos Xogos de París 2024.

Entre os participantes estarán David Amor, un mozo de Neda de 14 anos que xa é o segundo no ranking nacional desta modalidade e foi medalla de bronce no Campionato de España en 2020; e a rapaza ourensá, Alicia Babarro, de 10 anos que actualmente lidera a Liga Galega de Breaking en categoría iniciación.

O evento, incluído pola Concellería de Cultura na programación das festas, terá lugar por primeira vez na nosa vila. Aínda que inicialmente estaba previsto na praza de San Sebastián, acordouse trasladar ao auditorio exterior do Centro Cultural Municipal onde se montará unha pista de PVC. Ademais haberá un espazo con cadeiras reservado para o público asistente e os acompañantes dos participantes.

A concelleira Cami Moreira subliñou “o esforzo conxunto da OMIX do Porriño e das concellerías de Deportes e Festas para achegar novas propostas de lecer, cambiando rexistros e organizando eventos máis demandados pola mocidade”.

A competición durará catro horas (entre as 17:00 e as 21:00) e será “mediante sistema de eliminatorias ata chegar a unha final de un contra un. Tres xuíces, dous galegos e un andaluz, encargaranse da puntuación e control da competición”, segundo explicou Pablo Castiñeira, responsable de “Vella Escola”, produtora do evento.

09/07/2021 in Cultura e festas, Deportes, Mocidade

Presentación Festas San Bieito 2021

A Concellería de Festexos que dirixe Cami Moreira presenta a programación das festas de San Bieito 2021 que este ano aínda estarán suxeitas ás circunstancias sanitarias.

Nese senso, a concelleira subliña que “aínda que imos camiño de poder realizar unhas festas coma as de antes da pandemia, polo de agora, preferimos adoptar un criterio de prudencia e organizar unhas festas de gozar desde unha cadeira, coa distancia sanitaria, coa máscara, e con hidroxel; iso si con moita variedade de espectáculos”, explicou Cami Moreira.

Bandas de música de distintos estilos, da máis tradicional, ás propostas de acordeóns, folk, jazz, fanfarra galega feminina, ritmos, swing, regueifa,…Cinema social, acrobacias, teatro familiar, animación…

A concelleira Cami Moreira fixo especial mención de dous eventos:

A “Breaking Battle Porriño” que supón a estrea dunha competición/encontro de Breaking, que será nova disciplina olímpica en París 2024;

E a presentación da II edición do Festival Unha Volta Polo Medio, encontro das músicas de raíz da península ibérica.

A concelleira lembrou, por último, que o luns 12 será festivo local.

Deixamos ligazóns cos “pdf’s” do programa e cartaz das festas 

PROGRAMA

CARTEL SAN BIEITO 2021

06/07/2021 in Cultura e festas

A Asociación de Panadeiros presentou ao Concello o rexistro “Pan do Porriño”, outorgado pola Oficina Española de Patentes e Marcas

 

A Asociación de Panadeiros presentou ao Concello, o rexistro “Pan do Porriño” outorgado pola Oficina Española de Patentes e Marcas, dependente do Ministerio de Industria, Comercio e Turismo. David Alonso, concelleiro de Promoción Económica e Turismo; e Cami Moreira, concelleira de Cultura e Festas, en representación do Concello, recibiron un exemplar do título acreditativo da marca “Pan do Porriño” que lucirá a partir de hoxe nas oito panaderías que promoveron esta marca e adheríronse ao selo. Son “Forno de Mosende”, “Chinchina”, “Argibay” “Amaquía” “O Progreso”, “Erundina”, Milagros” e “Panadería Torneiros”.

Cinco dos oito panadeiros acudiron hoxe a presentar o rexistro e agradecer ao Concello o seu apoio a “unha reivindicación que levou moitos anos de traballo e xestións ata acadar este recoñecemento”, segundo explicou José Manuel Fernández, presidente da Asociación e propietario de “Forno de Mosende”.

Na mesma liña, reivindicando a necesidade de recuperar a Festa do Pan e de atopar outros instrumentos de promoción nacional e internacional do Pan do Porriño, manifestáronse José Manuel Fernández (“Chinchina”); Claudio Argibay “Panaderia Argibay), Luis Miguel Iglesias (“Amaquía”) e José Carlos Fernández (“O Progreso”).

Pola súa banda a concelleira de Cultura e Festas expresou a súa satisfacción por “este empoderamento do Pan do Porriño por que é moi importante que se ligue a identidade da bola do pan co Porriño e con todas as actividades culturais e festivas que fagamos”.

David Alonso manifestou que “benvido sexa este recoñecemento dunha tradición histórica”. O concelleiro de Promoción Económica subliñou que as oito panaderías que integran a Asociación e lucirán o selo “xeran case cen postos de traballo no pobo o que supón unha fonte de ingresos para moitas familias”.

Tanto Cami Moreira como David Alonso comprometéronse coa Asociación a manter reunións nos vindeiros días para reanudar neste ano a celebración da Festa do Pan (probablemente en outubro) e lanzar outras iniciativas de promoción e coñecemento do “Pan do Porriño”. 

 

04/07/2021 in Alcaldía, Cultura e festas, Emprego e formación

Amplíase ata o 31 de agosto o prazo de inscricións para a “II Batalla de Debuxantes Improvisdado”, organizada polo Concello

A Concellería de Cultura e Festas que dirixe a concelleira Cami Moreira comunicou que amplía ata o 31 de agosto, o prazo de inscrición para participar na “II Batalla de Debuxantes Improvisdado”, organizada polo Concello do Porriño coa ocasión das Festas do Cristo.
Este concurso lanzouse no 2020, no primeiro estado de alarma como un estímulo para os creativos, para que puideran traballar dende as súas casas pese ao confinamento. Realizouse unha convocatoria por redes sociais para debuxantes que, de xeito profesional ou aficionado, desenvolveran algunha disciplina artística relacionada coa pintura. Entre os debuxos presentados, seleccionáronse seis artistas que concorreron á final celebrada nun escenario habilitado na praza do Concello. O artista alcumado “O Ras”, de Pontevedra foi o gañador daquela.
Para este ano 2021 incluíronse diversas novidades e trasladase o escenario da final ao Parque do Cristo.
Deixamos ligazón coa web de Cultura para máis información

Batalla de debuxantes ImprovisDado. II Edición

01/07/2021 in Cultura e festas

A Escola Municipal de Música abre a inscrición previa para novo alumnado, a partir do 1 de xullo

A Escola Municipal de Música do Porriño abre o prazo de inscrición previa para o curso 2021/2022. A partir do vindeiro xoves 1 de xullo e ata o 19 do mesmo mes, pódese solicitar as prazas.

Poderase descargar a folla de solicitude nesta páxina web do Concello (figura na ligazón ao pé desta nova) ou recollela na Escola Municipal, en Torneiros de luns a venres no horario de 16:00h a 20:00h.

A folla de inscrición, cuberta cos datos, deberase entregar de forma presencial, nas instalacións da Escola Municipal, no Centro Multiusos de Torneiros, de luns a venres no horario de 16:00 a 20:00h, nas datas de inscrición previa. A orde de entrega da inscrición será determinante na orde de matrícula.

Durante o período de inscricións, do 1 ao 19 de xullo, tamén se ofertaran OBRADOIROS GRATUÍTOS DE INSTRUMENTO E OBRADOIROS DE CORAL INFANTIL, abertos a todos os nenos e nenas entre 6 e 10 anos; onde o novo alumnado, poderá anotarse, na Secretaría da Escola Municipal (prazas limitadas) e o prazo de solicitude para asistir a estará aberto dende o luns 21 de xuño.

A oferta da Escola Municipal do Porriño é a que se indica:

Ø Música e Movemento a nenos e nenas dende os 4 anos

Ø Linguaxe Musical para nenos, mozos e adultos.

Ø As especialidades de violín, viola, violonchelo, percusión, guitarra, piano, canto, gaita, clarinete, frauta traveseira, saxofón, óboe, fagot, trompa, trompeta, bombardino, trombón, tuba e percusión tradicional, Ø e tamén conta con agrupacións como: § a Banda, § Orquestra de Cordas, § Grupo de Música Tradicional, § Coral Infantil § Coral Polifónica de adultos.

A matrícula realizarase no mes de setembro despois da publicación das listas das persoas admitidas, e coa aplicación dos protocolos COVID-19 e as medidas de limitación de aforo que se impoñan por parte das administracións correspondentes.

SOLICITUDE DE PRAZA curso 2021 2022

24/06/2021 in Cultura e festas

Un bando da Alcaldía lembra aos particulares a obrigatoriedade de solicitar autorización ao Concello para facer, nas súas fincas, fogueiras de San Xoán

O Concello do Porriño informa de que hai un prazo ata as 00:00 horas do mércores 23 para que os particulares interesados ​​en facer fogueiras nas súas fincas, na véspera de San Xoán, presenten as súas correspondentes solicitudes para acadar autorización municipal.
Un bando da Alcaldía lembra as obrigas que deberán observar os solicitantes no que atinxe á montaxe, materiais e localización das fogueiras nos terreos de propiedade privada onde van facerse. Tamén o bando subliña que os solicitantes deben cumprir as normas de prevención contra Covid en propiedades privadas, como a distancia social e o uso dunha máscara, e que se respecte o número de 15 persoas reunidas ao aire libre e 6 se están en interiores.

Deixamos ligazón co texto do Bando en “pdf”

20210618_Publicación_Bando_BANDO 2021

 

 

18/06/2021 in Alcaldía, Cultura e festas, Seguridade

Suspendese a visita guiada teatralizada Antonio Palacios, prevista para este sábado 19, pola mala previsión meteorolóxica

A visita guiada teatralizada Antonio Palacios prevista para mañá sábado 19, suspéndese debido á mala previsión meteorolóxica. A visita recuperarase noutra data, segundo informou o departamento de Cultura que organiza esta actividade coa ocasión da celebración polo Concello do Porriño do Ano Palacios.

As vinte persoas que se inscribiron previamente completando o aforamento posible, foron notificadas da suspensión polo departamento de Cultura.

As visitas guiadas teatralizadas comezaron o pasado 29 de maio cunha excepcional resposta xa que hai lista de espera. Programáronse dez visitas, en principio ata o 30 de outubro. Os participantes percorren durante 50 minutos varias obras icónicas de Palacios: o Templete da boca de metro da Rede de San Luis, a Casa do Concello, a Fonte do Cristo ou a Botica Nova. Un actor e unha actriz encárganse de representar a Antonio Palacios e a Corona Gónzalez, mecenas do arquitecto, contando ademais co acompañamento musical dun gaiteiro e un tamborileiro da Asociación Cultural Lumeirada.

O Ano Antonio Palacios que celebra o Concello do Porriño comezou o 27 de outubro de 2020 coa colocación dunha coroa de dalias brancas e loureiro no cemiterio municipal ante a tumba do arquitecto.

18/06/2021 in Cultura e festas, Turismo

“A cultura viaxa ás parroquias”

 
A Concellería de Cultura programou neste mes de xuño unha serie de actividades baixo o título “A Cultura viaxa ás parroquias” que inclúe nesta vindeira fin de semana dúas sesións de narración oral que teran lugar en Torneiros e Budiño, a cargo de Vero Rilo. Tamén o sábado 12, haberá en Chenlo, unha sesión de cinema familiar coa proxección da película “O soño dunha noite de San Xoán”.
Deixamos ligazón coa web de Cultura para consultar datas e horarios dos eventos.
09/06/2021 in Cultura e festas

“Dende O Porriño ata París”: presentada a “Breaking Battle” que se celebrará ao abeiro das Festas de San Bieito

O Concello do Porriño vai celebrar o sábado 10 de xullo a “Breaking Battle Porriño” que será unha competición/encontro de Breaking Dance que terá lugar por primeira vez na nosa vila.

Celebrarase ao abeiro das Festas de San Bieito na praza de San Sebastián onde se montarán unha pista principal e dúas máis pequenas para quecemento dos participantes. Ademais haberá un espazo con cadeiras reservado para o público asistente e os acompañantes dos participantes.

A concelleira subliñou “o esforzo conxunto da OMIX do Porriño e das concellerías de Deportes e Festas para achegar novas propostas de lecer, cambiando rexistros e organizando eventos máis demandados pola mocidade”.

Agardase “unha alta participación aproveitando que o breaking está declarada modalidade olímpica para os Xogos de París 2024”, segundo lembrou Pablo Castiñeira, representante de “Vella Escola”, produtora do evento.

Entre os participantes que se darán cita no Porriño agardase o concurso de David Amor, un mozo de Neda de 14 anos que xa é o segundo no ranking nacional desta modalidade e foi medalla de bronce no Campionato de España en 2020. De aí que a concelleira de Festas, Cami Moreira concluíse coa frase “Dende O Porriño a París” tendo en conta as posibilidades do mozo nedense de ser seleccionado para as vindeiras Olimpíadas.

 

03/06/2021 in Cultura e festas, Deportes, Mocidade