A Directora Xeral de Xuventude, Participación e Voluntariado, Lara Meneses, e o concelleiro de Xuventude, Antonio Barros, visitaron o Campo de Voluntariado Internacional “Gándaras de Budiño”, impulsado polo Concello do Porriño en colaboración coa Xunta no marco da campaña “O teu mellor verán”. O obxectivo deste campus é destacar a biodiversidade e o gran valor medioambiental das Gándaras de Budiño.
Durante a visita, Meneses e Barros puideron ver de cerca o labor ambiental que están a desenvolver os 15 mozos e mozas de entre 18 e 30 anos que participan no campo. Eles mesmos encargáronse de explicarlles todas as actividades que se están a levar a cabo no marco desta iniciativa, como as charlas formativas de educación ambiental e a posta en práctica do aprendido: a retirada de especies invasoras, como a caña e a tintureira, ou a retirada de basura no río Louro e nos seus afluentes en Porriño e nas Gándaras de Budiño, entre outras actividades.
O Campo de Voluntariado tamén engloba actividades culturais e lúdicas. Os e as participantes visitaron lugares como Cabo Home, Curro da Valga, os Muíños do Folón e Picón e Tui. Ademais, gozaron de visitas e xogos polo casco urbano do Porriño e experimentaron as festas dos pobos de Galicia, asistindo as festas de Atios na honra de San Bieito.
“Volvo a Zaragoza cunha idea do que me quero dedicar, o tipo de traballo que quero buscar, relacionado co medioambiente” – Allende Sauras
Mozos e mozas de México, Francia, Italia, Madrid, Cuenca, Zaragoza, Badajoz, Valencia, Navarra e Galicia levan conviviendo no Porriño desde o 23 de xullo para facer este voluntariado que remata mañá, 3 de agosto. Algúns deles, como Allende Sauras, de Zaragoza, ou Mani Martínez, de México, é a primeira vez que visitan Galicia e califican esta experiencia de moi positiva, tanto pola parte de coñecemento e educación medioambiental, como pola parte de visitar a nosa Comunidade, chea de biodiversidade e lugares máxicos. Allende acaba de rematar os seus estudios de ADE, confesa que “o campus inspiroume moito. Volvo a Zaragoza cunha idea do que me quero dedicar, o tipo de traballo que quero buscar, relacionado co medioambiente”. “É un voluntariado moi enriquecedor tanto a nivel de impacto medioambiental para O Porriño e Galicia, como a nivel persoal”. Pola súa banda, Mani salienta as aprendizaxes, “como poden afectar as especies invasoras ás orixinais”, e a beleza de Galicia, “especialmente a Illa de San Simón”.
Alejandro Lorenzo, alcalde do Porriño, salienta “esta posta en valor das nosas riquezas naturais e culturais entre a mocidade de Galicia, España e todo o mundo. Animo a toda a veciñanza a participar de forma voluntaria nas diferentes actividades que se están a facer ao longo do ano desde o Concello para coidar a nosa contorna”.
