O centro do Porriño acolleu hoxe unha nova edición da XXXVII Feira Apícola Rías Baixas, unha cita xa consolidada que reuniu a produtores e produtoras da comarca, representantes institucionais e público xeral arredor dun produto de gran valor para a economía e a tradición local.
A xornada contou coa presenza da Conselleira do Medio Rural, María José Gómez, acompañada polo alcalde do Porriño, Alejandro Lorenzo, e membros da corporación municipal. Durante a visita institucional, percorreron o mercado apícola instalado no corazón da vila e compartiron espazos de diálogo coas persoas expositoras e visitantes.
Un dos momentos máis destacados da feira foi o showcooking do cociñeiro Xulio Mato, no que participaron tamén a conselleira, o alcalde e outros representantes institucionais. A actividade puxo en valor as múltiples aplicacións culinarias da mel, destacando a súa versatilidade e protagonismo na gastronomía galega.
O alcalde Alejandro Lorenzo destacou que “a Feira da Mel é unha mostra máis do noso compromiso co produto local, coa sostibilidade e coa dinamización do comercio e a gastronomía de proximidade. O noso obxectivo é apoiar ao sector primario e seguir promovendo iniciativas que beneficien tanto á economía local como á identidade cultural do Porriño”.
Pola súa parte, a conselleira María José Gómez sinalou que “eventos coma este axudan a visibilizar o esforzo dos nosos apicultores e a poñer en valor a calidade excepcional da mel galega, recoñecida dentro e fóra das nosas fronteiras”.
A Feira Apícola continuará durante o día con charlas técnicas, obradoiros, actividades para todos os públicos e degustacións, consolidándose como un espazo de encontro para a divulgación da apicultura e a promoción da gastronomía local.