- O Concello amosa o seu apoio e anima á veciñanza a votar por ela en Instagram
O Porriño, 13 de agosto de 2025.- O Concello do Porriño expresa o seu total apoio á veciña Ariadna Alcauza Alonso, de 19 anos, quen representará ao municipio no certame de beleza Miss Grand Galicia 2025. Esta será a súa primeira participación nun concurso desta índole e faino con ilusión, compromiso e un forte vínculo coa súa vila, converténdose nun motivo de orgullo para toda a comunidade porriñesa.
“A presenza de Ariadna neste certame supón unha oportunidade para dar visibilidade ao talento, á forza e á seguridade da mocidade do Porriño. A súa actitude positiva e o seu esforzo fan dela unha excelente embaixadora da nosa vila nun concurso que non só valora a beleza, senón tamén a personalidade e os valores”, sinalou o alcalde Alejandro Lorenzo durante un encontro que mantivo con Ariadna no Concello.
Ariadna explica que unha parte fundamental do proceso de selección baséase na votación popular en liña. Por iso, desde o Concello anímase a toda a veciñanza a apoiala a través da conta oficial de Instagram @missgrandgalicia, dándolle “me gusta” ás publicacións correspondentes á súa candidatura. Cada “me gusta” conta como un voto e será decisivo para que poida avanzar á seguinte fase.
A fase de preselección celebrarase o 18 de outubro, mentres que a gala final terá lugar o 8 de novembro en Vigo. “Desde o Concello facemos un chamamento á cidadanía para mobilizarse nas redes sociais e apoiar con forza a nosa representante”.
