O Porriño, 16 de xullo de 2025.- A parroquia de Cans celebrou este mércores as Festas do Carme, unha das citas máis sinaladas do ano, caracterizada pola implicación directa das mulleres da parroquia que levan o nome de Carme.

En total, máis de 30 Carmes foron as encargadas da organización da festa, mantendo viva unha tradición que combina gastronomía, encontro e identidade local. No pasado, ata 50 mulleres chamadas Carmen participaron nesta organización.

A xornada incluiu os actos habituais como a misa, a procesión e un dos momentos máis agardados: a merenda-cea veciñal, na que cada Carme preparou a súa tortilla, ademais doutros pratos típicos que se compartiron nun ambiente distendido e festivo.

Como cada ano, o Concello do Porriño sumouse á celebración cun xesto xa convertido en costume: a entrega dunha rosa a cada Carmen como mostra de recoñecemento polo seu papel fundamental na festa.

O alcalde de O Porriño, Alejandro Lorenzo, destaca a importancia desta celebración: “As Festas do Carme en Cans son un claro exemplo da forza da comunidade local para manter as tradicións vivas, fomentando a participación de todas as xeracións nun espírito de convivencia e identidade”.

Cabe destacar que Cans conta con dúas festas patronais moi importantes: ademais das Festas do Carme, está o famoso Ramo de Santo Estevo, patrón da parroquia. Nesta celebración, a organización corre a cargo dos “mayordomos”, escollidos segundo a data da súa voda na igrexa da parroquia, que convidan a tódolos veciños a un gran banquete onde non falta o viño frío e quente, así como produtos típicos de Nadal como o chocolate con churros. Toda unha tradición singular que subliña o vínculo entre a comunidade e as súas raíces.

As Festas do Carme en Cans seguen a destacar polo seu formato único e pola capacidade de reunir á veciñanza arredor dunha celebración feita á medida da comunidade.