- A constitución deste foro contou coa participación de distintas empresas e entidades asociativas que representan aos parques industriais do municipio, a Asociación de Comerciantes, o sector hostaleiro e ao conxunto dos autónomos.
O Porriño dá un paso decisivo na súa consolidación como epicentro industrial da provincia de Pontevedra coa posta en marcha dun foro empresarial que reunirá a diversas empresas e entidades asociativas que representan aos parques industriais do municipio, a Asociación de Comerciantes, o sector hostaleiro e ao conxunto dos autónomos. Esta iniciativa nace co obxectivo de ofrecer unha representación unificada ás máis de 2.200 empresas asentadas no municipio, que destaca por ter un dos PIB máis elevados da provincia e por contar con 3,5 millóns de metros cadrados de solo industrial ocupado. Ademais, a entidade está deseñada para reforzar a cooperación entre as empresas locais e impulsar un modelo económico sustentable e innovador.
Este novo organismo facilitará o acceso a subvencións, ofrecerá asesoramento personalizado ás empresas e promoverá unha xestión coordinada entre os distintos sectores produtivos. A pesar da súa integración neste foro, as asociacións existentes manterán a súa autonomía, garantindo así unha representación equilibrada e eficaz para todo o tecido empresarial. Con esta iniciativa, Porriño reforza o seu liderado industrial e comercial, impulsando novas oportunidades de crecemento e competitividade para as súas empresas.
O alcalde de Porriño, Manuel Alejandro Lorenzo Alonso, expresou o seu total apoio á creación desta entidade, subliñando o impacto positivo que terá no desenvolvemento económico do municipio. “É un orgullo acoller no noso municipio a un dos maiores foros empresariais de Galicia”, afirmou.
Na mesma liña, o concelleiro de Industria, Carlos Martínez, destacou que a posta en marcha desta entidade representa un paso fundamental para fortalecer o tecido económico local e consolidar a posición do Porriño como un dos principais motores empresariais de Galicia. “O asociacionismo e a colaboración entre os distintos sectores produtivos son claves para impulsar o crecemento económico e xerar novas oportunidades para a nosa localidade”, declarou.
Así mesmo, Lorenzo reafirmou o seu compromiso co empresariado local “O Concello continuará a impulsar o desenvolvemento económico a través de políticas que favorezan a xeración de emprego e a captación de investimentos”. Boa proba disto foi a declaración do Porriño como “Concello Emprendedor”, un recoñecemento que levou consigo importantes medidas para promover a implantación de novas empresas e o crecemento das existentes, tales como bonificacións fiscais de ata o 95% no IBI, IAE e ICIO para proxectos de nova implantación ou ampliación, así como a simplificación administrativa para axilizar a concesión de licenzas de obra e facilitar o acceso ao chan industrial.
Con esta nova entidade, O Porriño reafírmase como un enclave estratéxico para o emprendemento e o investimento, impulsando a cooperación empresarial e garantindo un futuro próspero para o seu tecido produtivo.
