- Esta inserción laboral é o resultado da posta en marcha dos plans de emprego, formación e orientación municipal dende o inicio deste ano 2025, período no cal se rexistrou preto dun milleiro de sesións de orientación e asesoramento e máis de 5.700 horas de formación
O Porriño, 9 de agosto de 2025.- O emprego é unhas das prioridades absolutas do goberno municipal do Porriño. É por iso que dende o servizo de Porremprego trabállase a diario con programas formativos, de orientación e asesoramento dirixidos á mellora da empregabilidade da veciñanza. Actuacións que dende o inicio deste 2025 deu como resultado a inserción no mercado laboral dun total de 270 persoas, “un exemplo claro de consolidación do Porriño como referente en políticas activas de emprego ben deseñadas e centradas nas necesidades reais do tecido empresarial, para o cal mantemos contacto directo con todo o sector e sobre todo coas pemes”, explica o alcalde, Alejandro Lorenzo.
O Programa Integrado de Emprego (PIE), o obradoiro dual “O Porriño Humaniza”, o programa de emprego para persoas mozas “O noso encontro co emprego”, xunto con outros plans como o Máis Provincia e cursos como os AFD, postos en marcha pola Concellería de Emprego e Formación, que dirixe Rosario Costas, financiados pola Xunta de Galicia e a Deputación de Pontevedra, son a base na que se fundamentan os resultados acadados de insercións, que se complementan coas 964 sesións de orientación e asesoramento individualizado e as 5.746 horas impartidas de formación. Neste senso, a concelleira incide en que “a formación e a orientación son as claves do éxito, a formación adaptada á demanda real do mercado laboral é a nosa ferramenta máis eficaz para fomentar o emprego”, subliñando tamén “a importancia da colaboración co tecido empresarial local para a xeración de emprego estable e de calidade”.
Os resultados desa coordinación entre oferta e demanda á hora de programar accións formativas queda reflectida na alta porcentaxe de inserción acadada xa no PIE aínda en marcha. Dos 100 participantes, o 65% xa está traballando, un 10% deles ocupando un posto na administración pública. “Este dato evidencia, unha vez máis, o éxito dun modelo baseado na formación adaptada, a orientación personalizada e a implicación directa coas empresas”, remarca o alcalde, incidindo na continuidade “dese contacto directo e procura de solucións, melloras e apoio total ao pulmón industrial de Galicia, co máis de 3,5 millóns de metros cadrados de solo industrial ocupado ao seu 100%”.
De xeito paralelo, Porremprego, como piar estratéxico da política municipal, dispón dunha bolsa de emprego local na que todas as persoas, desempregadas ou non, poden inscribirse para mellorar a súa situación laboral. O bo funcionamento deste servicio complementario fai que medre o número de usuarios da mesma, así dende xaneiro de 2022 inscribíronse 1.023 persoas, acadando os 7.073 rexistros.
Todas estas accións, que levan consigo un descenso progresivo da taxa de paro, reafirman o compromiso firme do Concello do Porriño coa mellora da empregabilidade da súa veciñanza, especialmente coa mocidade e os colectivos con maiores dificultades de inserción. A través dunha estratexia baseada na formación de calidade, trato personalizado e colaboración público-privada, o goberno municipal continúa traballando para garantir o acceso a un emprego digno, estable e adaptado aos perfís profesionais emerxentes.
