O Porriño, 17 de xullo de 2026. Profesionais da saúde mental reuníronse esta mañá no Porriño nun primeiro ‘Almorzo de coidados entre profesionais’, un espazo creado para compartir experiencias, reflexionar sobre os retos da práctica clínica e fortalecer as redes de apoio entre compañeiras e compañeiros do sector.
O encontro nace coa vontade de ofrecer un lugar de diálogo seguro e horizontal onde abordar cuestións que afectan ao exercicio profesional, como a soidade profesional, a fatiga emocional e o burnout, as dificultades que se repiten na consulta, así como a crecente complexidade das demandas sociais.
Durante esta primeira xornada celebrada no Porriño , as persoas participantes puxeron de manifesto a necesidade de crear espazos estables de encontro, supervisión e intervisión, favorecendo o coidado mutuo e o intercambio de recursos entre profesionais. Tamén se abriu un debate sobre a importancia de fortalecer a comunicación coas institucións e de impulsar iniciativas conxuntas que contribúan a mellorar o benestar tanto dos profesionais como das persoas ás que acompañan.
A sesión concluíu cunha reflexión colectiva sobre os próximos pasos, manifestando o interese compartido por dar continuidade a este tipo de encontros e consolidar unha rede de apoio profesional na comarca.
Esta primeira edición supón un punto de partida para visibilizar a realidade da profesión, promover o coidado de quen coida e fomentar unha práctica máis sostible e colaborativa no ámbito da saúde mental.
