Novas

A alcaldesa pide un cribado masivo no Porriño

 

A alcaldesa, Eva García, pídelle á Consellería de Sanidade que realice un cribado masivo no Porriño dado o aumento dos contaxios e a alta taxa de incidencia que presenta este concello.

A alcaldesa enviou a solicitude por escrito á Xerencia da Área Sanitaria de Vigo, aproveitando que actualmente se están a realizar cribados similares en varios concellos da zona.

Segundo a actualización de hoxe do Sergas, O Porriño ten 129 casos activos e unha taxa de incidencia de 610. Estes datos foron comunicados por Eva Garcia aos membros da Comisión Municipal de Seguimento da Covid, que se reuniu por vía electrónica.

Mantéñense as medidas adoptadas polo Concello, incluída a suspensión temporal do mercado ambulante que hoxe xa non se celebraba.  Sergio Casal, concelleiro de Mercados informou á Comisión de que falou cos representantes do grupo de vendedores ambulantes de que tamén poderán aproveitar a nova bolsa de axudas económicas directas que o Concello do Porriño acordou convocar e que especificarase en breve.

02/02/2021 in Alcaldía

O Concello presentará un proxecto para revitalizar o Paseo do Río Louro e ampliar o Plan de Mobilidade

A alcaldesa Eva García anuncia que o Concello do Porriño presentará diversas propostas para beneficiarse do Plan Estratéxico de Fondos Europeos convocado pola Deputación de Pontevedra. Entre eles citou “un proxecto para revitalizar o paseo do río Louro ampliándoo e converténdoo nunha alternativa verde e unha recreación saudable”, dixo.

“Tamén queremos continuar coa mellora da mobilidade, ampliando as accións de humanización no centro da vila, sen esquecer que temos que buscar alternativas para estacionar vehículos que faciliten a recuperación de espazos públicos”, engadiu García de la Torre.

A alcaldesa tamén sinalou que as opcións de axuda a través destes fondos europeos inclúen dotacións culturais e equipamentos municipais. “Non renunciamos á aspiración de dotar a Porriño dun auditorio e, por outra banda, recuperar edificios emblemáticos da zona urbana”.

Eva García participou onte nunha videoconferencia con Carmela Silva e Cesáreo Mosquera, presidenta e vicepresidenta da Deputación, que deron un prazo de dez días a todos os concellos da provincia de menos de 50.000 habitantes para que presentasen as súas propostas.
O Plan Estratéxico para os Fondos Europeos mobilizará 300 millóns de euros a través de dez liñas de axuda.

02/02/2021 in Alcaldía

O Concello expresa o seu pésame pola morte do atleta Alejandro Gómez

O Concello do Porriño expresa o seu pesar pola morte do atleta Alejandro Gómez e traslada as súas condolencias aos seus familiares e amigos. Sufría unha grave enfermidade que acabou hoxe coa súa vida, aos 53 anos.
Este atleta, alcumado como “Galgo de Zamans” acudía regularmente a Porriño e mantivo fortes lazos coa comarca da Louriña.
Alejandro Gómez foi o principal referente do atletismo na área de Vigo e un exemplo para xeracións de atletas do Porriño e doutros concellos.
Gómez foi un dos mellores atletas españois na décadas dos oitenta e dos noventa, presente en tres Xogos Olímpicos (Seúl 88, Barcelona 92 e Atlanta 96) e gañador de infinidade de probas.

 

31/01/2021 in Alcaldía, Deportes

O luns 1, corte do subministro de auga en Torneiros, por reparacións

O Concello anuncia que o vindeiro luns 1 de febreiro haberá un corte de subministro de auga en Torneiros, Trátase de traballos de mantemento da rede de abastecemento, a cargo do Consorcio de Augas do Louro.
Afectará aos edificios das fases 2, 4 e 5 do polígono de vivendas de Torneiros; tamén aos colexios “Antonio Palacios” e CPI da Ribeira; ao centro de educación especial de “Aceesca”; á escola infantil da rede “Galiña Azul” e, finalmente. ao Centro de Día, dependente do Consorcio Galego de Igualdade.
A estimación é que o corte de subministro sexa entre as 10 horas da mañá e as 12 do mediodía.

29/01/2021 in Alcaldía

O Concello renovará instalacións de alumeado exterior en núcleos do Porriño, Chenlo, Cans, Atios, Torneiros e Mosende por medio millón de euros

Eva Garcia firmou hoxe o decreto da Alcaldía de adxudicación dos contratos para a renovación das instalacións de alumeado, iluminación e sinalización exterior que se executaran en diversas zonas do termo municipal. Tanto en núcleos do Porriño como das parroquias de Chenlo, Cans, Torneiros, Atios e Mosende.

A actuación dividiuse en tres lotes de licitación. Suman en total un gasto de 519.767,91€ (429.560,25€ máis 90.207,66 € en concepto de IVE), que serán financiados con fondos FEDER para a transición enerxética e con recursos propios do Concello.

O lote 1, consistente na renovación de instalacións de iluminación exterior en núcleos do Porriño (A Gulpilleira, Carracido, A Senra, Malladoura, Carracido Amieiro, A Raposeira Urb e rúa Leandro Diz) e na parroquia de Cans (Confurco-A Buraca e A Graña), adxudicouse á UTE SANTOS HECTOR-SIMTEGAL cun orzamento de 175.450,00 (IVE incluído), cun prazo de execución de 3 meses.

O Lote 2, consistente na obra de renovación de instalacións de iluminación exterior na parroquia de Atios (A Insua, O Castro), na parroquia de Torneiros (Casal de Vello, A Relva e A Gándara) e na parroquia de Mosende (O Caeiro, Unif.Casal+Igrexa, Figueiras e A Costeira), adxudicouse á firma ELECTRICIDAD IN.M.A.C CONDADO SL, cun orzamento de
151.528,30€ (IVE incluído) e cun prazo de execución de 3 meses.

E por último, o Lote 3, para renovación de instalacións de iluminación exterior na parroquia de San Juan de Chenlo (Saramagal, A Granxa, Parada, O Penedo,Canadelo-O Toxal,As Cabreiras, A Ladeira-A Quinta e As Cales-As Abas) tamén á ELECTRICIDAD IN.M.A.C CONDADO SL, cun orzamento de 184.427,18€ (IVE incluído) e 3 meses de prazo de execución.

 

28/01/2021 in Alcaldía, Vías e obras

A Ordenanza de terrazas aprobada polo Concello regulará a ocupación de espazos públicos


O pleno da Corporación Municipal do Porriño aprobou, na sesión de onte, a Ordenanza Reguladora do Uso das Terrazas, cos votos a favor do PSOE, BNG, EU SON e UDDL. O PP abstívose.

Entrará en vigor ao día seguinte da súa publicación no Boletín Oficial da Provincia (BOPPO). A partir desa data, establecerase un prazo de regularización de tres meses.

Na exposición de motivos xustifícase que “O Concello do Porriño precisa dispor dunha Ordenanza Reguladora de ocupación de terreos de uso público con mesas e cadeiras cuxa finalidade é establecer os criterios básicos para a instalación de terrazas anexas aos establecementos de hostalería. Dita ordenanza intenta dar resposta ás novas necesidades e costumes da cidadanía, así como a novas demandas por parte do sector da hostalería. É evidente que nos últimos anos proliferou a ocupación do espazo público con terrazas vinculadas a establecementos de hostalería que non só favoreceu aos empresarios que as explotan, senón que tamén fomentan a relación social e potencian a actividade económica en xeral”.

A Ordenanza regula a ocupación de espazos públicos e non supón modificación da taxa fiscal.

A Ordenanza determina que non poderán instalarase terrazas nin en soportais nin en beirarrúas de anchura inferior a 3 metros. Entre as prohibicións que recolle a Ordenanza aprobada, non se permiten altofalantes ou calquera outro aparato difusor de son. Permítense televisores si teñen apagado o son.
Permitirase a instalación de calefactores móbiles ou aparellos análogos sen exceder o espazo autorizado para ocupar coa terraza. A súa instalación estará suxeita a licenza, que poderá solicitarse conxuntamente coa da terraza ou con posterioridade á mesma. Estes aparellos non necesitarán de ningún tipo de instalación fixa.

Sombrillas e toldos
Poderán instalarse sombrillas como elementos auxiliares da terraza: deberán ser pregables e desmontables, sen que se permita a súa suxeición ao pavimento mediante calquera clase de anclaxe. O voo das sombrillas, a altura respecto do chan e a publicidade que luzan, tamén estarán regulados nesta Ordenanza.
Permitirase a instalación de mamparas móbiles e a súa altura non poderá ser inferior a 1 metro nin superior a 1.5 metros, sendo polo menos os 50 cm superiores de material transparente. Estes elementos colocaranse sen realizar anclaxes ao pavimento e situáranse dentro do espazo autorizado a ocupar a terraza.
Tamén permitiranse a instalación de toldos, ou cubertas impermeables ao chan da vía pública sen ningunha fixación ao mesmo e sen posibilidade de pechar os laterais ou frontal do espazo cuberto.
Ademais a Ordenanza determina características do mobiliario, horarios de funcionamento e recollida, condicións de limpeza e recollida e un réxime de sancións por infraccións por ruídos ou outros motivos.

28/01/2021 in Alcaldía, Urbanismo, comercio e industria

Remata a pavimentación do camiño de Cavadas en Atios

No día de hoxe rematase de asfaltar o camiño de Cavadas, en Atios, segundo informa a Concellería de Infraestruturas.

Non obstante, o vindeiro luns continúan cos traballos de levantado de tapas de pozos e arquetas, segundo indicou Pedro Pereira, concelleiro responsable desta intervención.

A empresa “Fechi” foi a adxudicataria desta actuación que ten un orzamento de 59.436,19 €.
Este proxecto financiouse coas achegas do Plan Concellos 2020 da Deputación de Pontevedra.

28/01/2021 in Alcaldía, Urbanismo, comercio e industria, Vías e obras

O Concello suspende temporalmente o mercado ambulante, pecha parques infantís, recintos deportivos e centros culturais e anuncia unha nova liña de axudas á hostalería, comercio e autónomos

O Concello do Porriño suspenderá temporalmente o mercado ambulante durante as tres vindeiras semanas, segundo acordou hoxe a Comisión Municipal de Seguimento da Covid. Tamén durante ese período de tempo pecharanse os parques infantís e os recintos culturais, sociais e deportivos, conforme ás restricións que acordou a Xunta de Galicia e vixentes ata o 17 de febreiro.

A alcaldesa, Eva Garcia explicou que estas medidas locais de acompañamento ás restricións autonómicas “adóptanse para garantir a seguridade de todos limitando ao máximo a interacción e o contacto social”.

Por outra banda, a proposta do goberno municipal e co acordo dos participantes na Comisión Municipal de Seguimento, determinouse a celebración dun pleno municipal extraordinario para aprobar unha modificación orzamentaria para habilitar un fondo de axudas económicas directas, semellante ao que funcionou en 2020 e repartiu achegas por un importe total superior aos 80.000 €.

“A idea é axudar de xeito especial á hostalería, como sector máis damnificado polas restricións, pero tamén ao comercio e aos autónomos”, engadiu a alcaldesa.
Eva Garcia manifestou, tamén, que agarda “chegar a un consenso con todos os grupos políticos da corporación a contía desas axudas para que esta proposta saia coma unha iniciativa común de toda a corporación”.

27/01/2021 in Alcaldía, Cultura e festas, Deportes, Parques e xardíns